മോമോസ് കഴിക്കാത്തവരായി അധികമാരും ഉണ്ടാവില്ല, എന്നാൽ ഒറിജിനൽ ആസാം മോമോസ് കഴിച്ചിട്ടുണ്ടോ? ഇല്ലെങ്കിൽ നേരെ ചാലിശ്ശേരിയിലേക്ക് പോരൂ.. പടിഞ്ഞാറ് സിക്കിമിലെ, സോറെങ് ജില്ലയിൽ നിന്നും അജംബരി എസ്.എച്ച്.ജിയെ പ്രതിനിധീകരിച്ചെത്തിയ ബന്ധനയും സഹപാചകക്കാരായ കാജൽ പ്രധാനും, റിന പ്രധാനും, കേഷരി സുബ്ബയും, ആംകുമാരി പ്രധാനുമാണ് ദേശീയ സരസ് മേളയിൽ ഭക്ഷണപ്രേമികളായ സന്ദർശകർക്ക്, വിവിധ തരം മോമോസുകളും, ചിക്കൻ ഫാലെയും വിളമ്പുന്നത്. ചിക്കൻ മോമോസ്, ചിക്കൻ ഫ്രൈഡ് മോമോസ്, ചിക്കൻ ന്യൂഡിൽസ്, ഫ്രൈഡ് റൈസ്, മാവിൽ ചിക്കനും മസാലയും നിറച്ച് പ്രത്യേക രൂപത്തിൽ  പൊരിച്ചെടുക്കുന്ന ചിക്കൻ ഫാലെ തുടങ്ങിയവയാണ് സിക്കിം ട്രഡീഷണൽ ഫുഡ് യൂണിറ്റിലെ പ്രധാന വിഭവങ്ങൾ. ചെറു ധാന്യങ്ങൾ ഉപയോഗിച്ച് തയ്യാറാക്കുന്ന മില്ലറ്റ് ചിക്കൻ മോമോസ് സ്റ്റാളിൻ്റെ മറ്റൊരു പ്രത്യേകയാണ്. മാവിൽ ചിക്കനും, മസാലയും ചേർത്ത് ആവിയിൽ വേവിച്ചെടുക്കുന്ന മോമോസ് രുചിയുടെ കാര്യത്തിലും, ആരോഗ്യഗുണങ്ങളുടെ കാര്യത്തിലും ഏറെ മുന്നിൽ നിൽക്കുന്ന ലഘു ഭക്ഷണമായതിനാൽ സ്റ്റാളിന് മുന്നിൽ എപ്പോഴും തിരക്കാണ്. ദരംദിൻ ബ്ലോക്ക് ഡെവലപ്പ്മെൻ്റ് സൊസൈറ്റി പ്രസിഡൻ്റും, യൂണിറ്റ് ഉടമയുമായ ബന്ധന.എസ്. ആദ്യമായാണ് സരസ് മേളയിൽ പങ്കെടുക്കുന്നത്. ഭക്ഷ്യ വിഭവങ്ങളുടെയെല്ലാം വില 150 രൂപയാണ്.

പായസമെന്നു കേട്ടാൽ അടയോ പരിപ്പോ സേമിയയോ ഒക്കെയാണോ ഓർമ്മ വരുന്നത്.. എങ്കിൽ തെറ്റി. ചാലശ്ശേരിയിൽ നടക്കുന്ന കുടുംബശ്രീ ദേശീയ സരസ് മേളയിൽ ഇത്തവണത്തെ സൂപ്പർ താരം ഇതൊന്നുമല്ല, മറിച്ച് തൃത്താലയിലെ കർഷകർ മണ്ണിൽ പൊന്നുവിളയിച്ച പച്ചക്കറികൾ കൊണ്ടുണ്ടാക്കിയ 'തൃത്താല പായസം' ആണ്. അട്ടപ്പാടിയുടെ 'വനസുന്ദരി' ചിക്കനും 'കൊച്ചി മൽഹാർ' മൽസ്യവിഭവങ്ങൾക്കും ശേഷം ഭക്ഷ്യമേളകളിൽ വിപ്ലവം സൃഷ്ടിക്കാൻ തൃത്താലയുടെ സ്വന്തം പായസം എത്തിക്കഴിഞ്ഞു.

തൃത്താലയിലെ കുടുംബശ്രീ കർഷകർ ജൈവരീതിയിൽ ഉൽപാദിപ്പിച്ച മത്തൻ, പടവലം, ക്യാരറ്റ്, കുമ്പളം, ചുരക്ക എന്നിവയാണ് ഈ പായസത്തിലെ വിസ്മയക്കൂട്ടുകൾ. പച്ചക്കറി കൊണ്ട് പായസമോ എന്ന് മൂക്കത്ത് വിരൽ വയ്ക്കുന്നവർക്ക് അതിന്റെ രുചിയൊന്നു നോക്കിയാൽ സംശയം മാറും. പച്ചക്കറികളുടെ പച്ചമണം ലേശം പോലും ഇല്ലാത്ത വിധം പാകപ്പെടുത്തിയെടുക്കുന്ന രീതിയാണ് ഇതിനെ വേറിട്ടു നിർത്തുന്നത്.

പച്ചക്കറികൾ ചെറുതായി അരിഞ്ഞ് വേവിച്ച് അരച്ചെടുക്കുന്നതാണ് ആദ്യഘട്ടം. പിന്നീട് ചെറുതീയിൽ നെയ്യിട്ട് പാകത്തിന് വഴറ്റും. പച്ചമണം പൂർണ്ണമായും മാറിയെന്ന് ഉറപ്പുവരുത്തിയ ശേഷം അഞ്ച് കിലോ പച്ചക്കറിക്ക് അഞ്ച് കിലോ ശർക്കര എന്ന അനുപാതത്തിൽ പാനി ചേർക്കും. ഇതിലേക്ക് പൈനാപ്പിൾ, ആപ്പിൾ, ഈന്തപ്പഴം, പപ്പായ, പഴം എന്നിവയും ചേർക്കുന്നു. മിശ്രിതം നന്നായി കുറുകി വരുമ്പോൾ തേങ്ങാപ്പാലോ പശുവിൻ പാലോ ചേർത്ത് ഹൽവയുടെ പരുവത്തിലാക്കും. ആവശ്യമുള്ളപ്പോൾ പാലിൽ നന്നായി അരച്ചെടുത്ത് ഫ്രൂട്സും ചേർത്ത് ഇത് വിളമ്പാം. ഫ്രിഡ്ജിൽ വെക്കാതെ തന്നെ പത്തുദിവസം വരെ ഈ വിഭവം സൂക്ഷിക്കാമെന്നത് വീട്ടമ്മമാർക്കും പ്രിയങ്കരമാക്കുന്നു.

ഭക്ഷ്യമേളകളിൽ തരംഗമായ അട്ടപ്പാടി വനസുന്ദരിയെ അവതരിപ്പിച്ച അദേഭാ ഇൻസ്റ്റിറ്റ്യൂട്ട് ഓഫ് ഫുഡ് റിസർച്ച് ആൻഡ് ഹോസ്പിറ്റാലിറ്റി മാനേജ്‌മെന്റ് ട്രെയിനർ ദയൻ രാഘവനാണ് തൃത്താല പായസത്തിന്റെയും ശില്പി. ഓരോ പ്രദേശത്തെയും തനത് വിഭവങ്ങളെ ദേശീയ ശ്രദ്ധയിൽ എത്തിക്കുക എന്ന ലക്ഷ്യത്തിന്റെ ഭാഗമായാണ് അദ്ദേഹം ഈ 'സിഗ്നേച്ചർ ഡിഷ്' ഒരുക്കിയിരിക്കുന്നത്. മേളകൾ നടക്കുന്ന നാടിന്റെ രുചി വൈവിധ്യം ലോകത്തിന് മുന്നിലെത്തിക്കുക എന്നതാണ് ഞങ്ങളുടെ ലക്ഷ്യം. വനസുന്ദരി പോലെ തൃത്താല പായസവും ഭക്ഷണപ്രേമികൾ ഏറ്റെടുത്തു കഴിഞ്ഞു എന്ന് ദയൻ രാഘവൻ പറയുന്നു.

ഞായറാഴ്ച നടന്ന 'റിമി ടോമി ലൈവ്' ഷോയ്ക്കിടെ മന്ത്രി എം.ബി.രാജേഷിനും ഗായിക റിമി ടോമിക്കും നൽകിക്കൊണ്ടായിരുന്നു പായസത്തിന്റെ ഔദ്യോഗിക ഉദ്ഘാടനം. വരും ദിവസങ്ങളിൽ സരസ് മേളയിലെത്തുന്നവർക്ക് തൃത്താലയുടെ മണ്ണിൽ നിന്നുള്ള ഈ ജൈവമധുരം നേരിട്ട് നുണയാം.

ചാലിശ്ശേരിയിൽ നടക്കുന്ന പതിമൂന്നാമത് സരസ് മേളയിലെ വിപണന സ്റ്റാളിൽ സംരംഭകത്വത്തിൻ്റെ വിജയ കഥയുമായാണ് അട്ടപ്പാടി ആദിവാസി കരുവാര ഉന്നതിയിൽ നിന്നും കുടുംബശ്രീ സരിത യൂണിറ്റ് അംഗങ്ങൾ എത്തിയിട്ടുള്ളത്. കുടുംബശ്രീയുടെ സഹായത്തോടെ വീട്ടിൽ തന്നെ സംരംഭം തുടങ്ങി സ്വന്തമായി വരുമാനം കണ്ടെത്തിയവരാണ് സരിത യൂണിറ്റിലെ സുമ പുഷ്പ, വിജി, രേണുക എന്നിവർ. വരഗ്, ചാമ, തിന, റാഗി, മണിച്ചോളം തുടങ്ങിയ ഉൽപ്പന്നങ്ങളാണ് മേളയിലെ 19-ാം നമ്പർ സ്റ്റാളിൽ ഇവർ വിപണനം ചെയ്യുന്നത്. ഒന്നുമില്ലായ്മയിൽ നിന്ന് സംരംഭകരായി ഉയർന്ന് സ്വയംപര്യാപ്തത നേടി നാടിന് മാതൃക തീർക്കുന്നു എന്നാണ് ഇവരുടെ പ്രത്യേകത.

ആദിവാസി സമഗ്ര വികസന പദ്ധതിയുടെ ഭാഗമായി കുടുംബശ്രീയുടെ സഹായത്തോടെ ആരംഭിച്ച ഈ സംരംഭത്തിലൂടെ ഇവർക്ക് ഒരു മാസം അയ്യായിരം രൂപയിലധികം ലാഭമുണ്ടാക്കാൻ കഴിയുന്നുണ്ട്. അട്ടപ്പാടിയിലെ ആദിവാസി ഉന്നതികളിൽ ആളുകൾ ശേഖരിക്കുന്ന കാട്ടുകുന്തിരിക്കം സ്റ്റാളിലെ മുഖ്യ ആകർഷണമാണ്. ഇത് കൂടാതെ ഇവർ സ്വന്തമായി കൃഷി ചെയ്ത കുരുമുളക്, കാപ്പി, മഞ്ഞൾ, ഇഞ്ചി എന്നിവയുടെ പൊടികളും സ്റ്റാളിലുണ്ട്. ഒരു ദിവസം നിരവധി ഉല്പന്നങ്ങളാണ് അട്ടപ്പാടി സ്റ്റാളുകളിൽ നിന്ന് വിറ്റ് പോകുന്നത്.

പ്രമേഹ രോഗികൾക്ക് ഉപകാര പ്രദമായ ട്രൂ സ്‌പേസ്‌ ഉല്പന്നത്തിനും മേളയിൽ വലിയ ഡിമാൻ്റാണ്. കമ്പ്, റാഗി, മണിച്ചോളം മുളപ്പിച്ചത് പൊടിച്ചുണ്ടാകുന്ന ഒരു പോഷകാഹാരം കൂടിയാണിത്. കുക്കീസ് മില്ലറ്റ് ബിസ്ക്കറ്റ് എന്നിവയും ലഭ്യമാണ്.

കേരളത്തിൽ നിന്ന് ലോകോത്തര നിലവാരത്തിലുള്ള ഉൽപ്പന്നങ്ങൾ നിർമ്മിക്കുന്നതിന് ബ്രാൻഡ്, സ്കെയിൽ, ക്വാളിറ്റി എന്നീ മൂന്ന് കാര്യങ്ങളിൽ ശ്രദ്ധ കേന്ദ്രീകരിക്കണമെന്ന് കേരള സ്റ്റാർട്ടപ്പ് മിഷൻ സി.ഇ.ഒ. അനൂപ് അംബിക പറഞ്ഞു. ദേശീയ സരസ് മേളയുടെ ഭാഗമായി നടന്ന 'നൂതന സ്റ്റാർട്ടപ്പ് സാധ്യതകൾ' എന്ന സെമിനാറിൽ മുഖ്യപ്രഭാഷണം നടത്തുകയായിരുന്നു അദ്ദേഹം.

സംരംഭകത്വത്തിലേക്കുള്ള ആദ്യ ചുവടുവെപ്പ് എങ്ങനെ എടുക്കാം എന്നതിനെക്കുറിച്ച് അദ്ദേഹം വിശദീകരിച്ചു. "നമ്മുടെ ഉൽപ്പന്നങ്ങൾ ലോകവിപണിയിൽ മത്സരിക്കണമെങ്കിൽ ഗുണനിലവാരത്തിലും ഉൽപ്പാദനത്തിന്റെ അളവിലും ബ്രാൻഡിംഗിലും വിട്ടുവീഴ്ച പാടില്ല. ശാക്തീകരണത്തിനപ്പുറം സാമ്പത്തിക പ്രവർത്തനങ്ങളിലൂടെ മാത്രമേ ഇത് സാധ്യമാകൂ" - അനൂപ് അംബിക കൂട്ടിച്ചേർത്തു.

'കുതിരയെ വെള്ളം കുടിപ്പിക്കാനാവില്ല' ; കുടുംബശ്രീയുടെയും സ്റ്റാർട്ടപ്പ് മിഷന്റെയും പങ്ക് വ്യക്തമാക്കാൻ പഴയൊരു ചൊല്ലാണ് ഡോ. പൂർണ്ണിമ നാരായണൻ വേദിയിൽ ഉദാഹരിച്ചത്. "പുഴയുടെ അടുത്തേക്ക് കുതിരയെ കൊണ്ടുപോകാം, പക്ഷെ വെള്ളം കുടിക്കണമെങ്കിൽ കുതിര തന്നെ തീരുമാനിക്കണം. ഇതുപോലെയാണ് സംരംഭകത്വവും. അവസരങ്ങളും സാഹചര്യങ്ങളും ഒരുക്കി നൽകാൻ മാത്രമേ സർക്കാർ സംവിധാനങ്ങൾക്ക് സാധിക്കൂ. അത് ഉപയോഗപ്പെടുത്താൻ സ്ത്രീകൾ സ്വയം മുന്നോട്ട് വരണം" - അവർ പറഞ്ഞു. സ്ത്രീകൾ എന്ത് ചെയ്യണമെന്ന് അധികാരികൾ പറയുന്ന പഴയ രീതി മാറി, അവർ എന്ത് ചെയ്യാൻ ആഗ്രഹിക്കുന്നു എന്ന് ഇങ്ങോട്ട് പറയുന്ന തലത്തിലേക്ക് കുടുംബശ്രീ വളർന്നുവെന്നും അവർ ചൂണ്ടിക്കാട്ടി.

തിങ്കളാഴ്ച (ജനുവരി 5) രാവിലെ വേദി 2 - അമ്മു സ്വാമിനാഥനിൽ നടന്ന സെമിനാറിൽ നവകേരള മിഷൻ പാലക്കാട്‌ ജില്ലാമിഷൻ കോർഡിനറ്റർ  സൈതലവി അധ്യക്ഷത വഹിച്ചു. ഐ.ഇ.ഒ  സുഹൈൽ സ്വാഗതം പറഞ്ഞു. കുടുംബശ്രീ പാലക്കാട്‌ ജില്ലാ പ്രോഗ്രാം മാനേജർ ജിജിൻ നന്ദി രേഖപ്പെടുത്തി. ചടങ്ങിൽ പങ്കെടുത്ത വിശിഷ്ടാതിഥികൾക്ക് സംഘാടകർ ഉപഹാരങ്ങൾ നൽകി ആദരിച്ചു.

അറബിക്കടലിന്റെ തീരത്തുനിന്ന് നിളയുടെ മണ്ണിലേക്ക് ഗുജറാത്തി ഖാദിയുടെ തനിമയുമായി അവർ എത്തി. ചാലിശ്ശേരിയിൽ നടക്കുന്ന ദേശീയ സരസ് മേളയിൽ സന്ദർശകരുടെ തിരക്കേറുന്നത് പീന പട്ടേലിന്റെയും ദർമിസയുടെയും സ്റ്റാളിലേക്കാണ്. ഗുജറാത്തിലെ നവസരി ജില്ലയിലുള്ള ദഗവാഡ ഗ്രാമത്തിൽ നിന്ന് കിലോമീറ്ററുകൾ താണ്ടി എത്തിയ ഈ സംരംഭകർക്ക് ഇത് കേവലം ഒരു കച്ചവടമല്ല, തങ്ങളുടെ ഗ്രാമത്തിന്റെ അതിജീവനത്തിന്റെ കഥ കൂടിയാണ്.

നവസരിയിലെ ‘പ്രമുഖ് സ്വാമി’ സ്വയംസഹായ സംഘത്തിലെ (എസ്.എച്ച്.ജി) പത്ത് കരുത്തുറ്റ വനിതകളുടെ അധ്വാനമാണ് ഈ ഖാദി ഉൽപ്പന്നങ്ങൾ. സംഘത്തിലെ അംഗങ്ങളായ പീന പട്ടേലും ദർമിസയുമാണ് ഉൽപ്പന്നങ്ങളുമായി പാലക്കാട്ടെത്തിയത്. ആദ്യമായാണ് ഇവർ കേരളത്തിലെത്തുന്നത്. തങ്ങളുടെ ആദ്യ സരസ് മേള കൂടിയായ ചാലിശ്ശേരിയിൽ ലഭിക്കുന്ന സ്നേഹവും സ്വീകാര്യതയും ഇവരെ അമ്പരപ്പിക്കുന്നു.

"കേരളത്തിലെ ജനങ്ങൾക്ക് ഖാദിയോടുള്ള താൽപ്പര്യം വലിയ ആവേശമാണ് നൽകുന്നത്. ഇത്രയും വലിയൊരു സ്വീകാര്യത ഞങ്ങൾ പ്രതീക്ഷിച്ചിരുന്നില്ല" എന്ന് പീന പട്ടേൽ പറയുന്നു.

സ്വാതന്ത്ര്യ സമരകാലത്ത് മഹാത്മാഗാന്ധി ഇന്ത്യയുടെ ആത്മവീര്യമായി ഉയർത്തിക്കാട്ടിയ ഖാദി, വെറുമൊരു തുണിയല്ല. അതിന്റെ സവിശേഷതകൾ ഏറെയാണ്. യന്ത്രസഹായമില്ലാതെ ചർക്കയിൽ നൂൽ നൂറ്റ് കൈത്തറിയിൽ നെയ്തെടുക്കുന്ന ഖാദിക്ക് ഇന്നും ആവശ്യക്കാർ നിരവധിയാണ്. വേനൽക്കാലത്ത് തണുപ്പും ശൈത്യകാലത്ത് ചൂടും നൽകുന്നു എന്നതാണ് ഖാദിയുടെ ഏറ്റവും വലിയ ഗുണം. രാസവസ്തുക്കളുടെ കുറഞ്ഞ ഉപയോഗവും പ്രകൃതിദത്തമായ നാരുകളും ഖാദിയെ പരിസ്ഥിതിക്ക് ഇണങ്ങിയതാക്കുന്നു.ഓരോ ഖാദി വസ്ത്രം വാങ്ങുമ്പോഴും അത് ദഗവാഡ പോലുള്ള ഗ്രാമങ്ങളിലെ പാവപ്പെട്ട കുടുംബങ്ങളുടെ ഉപജീവനത്തിനുള്ള വഴിയാണ് തുറക്കുന്നത്.

തനിമ തിളങ്ങുന്ന ഉൽപ്പന്നങ്ങൾ ഗുജറാത്തി എംബ്രോയ്ഡറികളും വർണ്ണാഭമായ ഡിസൈനുകളും ചേർന്ന കുർത്തകൾ, സാരികൾ, മറ്റ് ഖാദി വസ്ത്രങ്ങൾ എന്നിവയ്ക്കാണ് മേളയിൽ പ്രിയമേറുന്നത്. ഗുജറാത്തിന്റെ തനത് സംസ്കാരവും ഖാദിയുടെ ലാളിത്യവും ഒത്തുചേരുന്ന ഉൽപ്പന്നങ്ങൾ കാണണമെങ്കിൽ സരസ് മേളയിലെ 190 ആം നമ്പർ സ്റ്റാളിൽ എത്തിയാൽ മതി.  

മേള അവസാനിക്കാൻ ദിവസങ്ങൾ ബാക്കിനിൽക്കെ, കൂടുതൽ മലയാളികളിലേക്ക് തങ്ങളുടെ ഗ്രാമീണ കല എത്തിക്കാനായതിന്റെ സന്തോഷത്തിലാണ് ദഗവാഡയിലെ ഈ പെൺകരുത്ത്.

ദേശീയ സരസ് മേളയുടെ ആവേശത്തിലേക്ക് രുചിയുടെ കപ്പലടുപ്പിച്ച് സെലിബ്രിറ്റി ഷെഫ് സുരേഷ് പിള്ള. ഫുഡ്കോർട്ടിലെ 'അമ്മു സ്വാമിനാഥൻ' വേദിയിൽ നടന്ന ഷെഫ് പിള്ളയുടെ മാസ്റ്റർ ഷെഫ് പ്രോഗ്രാം കാണാൻ ജനക്കൂട്ടം ഇരച്ചെത്തി. സോഷ്യൽ മീഡിയയിൽ ലോകമെമ്പാടുമുള്ള ഭക്ഷണപ്രേമികൾ ചർച്ച ചെയ്ത ഷെഫ് പിള്ളയുടെ സിഗ്നേച്ചർ വിഭവം 'ഫിഷ് നിർവാണ' വേദിയിൽ തത്സമയം തയ്യാറാക്കിയതോടെ ചാലിശ്ശേരിയിലെ ഫുഡ്‌ കോർട്ട് രുചിസാന്ദ്രമായി.

വർഷങ്ങളായി മലയാളി കഴിക്കുന്ന മീൻ വിഭവത്തിന് എങ്ങനെ ഇത്രയധികം സ്വീകാര്യത ലഭിച്ചു എന്ന ചോദ്യത്തിനുള്ള ഉത്തരമായിരുന്നു ആ 5 മിനിറ്റ് നീണ്ട പാചക പ്രദർശനം. വാഴയിലയുടെ മണവും തേങ്ങാപ്പാലിന്റെ മധുരവും പച്ച മാങ്ങയുടെ പുളിയും ചേർന്നപ്പോൾ വേദിയിൽ പിറന്നത് രുചിയുടെ പുതിയൊരു അനുഭവം. ഫിഷ് നിർവാണയുടെ പിന്നിലെ 'രഹസ്യ ചേരുവകൾ' ഒട്ടും മടുപ്പില്ലാതെ ഷെഫ് പിള്ള കാണികൾക്ക് മുന്നിൽ വിവരിച്ചു.

രുചി എന്നത് നാവിൽ മാത്രം ഒതുങ്ങുന്ന ഒന്നല്ല, അത് മനസ്സിൽ തങ്ങിനിൽക്കുന്ന അനുഭവമായി മാറണം എന്ന് ഷെഫ് പിള്ള പറഞ്ഞു. വിഭവം തയ്യാറായതോടെ രുചിച്ചു നോക്കാൻ ഷെഫ് പിള്ള കാണികളെ വേദിയിലേക്ക് ക്ഷണിച്ചു. നിമിഷങ്ങൾക്കകം നിരവധി പേരാണ് വേദിയിൽ എത്തിയത്. വേദിക്ക് സമീപം പ്രത്യേകം ഒരുക്കിയ കൗണ്ടറിലൂടെ നൂൽ പൊറോട്ടയും ഫിഷ് നിർവാണയും ജനങ്ങൾക്ക് വിതരണം ചെയ്തു. നൂൽ പൊറോട്ടയുടെ നൂലുകൾക്കിടയിലേക്ക് നിർവാണയുടെ തേങ്ങാപ്പാൽ മസാല അലിഞ്ഞുചേരുമ്പോഴുള്ള രുചി നേരിട്ടറിയാൻ ജനങ്ങളുടെ വൻ തിരക്കാണ് അനുഭവപ്പെട്ടത്.

ചാലിശ്ശേരിയുടെ മണ്ണിൽ രുചിവിസ്മയം തീർത്ത ഷെഫ് പിള്ളയെ കാണാനും സെൽഫിയെടുക്കാനും നൂറുകണക്കിന് ആരാധകരാണ് കാത്തുനിന്നത്. കുടുംബശ്രീ ചീഫ് ഓപ്പറേറ്റിങ് ഓഫീസർ നവീന്‍.സി, ഷെഫ് സുരേഷ് പിള്ളയെ ആദരിച്ചു.

തൃത്താലയുടെ വികസന ഭൂപടം ഇനി ഒറ്റനോട്ടത്തിൽ കാണാം. ചാലിശ്ശേരിയിൽ നടക്കുന്ന ദേശീയ സരസ് മേളയിലെ ഉൽപ്പന്ന പ്രദർശന സ്റ്റാളിലാണ് മാറ്റം തൊട്ടറിഞ്ഞ തൃത്താലയുടെ മനോഹരമായ മിനിയേച്ചർ രൂപം സന്ദർശകരുടെ മനം കവരുന്നത്. 24 അടി നീളത്തിലും 4 അടി വീതിയിലുമായി ഒരുക്കിയ ഈ വിസ്മയരൂപം തദ്ദേശ സ്വയംഭരണ വകുപ്പ് മന്ത്രി എം.ബി. രാജേഷ് ഉദ്ഘാടനം ചെയ്തു.

വെറും വാക്കുകളിലല്ല, മറിച്ച്  ജനങ്ങൾക്കാവശ്യമായ വികസനമാണ് തൃത്താലയുടേതെന്ന് ഈ മിനിയേച്ചർ സാക്ഷ്യപ്പെടുത്തുന്നു. കഴിഞ്ഞ നാലര വർഷത്തിനുള്ളിൽ മണ്ഡലത്തിൽ നടപ്പിലാക്കിയ 984.90 കോടി രൂപയുടെ വമ്പൻ പദ്ധതികളാണ് ഇവിടെ പുനരാവിഷ്കരിച്ചിരിക്കുന്നത്. ഓരോ കിലോമീറ്ററിലും തൃത്താല എങ്ങനെ മാറുന്നു എന്നതിന്റെ നേർച്ചിത്രമാണിത്. വികസനത്തിന്റെ 'നാലര' വർഷങ്ങൾ കാഴ്ചക്കാരിൽ വിസ്മയമാകുന്നു.

102 കോടി രൂപ ചെലവിൽ നിർമ്മിച്ച കാങ്കപ്പുഴ റഗുലേറ്റർ കം ബ്രിഡ്ജ് മിനിയേച്ചറിലെ പ്രധാന ആകർഷണമാണ്. ഫെബ്രുവരിയിൽ നാടിന് സമർപ്പിക്കുന്ന തൃത്താല ഗവ. ഹോസ്പിറ്റൽ, തൃത്താല ഗവ. കോളേജ്, കല്ലടത്തൂർ ഗോഖലേ ഗവ. ഹയർ സെക്കന്ററി സ്കൂൾ എന്നിവയുടെ തനിമയാർന്ന രൂപങ്ങൾ ഇവിടെ കാണാം. പരുതൂർ, കരിയന്നൂർ എൽ.പി സ്കൂളുകൾ, സ്മാർട്ടായ പരുതൂർ വില്ലേജ് ഓഫീസ്, നാടപറമ്പ് അംഗൻവാടി എന്നിവ വികസനത്തിന്റെ താഴെത്തട്ടിലുള്ള സാന്നിധ്യം വിളിച്ചോതുന്നു. ഒരു കോടി രൂപയ്ക്ക് നവീകരിച്ച മാങ്ങാട്ട് കുളവും രണ്ടു കോടിയുടെ പാപ്പിക്കുളവും പരിസ്ഥിതി സൗഹൃദ വികസനത്തിന്റെ മാതൃകകളാണ്.

റോഡ് ശൃംഖലയിലും കായിക രംഗത്തും മണ്ഡലം കൈവരിച്ച നേട്ടങ്ങൾ അക്കമിട്ടു നിരത്തുന്നു. 270 കോടി രൂപ ചെലവിൽ പൂർത്തിയാക്കിയ 25 പി.ഡബ്ല്യു.ഡി റോഡുകൾ മണ്ഡലത്തിന്റെ ഗതാഗത മേഖലയെ മാറ്റിമറിച്ചു. 1.62 കോടിയുടെ സ്പോർട്സ് ഹബ്ബ്, ഐ.ടി.ഐ, നഴ്സിംഗ് കോളേജ് എന്നിവയ്‌ക്കൊപ്പം എല്ലാ പഞ്ചായത്തുകളിലും ഓപ്പൺ ജിമ്മുകളും സജ്ജമായിക്കഴിഞ്ഞു. ആറ് പഞ്ചായത്തുകളിലെ കുടിവെള്ള ക്ഷാമത്തിന് പരിഹാരമാകുന്ന മുടവന്നൂർ ജലശുദ്ധീകരണ പ്ലാന്റിന്റെ നിർമ്മാണവും അവസാനഘട്ടത്തിലാണ്.

തവന്നൂർ കേളപ്പൻ മെമ്മോറിയൽ ഗവ. വൊക്കേഷണൽ ഹയർ സെക്കന്ററി സ്കൂളിൽ നിന്ന് വിരമിച്ച ഡ്രോയിങ് അധ്യാപകൻ ഗോപു പട്ടിത്തറയാണ് ഈ ബൃഹത്തായ മിനിയേച്ചറിന്റെ ശില്പി. അദ്ദേഹത്തോടൊപ്പം ഒൻപതോളം കലാകാരന്മാർ ചേർന്ന് വെറും 7 ദിവസം കൊണ്ടാണ് തൃത്താലയുടെ ഈ വികസന ഭൂപടം പൂർത്തിയാക്കിയത്. സരസ് മേളയിലെത്തുന്ന ആയിരക്കണക്കിന് ആളുകൾക്ക് തൃത്താലയുടെ വളർച്ച നേരിട്ടറിയാനുള്ള അവസരം കൂടിയാണിത്.

സി.ഡി.എസ്. അധ്യക്ഷമാരായ ലീന രവി, സൗമ്യ സതീശൻ, ലത സൽഗുണൻ, കുടുംബശ്രീ പബ്ലിക് റിലേഷൻസ് ഓഫീസർ ഡോ.അഞ്ചൽ കൃഷ്ണകുമാർ, ബ്ലോക്ക് ഡെവലപ്മെൻ്റ് ഓഫീസർ ചന്ദ്രദാസ് കെ.കെ, സി.ഡി.എസ്. പ്രവർത്തകർ പങ്കെടുത്തു.

ഒഡീഷയിലെ നദിക്കരകളിൽ തിളങ്ങി നിൽക്കുന്ന ഗോൾഡൺ ഗ്രാസിന് സൗന്ദര്യം മാത്രമല്ല അലങ്കാരവസ്തുക്കളുടെ മനോഹാരിത കൂടിയുണ്ട്. ചാലിശ്ശേരിയിൽ നടക്കുന്ന പതിമൂന്നാമത് സരസ് മേളയിലെ 189-ാം നമ്പർ സ്റ്റാളിലെ ഒഡീഷ പുല്ലു കൊണ്ട് തയ്യാറാക്കിയ കരകൗശല വസ്തുക്കൾ വിപണി കീഴടക്കുകയാണ് .

ചെറിയ വീശറി, ഹാൻ്റ് ബാഗ്, കൊട്ട, വിവിധ തരം പെട്ടികൾ തുടങ്ങി നിരവധി ഉല്പന്നങ്ങളാണ് സ്റ്റാളിലുള്ളത്. ഒഡീഷയിലെ ഗ്രാമീണ സ്വയം സഹായ സംഘത്തിൻ്റെ കീഴിൽ പ്രവർത്തിക്കുന്ന പ്രഗതി ഗോൾഡൺ ഗ്രാസ് പ്രൊഡ്യൂസർ ഗ്രൂപ്പ് അംഗങ്ങളാണ് മനോഹരങ്ങളായ കരകൗശല വസ്തുക്കൾ തയ്യാറാക്കിയത്. മൂന്നുറിലധികം തൊഴിലാളികളുടെ അധ്വാനമാണ് ഈ മനോഹാരിതയ്ക്ക് പിന്നിൽ. നൂറ് രൂപ മുതലാണ് വില.

സ്ത്രീ ശാക്തീകരണത്തിന് വേണ്ടി നടത്തുന്ന സരസ് മേളയിൽ ആദ്യമായാണ് എത്തുന്നതെന്ന് സ്റ്റാളിന് നേതൃത്വം നൽകുന്ന സരോജിനി പറഞ്ഞു. മേളയുടെ മികച്ച സംഘാടനത്തിൽ വളരെ സന്തോഷമുണ്ടെന്നും അവർ കൂട്ടിച്ചേർത്തു.

പാലക്കാട് ജില്ലക്കാർക്ക് സുപരിചിതമായ ലാമോസ് ബ്രാൻ്റിൻ്റെ ചക്കക്കുരു ബിസ്കറ്റ് ദേശീയ സരസ് മേളയിൽ വമ്പൻ ഹിറ്റായി മാറുകയാണ്. കുടുംബശ്രീ പ്രവർത്തകയും തൃത്താല സ്വദേശിനിയുമായ ലത മോഹൻ്റെ സംരംഭമാണ് മേളയെ കീഴടക്കുന്നത്. 80 രൂപയാണ് ചക്കക്കുരു ബിസ്ക്കറ്റിൻ്റെ വില. ഇതു മാത്രമല്ല ചക്കപ്പായസവും നിമിഷ നേരം കൊണ്ടാണ് കാലിയാകുന്നത്.

സരസ് മേളയുടെ ഉദ്ഘാടന ചടങ്ങിൽ മുഖ്യമന്ത്രിക്കും വിശിഷ്ടാതിഥികൾക്കും നൽകിയ സ്നേഹസമ്മാനവും ലത മോഹൻ്റെ ലാമോസ് വിഭവങ്ങളായിരുന്നു. ചക്കയുടെ വൈവിധ്യങ്ങളെ ഉൾക്കൊള്ളിച്ച് കടൽ കടന്നും പെരുമ നേടിയ ലാമോസ് ബ്രാൻ്റിൽ ചക്ക കേക്ക്, പുട്ട് പൊടി, ഹൽവ, ചപ്പാത്തിപ്പൊടി തുടങ്ങി വൈവിധ്യം നിറഞ്ഞ രുചിക്കൂട്ടുകളുടെ ഒരു കലവറയാണ്. സരസ് മേളയുടെ 110-ാം നമ്പർ സ്റ്റാളിലെത്തുന്നവർ ഈ വിഭവങ്ങൾ വാങ്ങുന്ന തിരിക്കിലാണ്.

"മേളയിലെ ഒരു ദിവസം മൂവായിരം രൂപയോളം വിറ്റുവരവുണ്ട്. ചക്കയുടെ എല്ലാ സാധ്യതകളും വിപണിയിൽ ഉപയോഗിക്കാൻ അവസരമുണ്ടാക്കി തന്നതും കുടുംബശ്രീയാണ്. അതിന് മണ്ഡലത്തിൻ്റെ എം.എൽ.എ.യും മന്ത്രിയുമായ എം.ബി.രാജേഷ് നൽകിയ പ്രോത്സാഹനവും പിന്തുണയും വലുതാണ് " ലത മോഹൻ പറഞ്ഞു. സംരംഭകരെ വാർത്തെടുക്കുന്നതോടൊപ്പം അവരുടെ വരുമാനം സ്ഥിരപ്പെടുത്തുകയും ജീവത നിലവാരം മെച്ചപ്പെടുത്തുകയും ചെയ്യുന്ന കുടുംബശ്രീയുടെ മാതൃകാ പദ്ധതിയായി ലാമോസ് ഇന്ന് മാറിക്കഴിഞ്ഞു.

സരസ്മേളയിലും കുടുംബശ്രീയുടെ എല്ലാ ആഘോഷങ്ങളിലും ലാമോസ് താരമായി കഴിഞ്ഞു. അഞ്ഞൂറോളം ചക്കയാണ് ഒരു മാസത്തെ ചക്ക ഉല്പന്നങ്ങളുടെ നിർമ്മാണത്തിന് ഉപയോഗിക്കുന്നത്. അമേരിക്കയിലും ഗൾഫിലും ലാമോസിന് ആവശ്യക്കാരേറെയാണ്.

2024-ൽ മേഴത്തൂരിലാണ് കുടുംബശ്രീയുടെ എസ്.വി.ഇ.പി. (സ്റ്റാർട്ടപ്പ് വില്ലേജ് എൻ്റർപ്രണർഷിപ്പ് പ്രോഗ്രാം) പദ്ധതിയിലൂടെ ലാമോസ് അഗ്രി പ്രൊഡക്ഷൻ യൂണിറ്റ് ആരംഭിച്ചത്. ചക്ക വിദേശത്തും പ്രിയമായതോടെ ഓൺലൈൻ വഴിയും വിപണനം തുടങ്ങി. തൃത്താലയിൽ കൃഷി വകുപ്പിന്റെ സമൃദ്ധി ഷോപ്പിലൂടെയും വിപണനം നടത്തുന്നുണ്ട്.

'വിപണിയിൽ ഒരു ഉൽപ്പന്നം എങ്ങനെയാണോ മാർക്കറ്റ് ചെയ്യുന്നത്, അതുപോലെ സ്വന്തം കഴിവുകളെയും വ്യക്തിത്വത്തെയും ശരിയായ രീതിയിൽ മാർക്കറ്റ് ചെയ്യാൻ ഉദ്യോഗാർത്ഥികൾക്ക് സാധിക്കണം' - പ്രശസ്ത കരിയർ മെന്ററും ലൈഫോളജി സി.ഇ.ഒ.യുമായ പ്രവീൺ പരമേശ്വർ പറഞ്ഞു. ദേശീയ സരസ് മേളയുടെ ഭാഗമായി 'പുതിയ കാലം പുതിയ തൊഴിൽ' എന്ന വിഷയത്തിൽ വേദി 2- അമ്മു സ്വാമിനാഥനിൽ നടന്ന സെമിനാറിൽ സംസാരിക്കുകയായിരുന്നു അദ്ദേഹം.

സ്വന്തം തൊഴിൽ കണ്ടെത്തുക എന്നത് മറ്റാരുടേയുമല്ല, അവനവന്റെ തന്നെ ഉത്തരവാദിത്തമാണ്. അതിനായി കൃത്യമായ നൈപുണ്യം ആർജ്ജിക്കേണ്ടതുണ്ട്. ഏതു തൊഴിൽ മേഖലയിലും ഇന്ന് സാങ്കേതികവിദ്യയ്ക്ക് വലിയ പ്രാധാന്യമാണുള്ളത്. കഠിനാധ്വാനത്തിലൂടെ മാത്രമേ മികച്ച കരിയർ കെട്ടിപ്പടുക്കാൻ സാധിക്കൂ എന്നും അദ്ദേഹം ഓർമ്മിപ്പിച്ചു.
ഒരു മണിക്കൂറിലധികം നീണ്ടുനിന്ന സെമിനാറിൽ വിവിധ തൊഴിൽ മേഖലകളിലൂടെയുള്ള സഞ്ചാരവും അവിടെ വിജയിക്കാൻ വേണ്ട തന്ത്രങ്ങളും അദ്ദേഹം വിശദീകരിച്ചു. അധ്യാപകരും വിദ്യാർത്ഥികളും ഉൾപ്പെടെ നിരവധി പേർ സെമിനാറിൽ പങ്കെടുത്തു. ചടങ്ങിൽ കെ. മാസ്റ്റർ സ്വാഗതവും പി.ബി. സുനിൽകുമാർ നന്ദിയും പറഞ്ഞു.