• CITU Bhavan, Kollam

ജില്ലാ പി ആർ എം 

2025 ഏപ്രിൽ 28 ന് സി ഐ ടി യു ഹാളിൽ കുടുംബശ്രീ കൊല്ലം ജില്ലാ മിഷൻ ജില്ലാ പി ആർ എം സംഘടിപ്പിച്ചു. ജില്ലാ മിഷൻ കോ ഓർഡിനേറ്റർ, അസി ജില്ലാ മിഷൻ കോ ഓർഡിനേറ്റർമാർ, ജില്ലാ പ്രോഗ്രാം മാനേജർമാർ നേതൃത്വം നൽകി. മെമ്പർ സെക്രട്ടറിമാർ, സിഡിഎസ് അധ്യക്ഷർ, സിഡിഎസ് അക്കൗണ്ടൻ്റ്മാർ, കാസ്സ് ഓഡിറ്റർമാർ എന്നിവർ സന്നിഹിതരായിരുന്നു.

#kudumbashree #PRM #Kollam

• KILA, Thrissur

കുടുംബശ്രീ സംസ്ഥാന തല അവാർഡ് പരിഗണനയ്ക്കായി വിവിധ വിഭാഗങ്ങളിൽ നിന്നും പ്രതിനിധികൾ അവതരണം നടത്തി. 24 ന് മികച്ച ജില്ല, മികച്ച പബ്ലിക് റിലേഷൻസ് പ്രവർത്തനം നടത്തിയ ജില്ലാ എന്നീ വിഭാഗങ്ങളിൽ അവതരണം നടത്തി. 

• Kollam

കുടുംബശ്രീ മികവിന് അവാർഡ്

കുടുംബശ്രീ ജില്ലാ അവാർഡ് പ്രഖ്യാപിച്ചു : മികച്ച പ്രവർത്തനം കാഴ്ച്ചവെച്ച് ശാസ്താംകോട്ട

സ്ത്രീ ശാക്തീകരണ സാമൂഹിക സാമ്പത്തിക വികസന വഴികളിൽ നീണ്ട രണ്ടര പതിറ്റാണ്ട് പിന്നിട്ട നിറവിൽ കുടുംബശ്രീ മിഷൻ ത്രിതല സംവിധാനം, ജില്ല, സംസ്ഥാന തലങ്ങളിൽ വിവിധ മേഖലകളിലായി മികച്ച പ്രവർത്തനം കാഴ്ച്ച വച്ചതിനുള്ള പുരസ്ക്കാരം നൽകുന്നു. കുടുംബശ്രീ കൊല്ലം ജില്ലാ മിഷൻ്റെ നേതൃത്വത്തിൽ 2025 മാർച്ച് 28 ന് സി ഐ ടി യു ഹാളിൽ വച്ച് ജില്ലാതല അവാർഡ് അപേക്ഷകരുടെ അവതരണവും അവാർഡ് നിർണ്ണയവും നടത്തി. കുടുംബശ്രീ പ്രവർത്തനങ്ങളിൽ മികവ് പുലർത്തിയ അയൽക്കൂട്ടം, എ ഡി എസ്, സംരംഭക, സംരംഭ ഗ്രൂപ്പ് കൂടാതെ തനത് സംയോജന പ്രവർത്തനങ്ങൾ, സാമൂഹിക വികസനം - ജെൻഡർ, കാർഷികം- മൃഗ സംരക്ഷണം , കർഷികേതര ഉപജീവനം എന്നീ 4 വിഭാഗങ്ങളിലായി സിഡിഎസ്,

ബഡ്സ് സ്ഥാപനം, ജി ആർ സി(ജെൻഡർ റിസോഴ്സ് സെൻറർ), ഓക്‌സിലറി സംരംഭ ഗ്രൂപ്പ് എന്നിങ്ങനെ 11 വിഭാഗങ്ങളിൽ ജില്ലാ തല അവാർഡ് ഫലപ്രഖ്യാപനം കുടുംബശ്രീ കൊല്ലം ജില്ലാ മിഷൻ നടത്തി. ഓരോ വിഭാഗത്തിലെ അപേക്ഷകരുടെ പ്രവർത്തനങ്ങൾക്കും അവതരണത്തിനും അനുസൃതമായ മാർക്കടിസ്ഥാനത്തിലാണ് ജേതാക്കളെ തിരഞ്ഞെടുത്തത്. സിഡിഎസ് വിഭാഗങ്ങൾ, ബഡ്സ് സ്ഥാപനം, ജി ആർ സി എന്നീ വിഭാഗങ്ങൾക്ക് 2023-2024 കാലയളവിലെ പ്രവർത്തനങ്ങൾ അവാർഡിനായി പരിഗണിച്ചത്. അയൽക്കൂട്ടം, എ ഡി എസ്, സംരംഭക, സംരംഭക ഗ്രൂപ്പ്, ഓക്‌സി ലറി സംരംഭ ഗ്രൂപ്പ് എന്നിവയ്ക്ക് 2021-2022, 2022-2023, 2023-2024 വർഷങ്ങളിലെ പ്രവർത്തനങ്ങളാണ് അവാർഡ് നിർണയത്തിന് പ്രയോജനപെടുത്തിയത്. 

മത്സരങ്ങൾക്കൊടുവിൽ ജില്ലയിൽ ശാസ്താംകോട്ട സിഡിഎസ് ആണ് മുന്നിൽ നിൽക്കുന്നത്. സിഡിഎസ് തനത് സംയോജന പ്രവർത്തനം, കാർഷികം - മൃഗ സംരക്ഷണം, കാർഷികേതരം എന്നീ മേഖലകളിലാണ് ശാസ്താംകോട്ടയുടെ മിന്നും നേട്ടം. മികച്ച സിഡിഎസ് - സാമൂഹിക വികസനത്തിനുള്ള അവാർഡ് കടക്കൽ സിഡിഎസ് നേടി.

മികച്ച രീതിയിലുള്ള പ്രവർത്തനം കാഴ്ച്ച വെച്ച് ജില്ലയിലെ മികച്ച അയൽക്കൂട്ടം അവാർഡിന് അർഹയായത് ശാസ്താംകോട്ട ബ്ലോക്കിലെ മൈനാഗപ്പള്ളി സിഡിഎസിൽ അഫിലിയേഷൻ നേടിയ ഉഷസ് അയൽക്കൂട്ടത്തിനാണ്. മികച്ച എ ഡി എസ് വിഭാഗത്തിൽ 8 എ ഡി സുകളെ പിന്നിലാക്കി മികവുറ്റ പ്രവർത്തനം കാഴ്ചവെച്ച ഓച്ചിറ ബ്ലോക്കിലെ കൊറ്റമ്പളളി എ ഡി എസാണ് ഒന്നാം സ്ഥാനം കരസ്ഥമാക്കിയത്. മികച്ച ബഡ്സ്/ ബി ആർ സി സ്ഥാപനം വിഭാഗത്തിൽ ഇട്ടിവ ബഡ്സ് സ്ഥാപനങ്ങൾ വേറിട്ട പ്രവർത്തനത്തിൻ്റെ മികവിൽ ഒന്നാം സ്ഥാനം നേടി. മികച്ച ജി ആർ സി യായി കടക്കൽ ജി ആർ സി യെ തിരഞ്ഞെടുത്തു. 

സംരംഭകത്വ മികവിൽ മുന്നിൽ നിൽക്കുന്ന കുടുംബശ്രീ മിഷൻൻ്റെ സംരംഭ വിഭാഗങ്ങളിലും നിർണ്ണയ ഘട്ടത്തിൽ മികച്ച പ്രവർത്തനങ്ങൾ കണ്ടു. ജില്ലയിലെ മികച്ച സംരംഭകയായി കൊട്ടാരക്കര ബ്ലോക്ക് കരീപ്ര സിഡിഎസിലെ ഗായത്രി ഫുഡ് പ്രോഡക്ട്സിനെയും, മികച്ച സംരംഭ ഗ്രൂപ്പായി ചടയമംഗലം ബ്ലോക്ക് ഇട്ടിവ സിഡിഎസിലെ പ്രതീക്ഷ ഫ്ലോർ മില്ലിനെയും, മികച്ച ഓക്‌സിലറി സംരംഭ ഗ്രൂപ്പായി ശാസ്താംകോട്ട ബ്ലോക്ക് മൈനാഗപ്പള്ളി സിഡിഎസിൻ്റെ കീഴിലുള്ള നോവ ക്രാഫ്റ്റിനെയും തിരഞ്ഞെടുത്തു.

ജില്ലാ തല അവാർഡ് ജേതാക്കൾ സംസ്ഥാന തലത്തിൽ മത്സരിക്കും. 2025 ഏപ്രിൽ 21 മുതൽ ഏപ്രിൽ 26 വരെ സംസ്ഥാന തല നിർണ്ണയം തൃശ്ശൂർ ജില്ലയിലെ കിലയിൽ സംഘടിപ്പിക്കുന്നു. ജില്ലാ തലത്തിലെ വിഭാഗങ്ങൾ കൂടാതെ മികച്ച ജില്ല, മികച്ച പബ്ലിക് റിലേഷൻസ് പ്രവർത്തനങ്ങൾ നടത്തിയ ജില്ല എന്നീ വിഭാഗങ്ങളും കുടുംബശ്രീ സംസ്ഥാന തല അവാർഡ് മത്സരത്തിനുണ്ട്.

• Chirakkara, Kollam

കൊല്ലം ജില്ല കുടുംബശ്രീ സ്നേഹിതാ ജൻഡർ ഹെല്പ് ഡെസ്ക് ഉം ചിറക്കരപഞ്ചായത്ത്‌ അംഗൻവാടി No. 122 ഇൽ വച്ചു കൗമാരക്കാരും അവരുടെ രക്ഷിതാകൾക്കും "കൗമാരകാലം വസന്തകാലം " എന്ന വിഷയത്തിൽ സ്നേഹിതാ ജൻഡർ ഹെല്പ് ഡെസ്ക് കൗൺസിലർ ശ്രീമതി. നിഷീ വസന്ത് ക്ലാസ്സ്‌ എടുത്തു

അംഗൻവാടി ടീച്ചർ. ശ്രീമതി. ലതിക പോഷക ആഹാരത്തിന്റ ആവശ്യകതയെ കുറിച്ചും ക്ലാസ്സ്‌ എടുത്തു. 28 പേര് പങ്കെടുത്തു

• Kanakakunnu, Trivandrum

വൃത്തി കോൺക്ലേവ് 2025

തിരുവനന്തപുരം കനകക്കുന്ന് നിശാഗന്ധി ഓഡിറ്റോറിയത്തിൽ നടന്ന ഹരിത സംഗമം പരിപാടിയിൽ ജില്ലയിൽ നിന്ന് മാതൃക പ്രവർത്തനം കാഴ്ചവച്ച ഹരിത കർമസേന അംഗത്തെ ആദരിച്ചു. ചടയമംഗലം ബ്ലോക്ക്‌ ഇളമാട് പഞ്ചായത്തിൽ വാളിയോട് വാർഡിലെ ഹരിത കർമസേന അംഗമായ ശ്രീമതി അജിതയാണ് ആദരവിന് അർഹയായത്

• Mukhathala, Kollam

മുഖത്തല ബ്ലോക്ക് MERC വിഷു വിപണന മേള ഉത്ഘാടനം തൃക്കോവിൽവട്ടം ഗ്രാമ പഞ്ചായത്ത്‌ പ്രസിഡന്റ്‌ ശ്രീമതി. സിന്ധു. ജി. എസ് നിർവഹിച്ചു

• Collectorate Ground, Kollam

കുടുംബശ്രീ വിഷു വിപണന മേള തുടങ്ങി

വിഷുക്കാല സമൃദ്ധിക്ക് മാറ്റ് കൂട്ടാൻ കുടുംബശ്രീയുടെ കൈപ്പുണ്യം

 വിഷു കാലം കെങ്കേമമാക്കാൻ കുടുംബശ്രീ കൊല്ലം ജില്ലാ മിഷൻൻ്റെ വിഷു വിപണന മേള. 5 ദിവസമായി നടത്തുന്ന മേള കൊല്ലം കളക്ട്രേറ്റ് അങ്കണത്തിലാണ് സംഘടിപിച്ചത്. ഏപ്രിൽ 11 നു അവസാനിക്കും. 

വിഷു ക്കാല സമൃദ്ധിക്ക് മാറ്റ് കൂട്ടാൻ കുടുംബശ്രീയുടെ കലർപ്പില്ലാത്ത കൈപ്പുണ്യം കൊല്ലത്തിൻ്റെ ജനങ്ങൾക്ക് ഒരുക്കിയിരിക്കുന്നു.വിഷുക്കാലം മധുരമാക്കാൻ അട പ്രഥമൻ, കാരറ്റ് പായസം, ഫ്രൂട്ട്സ് പായസം തുടങ്ങി വിവിധ തരം പായസം, ലഡ്ഡു, ജിലേബി, കാട്ടുതേൻ, ചെറു തേൻ, സാധ തേൻ കൂടാതെ വിവിധ തരം അച്ചാറുകൾ, ഉപ്പിലിട്ട വിഭവങ്ങൾ, ബേക്കറി വിഭവങ്ങൾ തുടങ്ങിയവയും ഉണ്ട്. 130 രൂപയ്ക്ക് വയറ് നിറയെ കപ്പ ബിരിയാണി കഴിക്കാം, കൂടാതെ 150 രൂപയ്ക്ക് പാൽകപ്പ ചിക്കൻ കോംബോയും ലഭ്യമാക്കാം. രുചി വൈവിധ്യത്തിനപ്പുറം ഇനി വിഷുക്കോടി തിരയുകയാണെങ്കിൽ കൈത്തറി വസ്ത്രങ്ങളും മേളയിൽ വിപണനത്തിനുണ്ട്. 

പുനലൂർ, തൃക്കരുവ, കൊല്ലം, കൊല്ലം ഈസ്റ്റ്, ചാത്തന്നൂർ, പരവൂർ,കൊട്ടാരക്കര, പെരിനാട്, ഉമ്മന്നൂർ തുടങ്ങി കൊല്ലം ജില്ലയിലെ 14 സിഡിഎസുകളിൽ നിന്നായി കുടുംബശ്രീ സംരംഭകർ വിപണന മേളയ്ക്ക് വിവിധ ഉൽപന്നങ്ങൾ ഒരുക്കിയിരിക്കുന്നു.

കുടുംബശ്രീ ജില്ലാ മിഷൻ കോ ഓർഡിനേറ്റർ വിമൽ ചന്ദ്രൻ ആർ, അസി ജില്ലാ മിഷൻ കോ ഓർഡിനേറ്റർ ഉന്മേഷ് ബി, മാർക്കറ്റിംഗ്,എസ് വി ഇ പി, എം ഇ വിഭാഗം ജില്ലാ പ്രോഗ്രാം മാനേജർമാർ എം ഇ സി മാർ എന്നിവരുടെ നേതൃത്വത്തിൽ മേള നടത്തുന്നു.

• CITU Bhavan, Kollam

കുടുംബശ്രീ അവാർഡ് നിർണയം സംഘടിപ്പിച്ചു.

കുടുംബശ്രീയുടെ വിവിധ തലങ്ങൾ വിവിധ മേഖലകളിലായി കാഴ്ചവെച്ച മാതൃക പ്രവർത്തനങ്ങൾക്ക് സംസ്ഥാന ജില്ല തലങ്ങളിൽ പുരസ്ക്കാരം നൽകുന്നു. ഇതിനോടനുബന്ധിച്ച് കുടുംബശ്രീ കൊല്ലം ജില്ലാ മിഷൻ ജില്ലാ തല നിർണ്ണയം സി ഐ ടി യു ഹാളിൽ സംഘടിപ്പിച്ചു. ബഹു ജില്ലാ പഞ്ചായത്ത് പ്രസിഡൻ്റ് ഡോ പി കെ ഗോപൻ ഉദ്ഘാടനം നിർവഹിച്ചു. കുടുംബശ്രീ ജില്ലാ മിഷൻ കോ ഓർഡിനേറ്റർ വിമൽ ചന്ദ്രൻ ആർ അധ്യക്ഷനായി. അസി ജില്ലാ മിഷൻ കോ ഓർഡിനേറ്റർ രതീഷ് കുമാർ ആർ സ്വാഗതം പറഞ്ഞു. അസി ജില്ലാ മിഷൻ കോ ഓർഡിനേറ്റർ അനീസ എ നന്ദി അറിയിച്ചു. അസി ജില്ലാ മിഷൻ കോ ഓർഡിനേറ്റർ മുഹമ്മദ് ഹാരിസ്, സിഡിഎസ് ചെയർപേഴ്സൺമാർ, ജില്ലാ പ്രോഗ്രാം മാനേജർമാർ, ബ്ലോക്ക് കോ ഓർഡിനേറ്റർമാർ, റിസോഴ്സ് പേഴ്സൺമാർ എന്നിവരും സന്നിഹിതരായിരുന്നു. രണ്ട് ഹാളുകളിലായി നടത്തിയ നിർണ്ണയ പ്രക്രിയയിൽ കുടുംബശ്രീ ജീവനക്കാരുടെ സജീവ സാന്നിധ്യമുണ്ടായിരുന്നു. എ ഡി എം സിമാർ ( അസി ജില്ലാ മിഷൻ കോ ഓർഡിനേറ്റർമാർ), ഡി പി എം മാർ (ജില്ലാ പ്രോഗ്രാം മാനേജർമാർ), ബി സി മാർ (ബ്ലോക്ക് കോ ഓർഡിനേറ്റർമാർ) എന്നിവർ വിധി നിർണയം നടത്തി.

മികച്ച അയൽ കൂട്ടം, എ ഡി എസ്, സിഡിഎസ് കാർഷികം, കാർഷികേതരം, തുടങ്ങി 11 വിഭാഗങ്ങളിലായി വിവിധ നോമിനേഷനുകൾ ലഭിച്ചതിൽ 57 നോമിനികളെ കുടുംബശ്രീ ജില്ലാ മിഷൻ സ്കോർ അടിസ്ഥാനത്തിൽ തിരഞ്ഞെടുത്തു. സിഡിഎസ്, ബ്ലോക്ക്, ജില്ലാ തലങ്ങളിൽ അവാർഡ് അനുബന്ധം പ്രകാരം സ്കോർ നൽകിയ ശേഷം അതിൽ ഉയർന്ന സ്കോർ നേടിയതി തിരഞ്ഞെടുത്ത നോമിനികളാണ് പ്രബന്ധം അവതരിപ്പിച്ചത്. കുടുംബശ്രീയുടെ സാമൂഹിക സാമ്പത്തിക സ്ത്രീ ശാക്തീകരണ തലങ്ങളിലെ കാര്യക്ഷമമായ ഇടപെടലുകളിലൂടെ വന്ന വിവിധ മേഖലകളിലെ അനന്തര മാറ്റങ്ങളങ്ങളും വളർച്ചയും പ്രബന്ധത്തിലൂടെ പ്രതിനിധികൾ പങ്കുവെച്ചു. 

ജില്ലാ തലത്തിൽ നടക്കുന്ന അവസാന നിർണ്ണയ ഘട്ടമാണിത്. ശേഷം തിരഞ്ഞെടുക്കപ്പെട്ടവർ സംസ്ഥാന തല നിർണയത്തിന് പ്രബന്ധം അവതരിപ്പിക്കാൻ അവസരം ലഭിക്കും.

• Tangasseri, Kollam

ക്രൈം മാപ്പിംഗ് ജില്ലാതല കോൺക്ലേവ് കുടുംബശ്രീ സംഘടിപ്പിച്ചു 

: സമൂഹത്തിൽ സ്ത്രീകൾക്കും കുട്ടികൾക്കും എതിരെ വർദ്ധിച്ചു വരുന്ന അതിക്രമങ്ങളും ചൂഷണങ്ങളും തടയുന്നതിന് കുടുംബശ്രീ മുഖേന ജില്ലാ തല ക്രൈം മാപ്പിംഗ് കോൺക്ലേവ് തങ്കശ്ശേരി ഡി ഫോർട്ട് റിസോർട്ടിൽ സംഘടിപ്പിച്ചു. ബഹു ജില്ലാ കളക്ടർ എൻ ദേവിദാസ് ഐഎഎസ് ഉദ്ഘാടനം നിർവഹിച്ചു. കുടുംബശ്രീ ജില്ലാ മിഷൻ കോ ഓർഡിനേറ്റർ വിമൽ ചന്ദ്രൻ ആർ യോഗത്തിന് അധ്യക്ഷത വഹിച്ചു. അസി ജില്ലാ മിഷൻ കോ ഓർഡിനേറ്റർ രതീഷ് കുമാർ ആർ സ്വാഗതം പറഞ്ഞു. ബഹു കെ എസ് എഫ് ഇ ചെയർമാൻ കെ വരദരാജൻ മുഖ്യ പ്രഭാഷണം നടത്തി. ജെൻഡർ ഡിപിഎം ബീന ആർ നന്ദി രേഖപ്പെടുത്തി. ബഹു കളക്ടർ ക്രൈം മാപ്പിംഗ് കരട് പഞ്ചായത്ത് പ്രസിഡൻ്റ്മാർക്ക് കൈമാറി. പഞ്ചായത്ത് പ്രതിനിധികൾ, സിഡിഎസ് പ്രതിനിധികൾ, സ്നേഹിത സ്റ്റാഫ്, ജില്ലാ മിഷൻ സ്റ്റാഫ് എന്നിവരും സന്നിഹിതരായിരുന്നു. ജില്ലയിലെ തെരെഞ്ഞെടുത്ത ആറ് തദ്ദേശ സ്വയം ഭരണ സ്ഥാപനങ്ങളിലായാണ് പദ്ധതി നടപ്പിലാക്കിയത്. അതിക്രമങ്ങളെ തടയുകയും സ്ത്രീ സൗഹൃദ പ്രാദേശിക ഇടം സൃഷ്ടിക്കുകയും ചെയ്യുക എന്നതാണ് ക്രൈം മാപ്പിംഗ് വഴി ലക്ഷ്യമിടുന്നത്. 2024-25 സാമ്പത്തിക വർഷം ജില്ലയിലെ പൻമന, ശാസ്താം കോട്ട, വിളക്കുടി, നെടുമ്പന, പനയം, ചിറക്കര ഗ്രാമ പഞ്ചായത്തുകളെയാണ് ക്രൈം മാപ്പിംഗ് പഠനത്തിനായി തിരഞ്ഞെടുത്തത്. ആറ് തദ്ദേശ സ്വയം ഭരണ സ്ഥാപനങ്ങളിലെ ക്രൈം മാപ്പിംഗ് റിപ്പോർട്ടിന്റെ പുസ്തക പ്രകാശനം നടത്തുകയുണ്ടായി. പനയം പഞ്ചായത്ത് പ്രസിഡന്റ് ഡോ.കെ.രാജശേഖരൻ, ശാസ്താംകോട്ട പഞ്ചായത്ത് പ്രസിഡന്റ് ശ്രീമതി ഗീത. ആർ ചിറക്കര പഞ്ചായത്ത് പ്രസിഡന്റ് ശ്രീമതി സജില റ്റി.ആർ എന്നിവർ പരിപാടിയിൽ സന്നിഹിതരായിരുന്നു

ശാസ്താംകോട്ട, പന്മന, ചിറക്കര, വിളക്കൂടി, നെടുമ്പന, പനയം തിരഞ്ഞെടുക്കപ്പെട്ട 6 സിഡിഎസുകളിൽ ക്രൈം മാപ്പിംഗ് നടത്തി ശേഖരിച്ച് വിവരം കരടാക്കി സിഡിഎസ് ചെയർപേഴ്സൺമാർ അവതരിപ്പിക്കുകയും ചെയ്തു. അവതരണത്തിന് സാമൂഹ്യ പ്രവർത്തകരായ പി കെ അനിൽകുമാർ, അഡ്വ കെ പി സജിനാഥ്, എഴുത്തുകാരി രാജി ആർ പാനൽ അധ്യക്ഷരായി.

അതിക്രമങ്ങൾ വർദ്ധിച്ചു വരുന്ന സാഹചര്യത്തെ ഉന്മൂലനം ചെയ്യാൻ അവയുണ്ടാകാനുള്ള വ്യവസ്ഥിതിയെ തടയുക എന്നതാണ് ക്രൈം മാപ്പിംഗിലൂടെ ഉദേശിക്കുന്നത്. കുടുംബശ്രീയുടെ നേതൃത്വത്തിൽ തദ്ദേശ സ്വയം ഭരണ സ്ഥാപനങ്ങൾ പോലീസ് സംവിധാനം എന്നിവയുടെ സഹകരണത്തിൽ നടത്തുന്നതാണ് ക്രൈം മാപ്പിംഗ്. അതിക്രമത്തിൻ്റെ അവർത്തി, സ്വഭാവം, സ്ഥലം, അക്രമിയുടെ സ്വഭാവം എന്നിവയുടെ അടിസ്ഥാനത്തിൽ ക്രൈം ഹോട്ട് സ്പോട്ടുകൾ കണ്ടെത്തി കുടുംബശ്രീയുടെ സ്നേഹിത ജെൻഡർ ഹെൽപ്പ് ഡെസ്ക്, ജെൻഡർ റിസോഴ്സ് സെൻ്റർ, വിജിലൻസ് ഗ്രൂപ്പുകൾ എന്നിവയുടെ സാമൂഹിക ഇടപെടലുകളിലൂടെ അവ സുരക്ഷിത ഇടങ്ങളായി രൂപാന്തരപെടുത്തുവാനുള്ള നിരന്തരമായ പരിശ്രമത്തിലുമാണ്.

വിവിധ അവസ്ഥകളിലായിരിക്കുന്ന സ്ത്രീകളുടെ നേരെയുണ്ടാകുന്ന ശാരീരിക, ലൈംഗിക, സമൂഹ്യ അതിക്രമങ്ങളുടെ വിവരങ്ങൾ രഹസ്യ സ്വഭാവത്തിൽ ശേഖരിച്ച് പഠനം നടത്തി പ്രശ്‌ന പരിഹാര ഭാഗമായി പഞ്ചായത്ത് പദ്ധതികളിൽ ഉൾപെടുത്തി അതിക്രമങ്ങൾക്ക് കുറയ്ക്കുകയാണ് ഇതിൻ്റെ ലക്ഷ്യം.

• Kundara, Kollam

കുടുംബശ്രീ നേച്ചേഴ്സ് ഫ്രഷ് അഗ്രി കിയോസ്ക് കുണ്ടറയിൽ തുടക്കമായി

വിഷരഹിത പച്ചക്കറികൾക്ക് വിപണന സാധ്യത ഒരുക്കി കുടുംബശ്രീയുടെ അഗ്രി കിയോസ്ക്. 

കുടുംബശ്രീ ജില്ലാ മിഷൻ്റെയും കുണ്ടറ കുടുംബശ്രീ സിഡിഎസ്സിൻ്റെയും ആഭിമുഖ്യത്തിൽ കുടുംബശ്രീയുടെ കൂട്ടുത്തരവാദിത്ത കൃഷി സംഘങ്ങളുടെ നേതൃത്വത്തിൽ നടത്തുന്ന വെജിറ്റബിൾ കിയോസ്ക് അവരുടെ വിളവെടുപ്പിനെ വിപണിയിൽ ഇറക്കുന്നതിന് അവസരം ഒരുക്കുന്നു. ബഹു കുണ്ടറ ഗ്രാമ പഞ്ചായത്ത് പ്രസിഡൻ്റ് മിനി തോമസ് ഉദ്ഘാടനം നിർവഹിച്ചു. ആദ്യ വിൽപനയും കുണ്ടറ സിഡിഎസ് ചെയർപേഴ്സൺ റഷീദാബീവി അധ്യക്ഷത വഹിച്ചു. സിഡിഎസ് വൈസ് ചെയർപേഴ്സൺ വത്സല സതീശൻ സ്വാഗതം ആശംസിച്ചു. കുടുംബശ്രീ അസി ജില്ലാ മിഷൻ കോ ഓർഡിനേറ്റർ ഹാരിസ് മുഹമ്മദ് പദ്ധതി വിശദീകരണം നടത്തി. ഗ്രാമ പഞ്ചായത്ത് വൈസ് പ്രസിഡൻ്റ് ആർ ഓമനക്കുട്ടൻ പിള്ള, സ്ഥിരം സമിതി ചെയർപേഴ്സൺമാരായ രേഖ ജെ പിള്ള, സുധാദേവി, വിനോദ് വി, കുണ്ടറ കൃഷി ഓഫീസർ ബിനീഷ ബി, പഞ്ചായത്ത് അംഗങ്ങൾ തുടങ്ങിയവർ ചടങ്ങിൽ സംസാരിച്ചു. പേരയം സിഡിഎസ് ചെയർപേഴ്സൺ ആനിയമ്മ, ഈസ്റ്റ് കല്ലട സിഡിഎസ് ചെയർപേഴ്സൺ രശ്മി സി കെ, പെരിനാട് സിഡിഎസ് ചെയർപേഴ്സൺ ശോഭ വി, കുടുംബശ്രീ കാർഷിക വിഭാഗം ജില്ലാ പ്രോഗ്രാം മാനേജർ ശ്രീപ്രിയ എന്നിവർ ആശംസ നേർന്നു.

 അന്യ സ്രോതസ്സുകളിൽ നിന്നും വരുന്ന വിഷപദാർഥങ്ങൾ നിറഞ്ഞ കാർഷിക ഉൽപന്നങ്ങൾക്ക് കേരളത്തിൻറെ പൊതുസമൂഹം ഉപഭോക്താക്കളാകുന്ന അവസ്ഥയിൽ ഈ വെല്ലുവിളിയെ അതിജീവിച്ച് കുടുംബശ്രീ വനിത കർഷകരിലൂടെ നേരിട്ട് ശേഖരിക്കുന്ന കാർഷിക വിളവുകൾ കിയോസ്ക് വഴി മിതമായ നിരക്കിൽ നൽകുകയാണ് കുടുംബശ്രീ ജില്ലാ മിഷൻ ലക്ഷ്യമിടുന്നത്.

പദ്ധതി പ്രകാരം ഈ വർഷം ജില്ലയിൽ മൂന്ന് കിയോസ്കുകൾ തുടങ്ങും. ഇതിൽ ആദ്യത്തേതാണ് കുണ്ടറയിൽ തുടങ്ങിയത്. ബ്ലോക്ക് അടിസ്ഥാനത്തിലാണ് പ്രവർത്തനം. ചിറ്റുമല ബ്ലോക്കിലെ എല്ലാ പഞ്ചായത്തുകളിലെയും ജെ എൽ ജി ( ജോയിൻ്റ് ലൈയബിലിറ്റി ഗ്രൂപ്പ് - കൂട്ട് ഉത്തരവാദിത്ത സംഘം) കളുടെ ജൈവ പച്ചക്കറികൾ, പഴങ്ങൾ, കിഴങ്ങ് വർഗങ്ങൾ, മൂല്യ വർദ്ധിത ഉൽപന്നങ്ങൾ എന്നിവ കുണ്ടറ അഗ്രി കിയോസ്കിലൂടെ ജനങ്ങൾക്ക് ലഭ്യമാക്കാം. കൂടാതെ മൃഗ സംരക്ഷണ മേഖല കൃഷിയിൽ നിന്നും ലഭിക്കുന്ന മുട്ട, പാൽ എന്നിവയും വില്പനയ്ക്ക് ഒരുക്കിയിട്ടുണ്ട്. അതാത് സിഡിഎസുകൾക്കാണ് പ്രവർത്തന ചുമതല. കിയോസ്ക് നടത്തിപിന് സിഡിഎസുകളിൽ നിന്ന് നിയമിക്കുന്ന റിസോഴ്സ് പേഴ്സൺമാർക്ക് 3600 രൂപ വേതനവും പ്രതിമാസ വിറ്റുവരവിൻ്റെ മൂന്ന് ശതമാനവും ലഭ്യമാക്കും.

• Kollam

കുടുംബശ്രീ ഒരുമ ജീവൻ ദീപം ഇൻഷുറൻസ്

കുറഞ്ഞ പ്രമിയം നിരക്കിൽ മികച്ച ഇൻഷ്വറൻസ് പരിരക്ഷ ലഭ്യമാക്കുന്ന *ജീവൻ ദീപം ഒരുമ* പദ്ധതിയിൽ ചേരാൻ സുവർണ്ണാവസരം..

കുടുംബശ്രീയും ലൈഫ് ഇൻഷുറൻസ് കോർപ്പറേഷനും സംസ്ഥാന ഇൻഷുറൻസ് വകുപ്പും സംയുക്തമായി നടപ്പാക്കുന്ന പദ്ധതിയാണിത്.. അയൽക്കൂട്ട അംഗങ്ങൾ ചേർന്ന് ലിങ്കേജ് വായ്പയെടുത്ത ശേഷം ഇതിലെ ഏതെങ്കിലും ഒരംഗത്തിന് മരണം സംഭവിച്ചാൽ ആ വ്യക്തിയുടെ വായ്പാ ബാധ്യത മറ്റ് അംഗങ്ങൾക്ക് ഏറ്റെടുക്കേണ്ടി വരുന്ന സാഹചര്യമാണ് മുമ്പുണ്ടായിരുന്നത്. എന്നാൽ പദ്ധതി പ്രകാരമുള്ള ഇൻഷുറൻസ് പരിരക്ഷ ലഭിക്കുന്നതോടെ ഈ സാഹചര്യം ഒഴിവാകും. മരണമടഞ്ഞ ആൾക്ക് ലഭ്യമാകുന്ന ഇൻഷുറൻസ് തുകയിൽ നിന്നും ഈ വ്യക്തിയുടെ പേരിൽ നിലനിൽക്കുന്ന വായ്പാ തുക അയൽക്കൂട്ടത്തിന്റെ ബാങ്ക് അക്കൗണ്ടിലേക്കു നൽകും. ബാക്കി തുക മരണമടഞ്ഞ വ്യക്തിയുടെ അവകാശിക്കും ലഭിക്കും.

2020-21 സാമ്പത്തിക വർഷത്തിലാണ് ജീവൻ ദീപം ഒരുമ ഇൻഷുറൻസ് പദ്ധതി ആരംഭിച്ചത്. 

അയൽക്കൂട്ടങ്ങളിലെ ഒരംഗത്തിന് സ്വാഭാവിക മരണമോ അപകടമരണമോ സംഭവിച്ചാൽ സാമ്പത്തിക സഹായം ലഭ്യമാക്കുന്നതാണ് പദ്ധതി. അപകടത്തിൽ സ്ഥിരമായ അംഗവൈകല്യം സംഭവിച്ചാലും ഇൻഷ്വറൻസ് പരിരക്ഷ ലഭിക്കും.  

200 രൂപയാണ് വാർഷിക പ്രീമിയം. 18 മുതൽ 74 വയസു വരെയുള്ള കുടുംബശ്രീ അയൽക്കൂട്ട അംഗങൾക്ക് പദ്ധതിയിൽ അംഗമാകാം. 18നും 50നും ഇടയിൽ പ്രായമുള്ള അംഗത്തിന് സ്വാഭാവിക മരണം സംഭവിക്കുകയാണെങ്കിൽ പോളിസിയിൽ പറഞ്ഞിട്ടുള്ള അവകാശിക്ക് 2 ലക്ഷം രൂപയാണ് ലഭിക്കുക. 51-60, 61 -70, 71 -74 വരെ പ്രായമുള്ള പോളിസി ഉടമകൾക്ക് സാധാരണ മരണം സംഭവിച്ചാൽ യഥാക്രമം 80000, 30000, 25000 എന്നിങ്ങനെ പോളിസി തുക ലഭിക്കും. എല്ലാ

വിഭാഗത്തിലും പോളിസി ഉടമയ്ക്ക് അപകട മരണമോ അപകടത്തിൽ സ്ഥിരമായ അംഗവൈകല്യമോ സംഭവിച്ചാൽ പോളിസി തുകയ്ക്കൊപ്പം അപകട ആനുകൂല്യമായ 30,000 രൂപ അധികമായി ലഭിക്കും. പദ്ധതിയുടെ ഭാഗമായി സി.ഡി.എസ്തലത്തിൽ പ്രവർത്തിക്കുന്ന റിസോഴ്സ് പേഴ്സൺമാരായ ബീമ മിത്ര വഴിയാണ് അയൽക്കൂട്ട അംഗങ്ങളിൽ നിന്നുള്ള പ്രീമിയം സമാഹരണവും പുതിയ അംഗങ്ങളെ ചേർക്കുന്നതും.

ഇതു വരെ സംസ്ഥാനത്തോട്ടാകെ 11,28,381 കുടുംബശ്രീ അംഗങ്ങൾ പോളിസിയിൽ ചേർന്നിട്ടുണ്ട്... കൊല്ലം ജില്ലയിൽ കഴിഞ വർഷം 59298 പേർ അംഗങ്ങളായി..

• Poruvazhy, Sasthamcotta

കുടുംബശ്രീയുടെ ജില്ലാ ഓക്‌സെല്ലോ ക്യാമ്പയിനുള്ള ഓറിയൻ്റേഷൻ സംഘടിപ്പിച്ചു. 

കൊല്ലം: കുടുംബശ്രീ ജില്ലാ മിഷൻ്റെ ആഭിമുഖ്യത്തിൽ ജില്ലാ തല ഓക്സെല്ലോ ക്യാമ്പയിന് മുന്നോടിയായി ഓറിയൻ്റേഷൻ ക്ലാസ് നടത്തി.പൈലറ്റ് അടിസ്ഥാനത്തിൽ ക്യാമ്പയിൻ ശാസ്താംകോട്ട ബ്ലോക്കിൽ ആരംഭിക്കും. ഇതിനായുള്ള ബ്ലോക്ക് തല ഓറിയൻ്റേഷൻനാണ് നടന്നത്. സിഡിഎസ് ചെയർപേഴ്സൺമാർ, കുടുംബശ്രീ ജില്ലാ പ്രോഗ്രാം മാനേജർ പ്രിയ ടി എ, ബ്ലോക്ക് കോ ഓർഡിനേറ്റർമാർ, ഓക്സിലറി ആർ പി മാർ, ഓക്സിലറി അംഗങ്ങൾ എന്നിവരുടെ പങ്കാളിത്തമുണ്ടായിരുന്നു. കുടുംബശ്രീയുടെ ഓക്സിലറി ഗ്രൂപ്പുകളുടെ സുസ്ഥിരമായ പ്രവർത്തനത്തിനും, ശാക്തീകരണത്തിനും, പുതിയ ഗ്രൂപ്പുകൾ രൂപീകരിച്ച് അവയുടെ പ്രവർത്തനങ്ങൾ വിപുലീകരിക്കുന്നതിനുമായാണ് ക്യാമ്പയിൻ.

കുടുംബശ്രീ അംഗത്വമില്ലാത്ത 18 നും 40 നും വയസ്സിനിടയിലുള്ള യുവതികളെ ഒത്തുചേർത്ത് അയൽകൂട്ട തലത്തിൽ ഗ്രൂപ്പ് സംഘടിപ്പിക്കുകയും തുടർന്ന് വാർഡ്, പഞ്ചായത്ത് തലത്തിൽ പ്രവർത്തിക്കുന്ന കൺസോർഷ്യം രൂപീകരിക്കുന്നതിനുള്ള തയ്യാറെടുപ്പുകളും നടക്കും. അയൽക്കൂട്ട മാതൃകയിൽ ഓക്സിലറി ഗ്രൂപ്പ് പ്രവർത്തിക്കും. മീറ്റിംഗ് ചട്ടങ്ങൾ, ഫയൽ രജിസ്റ്റർ സൂക്ഷിപ്പ് എന്നിവയെക്കുറിച്ചുള്ള അവബോധം തുടങ്ങി വിവിധ പരിശീലനങ്ങൾ, കലാമേളകൾ എന്നിവ ഉൾപ്പെടുന്ന പ്രവർത്തനങ്ങൾ സംഘടിപ്പിച്ച് അംഗങ്ങളുടെ സജീവ സാന്നിധ്യം ഉറപ്പാക്കും. കൂടാതെ ഓക്സിലറി അംഗങ്ങളുടെ വരുമാന മാർഗ്ഗത്തിനായി നൈപുണ്യ വികസന പരിശീലനവും സംരംഭം തുടങ്ങാനുള്ള കൈത്താങ്ങും ചെയ്തു കൊടുക്കുന്നതിൽ കുടുംബശ്രീ ജില്ലാ മിഷൻ്റെ പിന്തുണയും സഹായവും ഉണ്ടാകും.

• Kollam

പഴമയും പുതുമയും തലമുറ സംഗമവുമായി കുടുംബശ്രീ…

കൊല്ലം: തലമുറകൾ കോർത്തിണക്കാൻ സംഗമവുമായി കുടുംബശ്രീ. മാർച്ച് 20 ലോക ഹാപ്പിനസ് ദിനത്തോടനുബന്ധിച്ച്. കുടുംബശ്രീ മിഷൻ്റെ നേതൃത്വത്തിൽ ‘ പഴമയും പുതുമയും ' തലമുറ സംഗമം സംസ്ഥാനത്തുടനീളം മാർച്ച് 10 മുതൽ വിവിധ സിഡിഎസുകളിലായി സംഘടിപിച്ചുവരുന്നു. മാർച്ച് 25 നകം എല്ലാ സിഡിഎസുകളിലും നടത്തും. വാർദ്ധക്യം ഒരു ബാധ്യതയല്ല ജീവിതാവസ്ഥയാണെന്നുള്ള ബോധ്യം, പ്രായമായവരെ സംരക്ഷിക്കേണ്ട കടമ, പുതു തലമുറയെ മനസ്സിലാക്കുക എന്നിവ മുൻനിർത്തിയാണ് ഈ പദ്ധതി ആവിഷ്കരിക്കുന്നത്. പഴയ തലമുറയും പുതിയ തലമുറയും കാഴ്ചപ്പാടുകൾ പങ്കിടുക, പഴയ തലമുറ നേരിടുന്ന പ്രശ്നങ്ങളെ കുറിച്ച് ധാരണയുണ്ടാക്കുക, പഴയ കാല കലാ സാംസ്കാരിക പ്രവർത്തനങ്ങളിൽ പുതുതലമുറയെ പങ്കാളികളാക്കുക അങ്ങനെ യുവജന തലമുറയിൽ വയോജന സൗഹൃദ അന്തരീക്ഷം വാർത്തെടുക്കുക എന്നത് ഈ പദ്ധതിയുടെ പ്രധാന ലക്ഷ്യമാണ്. കൂടാതെ വയോജന ക്ഷേമം തദ്ദേശസ്വയംഭരണ സ്ഥാപനം, കുടുംബശ്രീ തുടങ്ങിയവയുടെ പദ്ധതികളിൽ മുൻപന്തിയിലാക്കുന്നതിൻ്റെ ആവശ്യകതയും സംഗമത്തിൽ ചർച്ചാവിഷയമാകുന്നു. ഏകദിന പരിപാടിയായി സംഘടിപ്പിക്കുന്ന തലമുറ സംഗമത്തിൽ ' വയോജന സൗഹൃദ നവകേരളം ' സെമിനാർ, കലാ സാംസ്കാരിക പരിപാടികൾ എന്നിവ ഉൾപെടും. ഓരോ വാർഡിലെ 4 മുതൽ 10 ഓക്സിലറി ഗ്രൂപ്പ് അംഗങ്ങൾ വയോജന അയൽകൂട്ട അംഗങ്ങൾ എന്നിവരെ ഉൾപെടുത്തിയാണ് പരിപാടി സംഘടിപ്പിക്കുന്നത്.

• Sasthamcotta

കുടുംബശ്രീയുടെ മാതൃക സിഡിഎസ് ഇമേഴ്ഷൻ സൈറ്റ് സംസ്ഥാന തല എഴുത്ത് ശിൽപശാല സംഘടിപ്പിച്ചു 

ശാസ്താംകോട്ട: കുടുംബശ്രീ മിഷൻ്റെ നേതൃത്വത്തിൽ സംഘടന ശാക്തീകരണത്തിൻ്റെ ഭാഗമായും സിഡിസുകളുടെ സുസ്ഥിരമായ പ്രവർത്തനത്തിന് പ്രചോദനമായും സംസ്ഥാനത്ത് ഇമേഴ്‌ഷൻ സൈറ്റ് രൂപീകരികുന്നതിനുള്ള പ്രവർത്തനങ്ങൾ ആരംഭിച്ചു. കൊല്ലം ജില്ലയിലെ ശാസ്താംകോട്ടയിലാണ് ഇതിനോട് അനുബന്ധിച്ച രണ്ടാം ഘട്ടത്തിൻറെ ഭാഗമായി ത്രിദിന റസിഡൻഷ്യൽ എഴുത്ത് ശിൽപശാല സംഘടിപ്പിച്ചത്. മാർച്ച് 10 ന് തുടങ്ങി 12ന് പരിശീലനം അവസാനിച്ചു . സംസ്ഥാനത്തെ 14 ജില്ലകളിൽ നിന്നും മാസ്റ്റർ റിസോഴ്സ് പേഴ്സൺമാർ ഉൾപ്പടെ തിരഞ്ഞെടുക്കപ്പെട്ട, വിവിധ മേഖലകളിൽ വിദഗ്ധരായ റിസോഴ്സ് പേഴ്സൺമാർ പങ്കെടുത്തു. ശാസ്താംകോട്ട സിഡിഎസിൻ്റെ സഹകരണത്തോടെ നടത്തിയ ശിൽപശാല പഞ്ചായത്ത് ഹാളിലാണ് ഒരുക്കിയത്. എഴുത്ത് ശിൽപശാലയിൽ മാതൃക സിഡിഎസ്, നേതൃത്വ ഭരണം, ഭരണ നിർവ്വഹണ നയങ്ങൾ, ഇമേഴ്ഷൻ സൈറ്റ് വികസനം എന്നീ മേഖലകളിലെ പരിശീലന മെറ്റീരിയലുകൾ തയ്യാറാക്കി. പരിശീലനത്തിന് കുടുംബശ്രീ അസി ജില്ലാ മിഷൻ കോ ഓർഡിനേറ്റർ രതീഷ് കുമാർ ആർ, സംസ്ഥാന മിഷൻ ഓർഗനൈസേഷൻ അസിസ്റ്റൻ്റ് പ്രോഗ്രാം മാനേജർ മാത്യു ചാക്കോ, ജില്ലാ മിഷൻ പ്രോഗ്രാം മാനേജർ പ്രിയ ടി എ, ശാസ്താംകോട്ട സിഡിഎസ് അധ്യക്ഷ ജയശ്രീ, ബ്ലോക്ക് കോ ഓർഡിനേറ്റർ സുനിത എന്നിവരും സന്നിഹിതരായിരുന്നു.

ജില്ലയിൽ ഇമേഴ്‌ഷൻ സൈറ്റായി രൂപീകരിക്കുന്നതിന് ശാസ്താംകോട്ട സിഡിഎസ് ആണ് തിരഞ്ഞെടുത്തത്. ഇതിനെ തുടർന്ന് ശാസ്താംകോട്ട സിഡിഎസ് മാതൃക സിഡിഎസ് ആയി മാറ്റുന്നതിനുള്ള പ്രവർത്തനങ്ങളും നടക്കുന്നു.

• Ashramam Maidaan, Kollam

രുചിയുടെ മേളയൊരുക്കിയ കഫേ കുടുംബശ്രീ ഭക്ഷ്യ മേള സമാപിച്ചു 

കൊല്ലം: പത്ത് ദിവസം നീണ്ടുനിന്ന കഫേ കുടുംബശ്രീ ഇന്ത്യ ഫുഡ് കോർട്ട് ഭക്ഷണ വൈവിധ്യത്തിലൂടെയും ജനസ്വീകാര്യതയിലൂടെയും വിജയകരമായി അവസാനിച്ചു. കുടുംബശ്രീ കൊല്ലം ജില്ലാ മിഷന്റെ ആഭിമുഖ്യത്തിൽ നബാർഡിൻ്റെ സഹകരണത്തോടെ 2025 ഫെബ്രുവരി 28 ന് തുടങ്ങി കൊല്ലം ആശ്രാമം മൈതാനത്ത് ഒരുക്കിയ ഭക്ഷ്യ മേള ഇന്ത്യയുടെ സാംസ്കാരിക വൈവിധ്യവും കൊല്ലത്തിൻ്റെ പെരുമയും ഒരു കുടക്കീഴിൽ, ഭക്ഷണ വിഭവങ്ങളിലൂടെ എടുത്തു കാട്ടുന്ന വേദിയായി മാറി. 

മേളയിൽ വൻ ഹിറ്റായ അട്ടപ്പാടിയുടെ വനസുന്ദരിക്ക് ദിനംപ്രതി ആരാധകർ തേടി വന്നിരുന്നു. കേരള തനിമ അറിയിക്കുന്ന കോട്ടയത്തിൻ്റെ കപ്പ മീൻകറി, പാൽക്കപ്പ വിഭവങ്ങൾ, ഇടുക്കിയുടെ സ്വന്തം ഏഷ്യാഡ് (എല്ലും കപ്പയും), വയനാടിൻ്റെ കുട്ടി ബിരിയാണി, കണ്ണൂരിൻ്റെ തലശ്ശേരി ദം ബിരിയാണി, കാസർഗോഡിൻ്റെ പ്രത്യേക നെയ്യ് പത്തൽ ചിക്കൻ സുക്ക കോംബോ, എറണാകുളം ജില്ലയിൽ നിന്നുള്ള വിവിധതരം നെല്ലിക്ക ജ്യൂസുകൾ, പോപ്പ് കോണുകൾ, രാജസ്ഥാൻ്റെ പാവ് ബജി, വട പാവ്, ലസ്സി, ഉത്തരാഖണ്ഡിൻ്റെ മോമോസ്, നൂഡിൽസ്, ഫ്രൈഡ് റൈസ്, ഒഡീഷയുടെ സ്പെഷ്യൽ ഓംലെറ്റ്, കുങ്കുമപ്പൂ ഘീർ, ചിക്കൻ ലോലിപോപ്പ് ഇവയെല്ലാം കൊല്ലം ജനത ഏറ്റെടുത്ത് വയറും മനവും നിറയെ കഴിച്ചു. രുചി വൈവിധ്യത്തിൽ കൗതുകം കൊണ്ട് സന്ദർശിച്ചവർക്കും ഇന്ത്യ ഒട്ടാകെ രുചിക്കാൻ എത്തിയ ഭക്ഷണപ്രിയർക്കും കഫെ കുടുംബശ്രീ ഇന്ത്യ ഫുഡ് ഒരുക്കിയ കലർപ്പില്ലാത്ത വിഭവങ്ങൾ ഒരു വേറിട്ട അനുഭവം തന്നെയായിരുന്നു. പത്ത് ദിവസത്തിനൊടുവിൽ കഫെ കുടുംബശ്രീ ഭക്ഷ്യ മേള കഫേ സംരംഭകർ വാരിക്കോരിയത് 32,24,755 രൂപ. മേളയിൽ കോട്ടയത്തിലെ എ വൺ യൂണിറ്റ് 4,21,230 രൂപ കൊയ്തെടുത്തു ഏറ്റവും വിറ്റുവരവ് നേടിയ സ്റ്റാളായി. 

കഫേ കുടുംബശ്രീയ്ക്ക് അടുത്തായി ഇൻഫർമേഷൻ ആൻഡ് പബ്ലിക് റിലേഷൻസ് വകുപ്പ് മാർച്ച് ഒന്ന് മുതൽ മാർച്ച് ഒമ്പത് വരെ സംഘടിപ്പിച്ച കൊല്ലം@75 പ്രദർശന വിപണന മേളയിൽ കുടുംബശ്രീ വിപണന സ്റ്റാളുകളും സജ്ജീകരിച്ചിരുന്നു. പ്രദർശന വിപണന മേളയിൽ പതിമൂന്ന് യൂണിറ്റുകളിൽ നിന്നായി 5,52,300 രൂപ നേടി. ഇതിൽ ചവറയിലെ പവിത്രം ആക്ടിവിറ്റി ഗ്രൂപ്പാണ് വിറ്റ് വരവിൽ മുന്നിൽ വന്നത്.

സ്ത്രീ ശാക്തീകരണത്തിന്റെ ഉദാത്ത മാതൃകയായ കുടുംബശ്രീ മേളയിലൂടെ വിപണന സാധ്യതകൾക്ക് പുറമേ ഉപജീവന സാധ്യതയും ഒരുക്കി. പൂർണ്ണമായും ഹരിതചട്ടം പാലിച്ചിട്ടുള്ള ഈ ഭക്ഷ്യ മേളയുടെ ശുചിത്വം ഉറപ്പാക്കുന്നതിനുള്ള ചുമതല കൊല്ലം സിഡിഎസിലെയും കൊല്ലം ഈസ്റ്റ് സിഡിഎസിലെയും ക്ലീനിങ് സ്റ്റാഫുകൾക്കായിരുന്നു. ഇതിലൂടെ ഇവർക്കും ഒരു ഉപജീവനമാർഗമായി. ഐഫ്രം ഫാക്കൽറ്റിയുടെ നേതൃത്വത്തിനനുസൃതമായി പ്രവർത്തിച്ചു വന്നിരുന്നു ഇവർ ടേബിളിന്റെയും കസേരയുടെയും ക്രമീകരണം മുതൽ പാത്രങ്ങളുടെ വൃത്തിയിലും പരിസര ശുചിത്വത്തിലും അതീവ ശ്രദ്ധ പുലർത്തിയിരുന്നു.