• NGOU Hall, Kollam

കുടുംബശ്രീ കാർഷിക മേഖലയിലെ കമ്മ്യൂണിറ്റി റിസോഴ്സ് പേഴ്സൺമാർക്ക് ശില്പശാല സംഘടിപ്പിച്ചു...

ജില്ലയിൽ കുടുംബശ്രീയുടെ കാർഷിക മേഖലയിൽ സമഗ്രവികസനം ലക്ഷ്യമാക്കി കാർഷിക മേഖല കമ്മ്യൂണിറ്റി റിസോഴ്സ് പേഴ്സൺമാർക്ക് ഏകദിന ശിൽപ്പശാല നടത്തി. കൊല്ലം എൻ ജി ഒ യൂണിയൻ ഹാളിൽ സംഘടിപ്പിച്ചു. ഓണക്കനി, നിറപ്പൊലിമ തുടങ്ങിയ വിവിധ പദ്ധതികളുടെ വിജയകരമായ പ്രവർത്തനത്തിനുള്ള അവലോകന യോഗവും ഉൾച്ചേർത്തായിരുന്നു ശിൽപ്പശാല. പ്രാദേശിക വിപണിയുടെ സാധ്യതകൾ അനുസരിച്ച് പ്രൊഡ്യൂസർ ഗ്രൂപ്പുകൾ തുടങ്ങുന്നതും പ്രവർത്തന സജ്ജമാക്കുന്നതും, അഗ്രി കിയോസ്ക് പ്രവർത്തനങ്ങൾ എന്നിവയും ചർച്ച ചെയ്തു. കുടുംബശ്രീ അസി ജില്ലാ മിഷൻ കോ ഓർഡിനേറ്റർ മുഹമ്മദ് ഹാരിസ്, ജില്ലാ പ്രോഗ്രാം മാനേജർ ശ്രീപ്രിയ ആർ എന്നിവർ നേതൃത്വം നൽകി.

തുടർന്ന് കേരള കാർഷിക സർവ്വകലാശാല പ്രസിദ്ധീകരണങ്ങളായ കിഴങ്ങു വിളകൾ പുരയിട കൃഷിയിൽ , കർഷക കുടുംബത്തിന് ഗാർഹിക വിജ്ഞാനം , വാഴ രോഗങ്ങളും കീടങ്ങളും, വിള പരിചയം, കേരളത്തിലെ മണ്ണിനങ്ങൾ, ഔഷധ സസ്യങ്ങൾ കൃഷിയും ഉപയോഗവും, പച്ചക്കറികൃഷി ജൈവരീതിയിൽ, കൂൺകൃഷി, ജൈവ - ജീവാണു കീടനാശിനികൾ, വിവിധ തരം വളങ്ങളും അവയുടെ ഉപയോഗവും എന്നീ പുസ്തകങ്ങളുടെ വിതരണവും ചെയ്തു ..

• Ashramam Maidaan, Kollam

എന്റെ കേരളം കുടുംബശ്രീ ഫുഡ് കോർട്ട്: വിറ്റുവരവിൽ കുടുംബശ്രീ കൊല്ലാം രണ്ടാമത്...

 സംസ്ഥാന സർക്കാരിൻ്റെ നാലാം വാർഷികത്തോടനുബന്ധിച്ച് ആശ്രാമം മൈതാനത്ത് നടന്ന എന്റെ കേരളം പ്രദർശന വിപണന മേളയുടെ ഭാഗമായി കുടുംബശ്രീ കൊല്ലം ജില്ലാ മിഷൻ സംഘടിപ്പിച്ച കുടുംബശ്രീ ഫുഡ് കോർട്ടിനും കുടുംബശ്രീ വിപണന സ്റ്റാളുകൾക്കും വിറ്റുവരവിൽ മികച്ച നേട്ടം. 13 ജില്ലകളിലായി സംഘടിപ്പിച്ച എൻ്റെ കേരളം പ്രദർശന വിപണന - ഭക്ഷ്യ മേളകളിൽ കുടുംബശ്രീ കൊല്ലം രണ്ടാം സ്ഥാനത്ത് - 34,17,677 രൂപയുടെ വിറ്റുവരവോടെയാണ് ഈ നേട്ടം. ഒന്നാം സ്ഥാനം എറണാകുളം ജില്ലയ്ക്ക് - വിറ്റ് വരവ് 36,09,928 രൂപ.

2025 മെയ് 14 മുതൽ 20 വരെ സംഘടിപ്പിച്ച എൻറെ കേരളം പ്രദർശന വിപണന മേള പൊതുജനത്തിന് പ്രധാന വേദിയിൽ വേറിട്ട പരിപാടികളും കലാവിരുന്നും ഒരുക്കിയപ്പോൾ തൊട്ടടുത്തായി കുടുംബശ്രീയുടെ ഫുഡ് കോർട്ട് രുചി വിരുന്ന് ഒരുക്കി. കൊല്ലത്തിൻ്റെ രുചികൂട്ടിനപ്പുറം ഇതര ജില്ലകളുടെയും ഇതര സംസ്ഥാനങ്ങളുടെയും രുചി ഭേദങ്ങൾ കൊല്ലം ജനതയ്ക്ക് പരിചയപ്പെടുത്തി. 11 കഫെ സ്റ്റാളുകളിലും മേളയുടെ ഒരാഴ്ച്ച കാലയളവിൽ ജനങ്ങൾ തിരക്ക് കൂട്ടി. കപ്പ - മീൻറി, കപ്പ ബിരിയാണി, കാസർഗോഡ് ഒരുക്കിയ നെയ് പത്തൽ-ചിക്കൻ സൂക്ക്, കോഴിക്കോടിൻ്റെ പ്രത്യേകതയിൽ തയ്യാറാക്കിയ ചിക്കൻ വിഭവങ്ങൾ, ഹൈദരാബാദി ദം ബിരിയാണി, തമിഴ്നാട് തിരുപ്പാച്ചി ബിരിയാണി, എറണാകുളത്തിൻ്റെ വെറൈറ്റി ജ്യൂസുകൾ എന്നിവയ്ക്കെല്ലാം ആവശ്യക്കാർ ഏറെയായിരുന്നു. ഈ അവസരം സംരംഭകർക്ക് പ്രോത്സാഹനവുമായി.

ഫുഡ് കോർട്ടിന് പുറമെ കുടുംബശ്രീയുടെ വിവിധ വിപണന സ്റ്റാളുകളുടെ വൈവിധ്യമേറിയ ഉൽപന്നങ്ങളും സന്ദർശകരുടെ ശ്രദ്ധ പിടിച്ചു. പ്രദർശന വിപണന മേളയിൽ സ്റ്റാൾ 163 മുതൽ 173 വരെ കുടുംബശ്രീ സംരംഭകർ കൺസോർഷ്യം ബ്രാൻഡഡ് കറി പൗഡറുകൾ, നെറ്റിപ്പട്ടം, വോൾ ഡെക്കോർ, ഫോട്ടോ ഫ്രെയിം, ചിപ്സ്, പക്കാവട തുടങ്ങിയ സ്നാക്ക്സ്, വൈക്കോൽ ചിത്രപ്പണികൾ, തുണിത്തരങ്ങൾ, ഹൈജീൻ പ്രൊഡക്റ്റുകൾ എന്നിവ ഒരുക്കിയിരിക്കുന്നു. കൂടാതെ കുടുംബശ്രീ ഉൽപന്നങ്ങൾ വാതിൽ പടിക്കൽ ലഭ്യമാക്കുന്ന ഹോം ഷോപ്പ് പദ്ധതിയുടെ സ്റ്റാളും വിപണന മേളയിൽ സന്ദർശകർക്കായി സജ്ജമാക്കിയിരുന്നു.

കുടുംബശ്രീയുടെ ബ്രാൻഡിംഗ് തനിമയുടെ സൂചികയായി ജനങ്ങൾ ഏറ്റെടുത്തതിൻ്റെ ഫലമാണ് വിറ്റുവരവിലെ നേട്ടം. പൂർണമായും ഹരിത ചട്ടം പാലിച്ചായിരുന്നു ഫുഡ് കോർട്ടിൻ്റെയും വിപണന സ്റ്റാളുകളുടെയും നടത്തിപ്പ്.

കുടുംബശ്രീ ഒരുക്കിയ ഫുഡ് കോർട്ട് രുചിയിലും ജനശ്രദ്ധ നേടുന്നതിലും മികച്ച പ്രകടനം കാഴ്ചവെച്ചു. ഇതിലും മികവോടെ ഫുഡ് കോർട്ടുകൾ സംഘടിപ്പിക്കാൻ ഉദ്ദേശിക്കുന്നുവെന്നും കുടുംബശ്രീ ജില്ലാ മിഷൻ കോ ഓർഡിനേറ്റർ അഭിപ്രായപെട്ടു.

• Sree Narayana Guru Cultural Complex, Ashramam

അരങ്ങ് 2025 ജില്ലാ തല കലാമത്സരം സംഘടിപ്പിച്ചുഅരങ്ങ് തകർത്ത് കുടുംബശ്രീ കലാകാരികൾ

 താള മേളങ്ങളുമായി ഉത്സവ പ്രതീതിയായിരുന്നു കുടുംബശ്രീ ജില്ലാ മിഷൻ നേതൃത്വം വഹിച്ച ജില്ലാ തല അരങ്ങ് 2025 കലാമത്സരത്തിന്. കുടുംബശ്രീ അയൽക്കൂട്ട-ഓക്‌സിലറി അംഗങ്ങളുടെ സർഗാത്മകതയെ പരിപോഷിപ്പിക്കുന്നതിനും അതിനൊരു വേദിയൊരുക്കുന്നതിനുമായാണ് കുടുംബശ്രീയുടെ ആഭിമുഖ്യത്തിൽ അരങ്ങ് സംഘടിപ്പിച്ചു വരുന്നത്. ആശ്രാമം ശ്രീ നാരായണ ഗുരു സാംസ്കാരിക സമുച്ചയത്തിൽ അരങ്ങിന്റെ മുഖ്യ വേദിയിൽ "ബഹു കൊല്ലം കോർപ്പറേഷൻ ഡെപ്യൂട്ടി മേയർ എസ് ജയൻ ഉദ്ഘാടന കർമ്മം നിർവഹിച്ചു . കുടുംബശ്രീ ജില്ലാ മിഷൻ കോ ഓർഡിനേറ്റർ വിമൽ ചന്ദ്രൻ ആർ അദ്ധ്യക്ഷനായി. കുടുംബശ്രീ എഡിഎംസി മുഹമ്മദ് ഹാരിസ് സ്വാഗതവും ഡിപിഎം പ്രിയ ടി എ നന്ദിയും പറഞ്ഞു. തേവലക്കര സിഡിഎസ് ചെയർപേഴ്സ‌ൺ രതിദേവി, പത്തനാപുരം സിഡിഎസ് ചെയർപേഴ്‌സൺ തുഷാര എന്നിവർ ആശംസയർപ്പിച്ചു. മറ്റ് സിഡിഎസ് ചെയർപേഴ്‌സൺമാർ, ജില്ലാ പ്രോഗ്രാം മാനേജർമാർ, ബ്ലോക്ക് കോർഡിനേറ്റർമാർ തുടങ്ങിയവരും സന്നിഹിതരായി.

സീനിയർ ജൂനിയർ വിഭാഗങ്ങളായി തിരിച്ചാണ് മത്സരങ്ങൾ. 18 വയസ്സ് മുതൽ 40 വയസ്സ് വരെ അംഗങ്ങൾ ജൂനിയർ വിഭാഗത്തിലും 40 വയസ്സിന് മുകളിലുള്ളവർ സീനിയർ വിഭാഗത്തിലും. 43 മത്സര ഇനങ്ങളിൽ അംഗങ്ങൾ പങ്കെടുത്തു.

ദൃശ്യം, മുദ്ര ശ്രുതി, ചിരി, കാവ്യം, ചിത്രം എന്നീ 6 വേദികളിലായിയായിരുന്നു കലാമത്സരം. ദൃശ്യം വേദിയിൽ നാടോടി നൃത്തം അവതരണത്തോടെ മത്സരം ആരംഭിച്ചു. കേരളത്തിൻറെ തനത് പാട്ടുകൾക്കൊപ്പം ആവേശത്തോടെ യുവതികളും അമ്മമാരും മുത്തശ്ശിമാരും ആയ മത്സരാർഥികൾ ചുവട് വെച്ച് പറയുന്നു 'പ്രായം ഒരു പരിമിതിയല്ല'. സീനിയർ വിഭാഗത്തിൽ 62 കാരി സുശീലയും നാടോടി നൃത്തത്തിലെ തന്നെ മത്സരാർഥിയായിരുന്നു.

വേദിയിൽ അരങ്ങേറിയ ചവിട്ട് നാടകവും കാണികൾക്ക് വേറിട്ട ഒരനുഭവം പകർന്നു.

വേദി 4 ചിരി ' യിൽ ആനുകാലിക വിഷയങ്ങൾ ആസ്പദമാക്കി നടത്തിയ പ്രച്ഛന്ന വേഷ അവതരണങ്ങൾ കാണികളുടെ മനസ്സിൽ ചിന്തയ് വകയുണ്ടാക്കി. കുപ്പത്തൊട്ടിയിൽ നിന്നും ഭക്ഷണപൊതിയെടുത്ത് കഴിക്കാനൊരുങ്ങുന്ന ബുദ്ധിസ്ഥിരതയില്ലാത്ത ഭിക്ഷക്കാരൻ വികസനത്തിന്റെ പാതയിൽ ലോകം മുന്നേറുമ്പോൾ പാർശ്വവത്ക്കരിക്കപ്പെട്ടവർക്ക് എവിടെയാണ് സ്ഥാനം എന്ന ചോദ്യമുയർത്തുന്നു. ലഹരി ഉപയോഗം മൂലം ജീവിതത്തിന്റെ താളം തെറ്റി ക്ഷണികമായ ആനന്ദത്തിന് പിറകെ പോകുന്ന പെൺകുട്ടിയുടെ അവസ്ഥ അവതരിപ്പിച്ചതും ശ്രദ്ധേയമായി. കൂടാതെ സ്വന്തം സത്വത്തിൽ നിന്നും തികച്ചും മറ്റൊരാളായി വേദിയിൽ അവതരിക്കുകയും സഹൃദയർക്കിടയിൽ ഇറങ്ങി ആശയാവിഷ്കാരം നടത്തി രസിപ്പിച്ച് നിറകയ്യടി വാങ്ങി കുന്നത്തൂർ സിഡിഎസിൻറെ ലുട്ടാപ്പി പ്രച്ഛന്ന വേഷ മത്സരത്തിന്റെ ഹൈലൈറ്റായി.

വേദി നാലിൽ തന്നെയായിരുന്നു മൈം ഇനവും അരങ്ങേറിയത്. ശബ്ദാരവങ്ങളില്ലാതെ കുടുംബശ്രീ വനിതകൾ വരച്ചു കാട്ടി ചില നേർ ചിത്രങ്ങൾ. ജൂനിയർ വിഭാഗത്തിൽ കടക്കൽ സിഡിഎസ് ടീം സോഷ്യൽ മീഡിയ, മൊബൈൽ ഫോൺ ഭ്രമത്തെ അടിസ്ഥാനമാക്കിയാണ് വേദിയിൽ നിറഞ്ഞ് പ്രകടനം കാഴ്ചവെച്ചത്. കുളിമുറിയിലും, കിടക്കയിലും, ഭക്ഷണ മേശയിലും സർവ്വത്ര മൊബൈൽ ഫോൺ. സെൽഫി ഭ്രമം മൂത്ത് പാറപ്പുറത്ത് നിന്നും വീണ് ജീവൻ വെടിഞ്ഞവൻ്റെ ശവശരീരം കൊണ്ടുപോകുമ്പോഴും അത് ആഘോഷമാക്കി വലം വയ്ക്കുന്ന ക്യാമറ ഫ്ലാഷുകൾ. മൈം സീനിയർ വിഭാഗത്തിൽ കൊല്ലം സിഡിഎസിൽ നിന്നും അംബികയും സംഘവും ' പ്രാചീനകാലം മുതൽ ആധുനിക കാലം വരെ എന്ന പ്രമേയത്തിലൂടെ മനുഷ്യൻ്റെ കാലചക്രം  കാണികൾക്ക് അവതരിപ്പിച്ചു. കുരങ്ങുകളുടെ പിൻഗാമിയായി വന്ന, പച്ച മാംമസ ഭക്ഷിച്ചിരുന്ന മനുഷ്യൻ തീ കണ്ടെത്തുന്നു. തുടർന്ന് കൃഷിയിലേക്ക് ഇറങ്ങുന്നു. എന്നാൽ മനുഷ്യൻ്റെ അത്യാഗ്രഹത്തിന് മനുഷ്യജീവിന്റെ തന്നെ വില കൊടുക്കേണ്ടി വരുന്നു. വയലുകൾ നികത്തി അംബരചുംബികളൾ വരുന്നു. പ്രളയം വന്ന് മനുഷ്യചരാചരങ്ങളെ തുലയ്ക്കുന്നു. മനുഷ്യൻ വലിയ വില കൊടുക്കേണ്ടി വരുന്നു.

സമാപന സമ്മേളനം

അരങ്ങ് 2025 ജില്ലാതല മത്സരത്തിൻ്റെ സമാപന സമ്മേളനം "ബഹു ഇരവിപുരം എംഎൽഎ എം നൗഷാദ് ഉദ്ഘാടനം ചെയ്തു". തുടർന്ന് സമ്മാനദാനവും നടത്തി.

72 പോയിൻ്റോടുകൂടി കുന്നത്തൂർ സിഡിഎസ് ഓവറോൾ ചാമ്പ്യനായി. കടക്കൽ സിഡിഎസ് 36 പോയിൻറ്റുമായ് റണ്ണറപ്പായി... മൂന്നാം സ്ഥാനത്ത് 31 പോയിൻ്റുമായി പന്മന സിഡിഎസ് ഇടംപിടിച്ചു. "ജില്ലാ പഞ്ചായത്ത് വൈസ് പ്രസിഡൻ്റ് ശ്രീജ ഹരീഷ് സമാപന സമ്മേളനത്തിന് അധ്യക്ഷത വഹിച്ചു." എഡിഎംസി ഹാരിസ്, ഡിപിഎം പ്രിയ എന്നിവർ സംസാരിച്ചു.ജില്ലാ തല ജേതാക്കൾ കോട്ടയത്ത് അതിരമ്പുഴയിൽ 2025 മെയ് 26,27,28 തീയതികളിൽ നടക്കുന്ന സംസ്ഥാന തല അരങ്ങിൽ മാറ്റുരയ്ക്കും..നുഷ്യപുരോഗതിയുടെ

• Ashramam

രുചിയുടെ കലവറയൊരുക്കി കുടുംബശ്രീ ഫുഡ് കോർട്ട്

 നാവിൽ കൊതിയൂറും വിഭവങ്ങളുമായി കുടുംബശ്രീയുടെ ഫുഡ് കോർട്ട് ആശ്രാമം മൈതാനിയിൽ തുടക്കമായി. സംസ്ഥാന സർക്കാരിന്റെ നാലാം വാർഷികത്തോടനുബന്ധിച്ച് എന്റെ കേരളം പ്രദർശന വിപണന മേളയുടെ ഭാഗമായി 2025 മെയ് 14 മുതൽ 20 വരെ ഫുഡ് കോർട്ട് സംഘടിപ്പിക്കുന്നു. ഇന്ത്യയുടെ വ്യത്യസ്ത രുചികൾ ഇനി ഏഴ് ദിവസം കൊല്ലം ജനതയ്ക്ക് ആസ്വദിക്കാം. കുടുംബശ്രീ ജില്ലാ മിഷൻ കോ ഓർഡിനേറ്റർ വിമൽ ചന്ദ്രൻ ആർ, അസി ജില്ലാ മിഷൻ കോ ഓർഡിനേറ്റർ ഉന്മേഷ് ബി, ജില്ലാ പ്രോഗ്രാം മാനേജർമാരായ മീന മുരളീധരൻ, വിഷ്ണു പ്രസാദ്, ആതിര കുറുപ്പ്, ബ്ലോക്ക് കോ ഓർഡിനേറ്റർമാർ, എം ഇ സി മാർ എന്നിവരും സന്നിഹിതരായിരുന്നു.

10 രൂപയ്ക്ക് ചായ, 15 രൂപയ്ക്ക്‌ ചുക്ക് കാപ്പി തുടങ്ങി വിവിധയിനം അട, ബജി, മറ്റ് കടികൾ എന്നിവ കൊല്ലം കുടുംബശ്രീ യൂണിറ്റുകൾ ഒരുക്കുന്നു. കൂടാതെ 80 രൂപയ്ക്ക് കപ്പ പുഴുക്ക് - ചമ്മന്തി കോംബോ, 150 രൂപയ്ക്ക് കപ്പ ബിരിയാണി എന്നിവയും വിൽക്കുന്നു.

കുടുംബശ്രീ ഫുഡ് കോർട്ടുകളിലൂടെ ജനകീയമായ അട്ടപ്പാടി തനത് രുചിക്കൂട്ട് വനസുന്ദരിയാണ് പ്രധാന ആകർഷണം.

കാസർഗോഡിന്റെ നെയ്യത്തലും ചിക്കൻ സൂക്കയും, കോഴിക്കോടിൻ്റെ സ്വാദ് അറിയിക്കുന്ന മലബാർ സ്മാക്സ്, കരിഞ്ചീരക കോഴി പൊരിച്ചത്, 150 രൂപയുടെ ചിക്കൻ പൊട്ടിത്തെറിച്ചത്, വയനാട് സ്പെഷ്യൽ പോത്തിൻ കാല്, നെയ് ചോറ് ബീഫ് കോംബോ, ചിക്കൻ 65 തുടങ്ങിയ വിഭവങ്ങളും ഫുഡ് കോർട്ടിൽ വന്നാസ്വദിക്കം. വേനൽക്കാല ചൂടിൽ നിന്നാശ്വാസം നൽകുവാൻ എറണാകുളം സ്റ്റാളിൻ്റെ വിവിധ ജ്യൂസുകളും സജ്ജീകരിച്ചിട്ടുണ്ട്. ഇതര സംസ്ഥാനങ്ങളിൽ നിന്നുള്ള വിഭവങ്ങളും മേളയ്ക്ക്മാറ്റ് കൂട്ടുന്നു. ആന്ധ്രാ പ്രദേശിന്റെ സ്പെഷ്യൽ ബിരിയാണി, ചിക്കൻ പക്കോട, ഒഡീഷയുടെ ചിക്കൻ വിഭവങ്ങൾ എന്നീ രുചഭേദങ്ങളും കൊല്ലാം ജനതയ്ക്ക് പരിചയപ്പെടാം.

രാവിലെ 9 മണി മുതൽ രാത്രി 10 മണി വരെയാണ് പ്രവർത്തനം. ഫുഡ് കോർട്ടിന് പുറമെ കുടുംബശ്രീയുടെ വിവിധ വിപണന സ്റ്റാളുകളുമുണ്ട്. പ്രദർശന വിപണന മേളയിൽ സ്റ്റാൾ 163 മുതൽ 173 വരെ കുടുംബശ്രീ സംരംഭകർ കൺസോർഷ്യം ബ്രാൻഡഡ് കറി പൗഡറുകൾ, നെറ്റിപ്പട്ടം, വോൾ ഡെക്കോർ, ഫോട്ടോ ഫ്രെയിം, ചിപ്സ്, പക്കാവട തുടങ്ങിയ സ്നാക്ക്സ്', വൈക്കോൽ ചിത്രപ്പണികൾ, തുണിത്തരങ്ങൾ, ഹൈജീൻ പ്രൊഡക്റ്റുകൾ എന്നിവ ഒരുക്കിയിരിക്കുന്നു. കൂടാതെ കുടുംബശ്രീ ഉൽപന്നങ്ങൾ വീട്ടുപടിക്കൽ ലഭ്യമാക്കുന്ന ഹോം ഷോപ്പ് പദ്ധതിയുടെ സ്റ്റാളും വിപണന മേളയിലുണ്ട്.

• Kunnicode

പത്തനാപുരം - വെട്ടിക്കവല ബ്ലോക്ക് ക്ലസ്റ്റർ തല അരങ്ങ് 2025 : തകർത്താടി കുടുംബശ്രീ കലാകരികൾ

കപ്പടിച്ച് പട്ടാഴി നോർത്ത് സിഡിഎസ്

 കുടുംബശ്രീ അയൽക്കൂട്ട ഓക്‌സിലറി അംഗങ്ങളുടെ സർഗാത്മക കഴിവുകൾ പരിപോഷിപ്പിക്കുന്നതിനായുള്ള അരങ്ങ് കലാമത്സരം സംഘടിപ്പിച്ചു. പത്തനാപുരം - വെട്ടിക്കവല ബ്ലോക്ക് ക്ലസ്റ്റർ തല അരങ്ങ് വിളക്കുടി ഗ്രാമ പഞ്ചായത്ത് പ്രസിഡൻ്റ് റജീന തോമസ് ഉദ്ഘാടനം ചെയ്തു. ഗ്രാമപഞ്ചായത്ത് അംഗങ്ങളായ എൻ അനിൽകുമാർ, സുനി സുരേഷ്, വെട്ടിക്കവല സിഡിഎസ് ചെയർപേഴ്സൺ ബിന്ദു അരവിന്ദ്, കുടുംബശ്രീ അസി ജില്ലാ മിഷൻ കോ ഓർഡിനേറ്റർ മുഹമ്മദ് ഹാരിസ് എന്നിവർ ആശംസകൾ നേർന്നു. തലവൂർ സിഡിഎസ് ചെയർപേഴ്‌സൺ ഉഷ വിക്രമൻ നന്ദി അറിയിച്ചു.

സമാപന സമ്മേളനത്തിൻ്റെ ഉദ്ഘാടന കർമ്മവും സമ്മാന ദാനവും ബഹു ഗതാഗത വകുപ്പ് മന്ത്രി കെ ബി ഗണേഷ് കുമാർ നിർവഹിച്ചു. വിളക്കുടി ഗ്രാമപഞ്ചായത്ത് പ്രസിഡൻറ് റജീന തോമസ് അധ്യക്ഷത വഹിച്ച ചടങ്ങിൽ വിളക്കുടി സിഡിഎസ് ചെയർപേഴ്‌സൺ ശ്രീജ ജി സ്വാഗതം പറഞ്ഞു. മേലില ഗ്രാമപഞ്ചായത്ത് പ്രസിഡൻറ് എബി ഷാജി, വിളക്കുടി ഗ്രാമപഞ്ചായത്ത് അംഗങ്ങളായ ഷാഹുൽ കുന്നിക്കോട്, എൻ അനിൽകുമാർ, സിഡിഎസ് ചെയർപേഴ്‌സൺമാർ എന്നിവർ ആശംസകൾ നേർന്നു. ജില്ലാ പ്രോഗ്രാം മാനേജർ ആതിര കുറുപ്പ് നന്ദി രേഖപ്പെടുത്തി. ജില്ലാ പ്രോഗ്രാം മാനേജർ അരുൺ രാജ്, ബ്ലോക്ക് കോ ഓർഡിനേറ്റർമാർ, ആർ പി മാർ എന്നിവരും സന്നിഹിതരായിരുന്നു.

48 പോയിന്റുകളോടെ ഓവറോൾ സ്ഥാനം നേടി പട്ടാഴി നോർത്ത് സിഡിഎസ്. പിറകെ 36 പോയിൻ്റുമായി റണ്ണർ അപ്പ് സ്ഥാനത്തേക്ക് പത്തനാപുരം സിഡിഎസ് വന്നു. 28 പോയിന്റുമായി ഉമ്മന്നൂർ സിഡിഎസും പിറവന്തൂർ സിഡിഎസും മൂന്നാം സ്ഥാനം പങ്കിട്ടു.

നടനം, ശ്രുതി, രചന എന്നീ മൂന്ന് വേദികളിലായി 31 മത്സരങ്ങൾ സംഘടിപ്പിച്ചു. പ്രധാന വേദിയായ നടനത്തിൽ നാടോടി നൃത്തം, നാടകം, ഒപ്പന, പ്രച്ഛന്ന വേഷം തുടങ്ങിയ 11 സ്റ്റേജ് ഇനങ്ങൾ കാണിക്കൾക്ക് കാഴ്ചവെച്ചു. ശ്രുതി, രചന വേദികളിൽ ലളിത ഗാനം, കഥാ രചന, കവിത പാരായണം, ചിത്ര രചന തുടങ്ങിയ ഇനങ്ങൾ നടന്നു. കുടുംബശ്രീ അംഗങ്ങൾ ഉൾപ്പടെ 369 പേർ പരിപാടിയിൽ പങ്കെടുത്തു.

• Karavaloor

കലാ ശോഭയിൽ അഞ്ചൽ പുനലൂർ ബ്ലോക്ക് ക്ലസ്റ്റർ അരങ്ങ് : വിജയകിരീടം ചൂടി കരവാളൂർ സിഡിഎസ്

കുടുംബശ്രീയുടെ 27 ാം വാർഷികത്തിനോട് അനുബന്ധിച്ച് സംഘടിപ്പിക്കുന്ന അരങ്ങ് 2025 അഞ്ചൽ പുനലൂർ ബ്ലോക്ക് ക്ലസ്റ്റർ തലം കലാമത്സരം 2025 മെയ് 9 ന് വെഞ്ചേമ്പ് എൻ ജി പി എം സ്കൂളിൽ നടന്നു. ബഹു ജില്ലാ പഞ്ചായത്ത് മെമ്പർ കെ ഷാജി ഉദ്ഘാടനം നിർവഹിച്ചു. കരവാളൂർ ഗ്രാമപഞ്ചായത്ത് പ്രസിഡന്റ് ആർ.ലതികമ്മ സമാപന സമ്മേളനം ഉദ്ഘാടനം ചെയ്ത് സമ്മാനദാനവും നിർവഹിച്ചു.അലയമൺ ഗ്രാമപഞ്ചായത്ത് പ്രസിഡൻ്റ് ജയശ്രീ എം അധ്യക്ഷത വഹിച്ചു. പുനലൂർ നഗരസഭ ക്ഷേമകാര്യ സ്റ്റാന്റിംഗ് കമ്മിറ്റി ചെയർമാൻ അഡ്വ. പി എ അനസ്, കരവാളൂർ ഗ്രാമപഞ്ചായത്ത് മെമ്പർ സെക്രട്ടറി കല, അസി ജില്ലാ മിഷൻ കോ ഓർഡിനേറ്റർ ഉന്മേഷ് ബി എന്നിവർ ആശംസകൾ അർപ്പിച്ചു. സിഡിഎസ് അധ്യക്ഷർ, സിഡിഎസ് അംഗങ്ങൾ, ജില്ലാ പ്രോഗ്രാം മാനേജർമാരായ സിന്ധുഷമോൾ കെ, അരുൺ രാജ് ഡി എസ്, ബ്ലോക്ക് കോഓർഡിനേറ്റർമാർ, ആർ പി മാർ, എം ഇ സി മാർ എന്നിവരും സന്നിഹിതരായിരുന്നു.

49 പോയിന്റുകളോടെ കരവാളൂർ സിഡിഎസ് ഓവറോൾ ചാമ്പ്യൻഷിപ്പ് കരസ്ഥമാക്കിയപ്പോൾ 41 പോയിന്റോടുകൂടി ഇടമുളക്കൽ സിഡിഎസ് റണ്ണർ അപ്പ് ആയി. 4 വേദികളിലായി നടത്തിയതിൽ 2 വേദികൾ സ്റ്റേജിനങ്ങൾക്കും 2 വേദികൾ രചന, ചിത്രരചന തുടങ്ങിയ സ്റ്റേജിതര ഇനങ്ങൾക്കുമായി സജ്ജമാക്കി. ആകെ 36 മത്സര ഇനങ്ങൾ ഉണ്ടായിരുന്നു. 9 സിഡിഎസുകളിൽ നിന്നും 55 മത്സരാർഥികൾ പങ്കെടുത്തു. 338 കുടുംബശ്രീ അംഗങ്ങളുടെ സാന്നിധ്യം കലാമത്സരത്തിലുണ്ടായിരുന്നു.

• Mynagappally, Kollam

ശാസ്താംകോട്ട - ചിറ്റുമല അരങ്ങ് സംഘടിപ്പിച്ചു:

സർഗോത്സവ വേദിയിൽ പോയിൻ്റ് വാരി കുന്നത്തൂർ സിഡിഎസ്.

മൈനാഗപ്പള്ളി: കുടുംബശ്രീ സംഘടിപ്പിക്കുന്ന അരങ്ങ് 2025 സർഗ്ഗോത്സവം ശാസ്താംകോട്ട - ചിറ്റുമല ബ്ലോക്ക് ക്ലസ്റ്റർ തലത്തിന് മൈനാഗപ്പള്ളി മിലാദി ഷെരിഫ് ഗേൾസ് ഹൈസ്കൂൾ വേദിയായി. വിളംബരഘോഷ യാത്രയുടെ പ്രചാരണത്തിന്റെ ഗാംഭീര്യത്തോടെയായിരുന്നു കുലാമത്സരം തുടക്കം കുറിച്ചത് . ബഹു കുന്നത്തൂർ നിയോജക മണ്ഡലം എം എൽ എ കോവൂർ കുഞ്ഞുമോൻ ഉദ്ഘാടനം ചെയ്തു സമാപന സമ്മേളന ചടങ്ങിൽ ബഹു മൈനാഗപ്പളളി ഗ്രാമപഞ്ചായത്ത് പ്രസിഡൻ്റ് വർഗീസ് തരകൻ അധ്യക്ഷത വഹിച്ചു. കുടുംബശ്രീ ജില്ലാ മിഷൻ കോ ഓർഡിനേറ്റർ വിമൽ ചന്ദ്രൻ ആർ സ്വാഗതം പറഞ്ഞു. ശാസ്താംകോട്ട ബ്ലോക്ക് പഞ്ചായത്ത് മെമ്പർ വൈ ഷാജഹാൻ, കുന്നത്തൂർ ഗ്രാമ പഞ്ചായത്ത് പ്രസിഡൻ്റ് കെ വത്സല കുമാരി, ശാസ്താംകോട്ട ഗ്രാമ പഞ്ചായത്ത് പ്രസിഡന്റ് ആർ ഗീത,

മുൻ പ്രസിഡന്റ് സേതുലക്ഷ്മി, ഗ്രാമ പഞ്ചായത്ത് അംഗങ്ങളായ ലാലി ബാബു ൽ, ഷിജിന നൗഫൽ, റാഫിയ നവാസ്, അസി ജില്ലാ മിഷൻ കോ ഓർഡിനേറ്റർ രതീഷ് കുമാർ ആർ, വിവിധ സിഡിഎസ് ചെയർപേഴ്സൺമാർ, പഞ്ചായത്ത് പ്രതിനിധികൾ തുടങ്ങിയവർ ആശംസകൾ നേർന്ന് സംസാരിച്ചു. മൈനാഗപ്പള്ളി സിഡിഎസ് ചെയർപേഴ്‌സൺ അമ്പിളി അജിത്ത് കൃതജ്ഞത അർപ്പിച്ചു. ജില്ലാ പ്രോഗ്രാം മാനേജർമാരായ ശ്രീപ്രിയ ആർ, സ്റ്റെഫീന സ്റ്റാൻലി, ബ്ലോക്ക് കോ ഓർഡിനേറ്റർമാർ എന്നിവരും സന്നിഹിതരായിരുന്നു.

14 സിഡിഎസുകളിൽ നിന്നും 180 അയൽക്കൂട്ട ഓക്സിലറി അംഗങ്ങൾ പങ്കെടുത്തു.

ജൂനിയർ സീനിയർ വിഭാഗങ്ങളായി തിരിച്ച 34 ഇനങ്ങളിൽ സജീവ പങ്കാളിത്തം ഉറപ്പാക്കി കുടുംബശ്രീ അംഗങ്ങൾ.

29 ഇനങ്ങളിൽ പങ്കെടുത്ത് കുന്നത്തൂർ സിഡിഎസ് 162 പോയിൻ്റുകൾ വാരിക്കോരി ഓവറോൾ സ്ഥനത്തിന് അർഹരായി. റണ്ണർ അപ്പായ ശാസ്താംകോട്ട സിഡിഎസ് 108 പോയിന്റുകൾ നേടി.

ചിലങ്ക , രാഗം, നിശാഗന്ധി, നിലാവ്, നിർമാതളം എന്നീ വേദികളിലായി കലാ മത്സരം നടന്നു.

• Collectorate, Kollam

കുടുംബശ്രീ ലിയോറ ഫെസ്റ്റ് സംഘടിപ്പിച്ചു : കളക്ടറുമായി സംവദിച്ച് കുടുംബശ്രീ ബാല സഭ കുട്ടികൾ

കുടുംബശ്രീ ജില്ലാ മിഷന്റെ നേതൃത്വത്തിൽ ജില്ലയിലെ കുടുംബശ്രീ ബാലസഭാ കുട്ടികൾക്കായുള്ള ജില്ലാതല ത്രിദിന റസിഡൻഷ്യൽ സമ്മർ ക്യാമ്പ് ബാലസഭ മൈൻഡ് ബ്ലോവേഴ്സ് ലിയോറ ഫെസ്റ്റ് സംഘടിപ്പിച്ചു. 2025 മെയ് 6 ന് കൊട്ടാരക്കര സി എച് ആർ ഡി യിൽ തുടങ്ങിയ ക്യാമ്പ് മെയ് 9 കൊല്ലം കളക്ടറേറ്റിൽ ആണ് അവസാനിച്ചത്. കുട്ടികളുടെ വ്യത്യസ്ത മേഖലയിലെ അഭിരുചി തിരിച്ചറിയുന്നതിനും, സർഗ്ഗ വാസനകൾ വികസിപ്പിക്കുക, പുതിയ ആശയങ്ങൾ കണ്ടെത്തുന്നതിനുവേണ്ടി അവരെ പ്രാപ്തരാക്കുക എന്നീ ലക്ഷ്യങ്ങളാണ് ലിയോറാ ഫെസ്റ്റിലൂടെ ലക്ഷ്യമിട്ടിരുന്നത്. തീയേറ്റർ വർക്ക്ഷോപ്പ്, ശാസ്ത്ര മാജിക്, കുട്ടികളും ധനകാര്യ മാനേജ്മെന്റ്, സൈബർ ക്രൈം, ലഹരിവിരുദ്ധ പ്രവർത്തനങ്ങൾ, നേതൃത്വപാടവം തുടങ്ങി വിവിധ വിഷയങ്ങളിൽ ക്യാമ്പിൽ പരിശീലനം നൽകി. സി.ഡി.എസ് - ബ്ലോക്ക്‌ തലങ്ങളില്‍ നിന്നും തിരഞ്ഞെടുത്ത 50 കുട്ടികളാണ് ക്യാമ്പില്‍ പങ്കെടുത്തിരുന്നത്. ഇവര്‍ക്കൊപ്പം രക്ഷിതാക്കളും ജില്ലാ കലക്ടറുടെ ചേമ്പറിലെത്തി. ബഹുകൊല്ലം ജില്ലാ കളക്ടർ ശ്രീ എൻ ദേവീദാസ് ഐ എ എസ് അവസാന ദിനം കുട്ടികളോടൊപ്പം ഒരു മണിക്കൂർ നേരം ചെലവഴിച്ചു. ബാലസഭ കുട്ടികൾ കളക്ടറുമായി സംവദിക്കുകയും സമ്മർ ക്യാമ്പ് വേളയിൽ കുട്ടികൾ തയ്യാറാക്കിയ ' ലിയോറ – മൈ ഡ്രീം ' പുസ്തകം പ്രകാശനവും ചെയ്തു. കൂടാതെ പാട്ട്,ഡാൻസ് ഏകാഭിനയം തുടങ്ങിയ കലാപ്രകടനങ്ങളും നടത്തി. തുടർന്ന് ലഹരി ഉപയോഗവ്യാപനം, അലക്ഷ്യമായി മാലിന്യം വലിച്ചെറിയുന്നത് എന്നിവയ്ക്കെതിരെ ശക്തമായ സന്ദേശം നൽകുകയും ചെയ്തു. 

എ.ഡി.എം ശ്രീ ജി നിർമ്മൽകുമാർ, കുടുംബശ്രീ ജില്ലാ മിഷൻ കോ ഓർഡിനേറ്റർ ശ്രീ വിമൽ ചന്ദ്രൻ ആർ, അസി. ജില്ലാ മിഷൻ കോ ഓർഡിനേറ്റർമരായ ശ്രീമതി അനീസ എ, ശ്രീ മുഹമ്മദ് ഹാരിസ്, ജില്ലാ പ്രോഗ്രാം മാനേജർമാരായ ശ്രീമതി സിന്ധുഷ, ശ്രീ വിഷ്ണു പ്രസാദ്, ജില്ലാ ആർ പി മാരായ ശ്രീമതി ഷീന, ശ്രീ അരുൺ കൃഷ്ണൻ, മൈൻഡ് ബ്ലോവേഴ്‌സ് ആർ പി മാരായ ശ്രീമതി നസീമ, ശ്രീമതി ലത പി എന്നിവരും സന്നിഹിതരായിരുന്നു. സംസ്ഥാന ആർ പി മാരായ ശ്രീ സജീവ് പാർവ്വതി, ശ്രീ ജോൺ കെ അധ്യാപകരായ ശ്രീ ബാലമുരളി, ശ്രീ സുഭാഷ് എന്നിവർ ക്യാമ്പ് ക്ലാസുകൾക്ക് നേതൃത്വം നൽകി.

• Kerala

കുടുംബശ്രീ സംസ്ഥാന അവാർഡ് ബഹു. തദ്ദേശ സ്വയംഭരണ മന്ത്രി ശ്രീ എം ബി രാജേഷ് പ്രഖ്യാപിച്ചു. 17 വിഭാഗങ്ങളിലായി 1,2,3 സ്ഥാനങ്ങളിൽ 51 ജേതാക്കൾക്ക് ക്യാഷ് പ്രൈസും ട്രോഫിയു സർട്ടിഫിക്കറ്റും സമ്മാനിക്കും.

കൊല്ലം ജില്ലയ്ക്ക് മൂന്ന് വിഭാഗങ്ങളിൽ മികവ് 

മികച്ച കാർഷികേതര ഉപജീവനം -  മൂന്നാം സ്ഥാനം - ശാസ്താംകോട്ട സിഡിഎസ് 

മികച്ച ജില്ല മിഷൻ - ഒന്നാം സ്ഥാനം - കൊല്ലം ജില്ലാ മിഷൻ 

മികച്ച പബ്ലിക് റിലേഷൻസ് പ്രവർത്തനങ്ങൾ നടത്തിയ ജില്ല - ഒന്നാം സ്ഥാനം - കൊല്ലം ജില്ല

• Vettamukku Junction, Panmana

രുചിനിറയ്ക്കും പ്രീമിയം ഫുഡുമായി കുടുംബശ്രീ ; കൊല്ലം വെറ്റമുക്ക് ജംഗ്ഷനിൽ കഫേ കുടുംബശ്രീ പ്രീമിയം റെസ്റ്റോറന്റിന് തുടക്കം 

പൊതുജനങ്ങള്‍ക്ക് എല്ലാവിധ നൂതന സൗകര്യങ്ങളും ലഭ്യമാക്കുന്ന കുടുംബശ്രീയുടെ കഫേ കുടുംബശ്രീ പ്രീമിയം റെസ്റ്റോറന്റ് ശൃംഖലയുടെ ഭാഗമായി കൊല്ലം ജില്ല പന്മന ഗ്രാമപഞ്ചായത്തിലെ വെറ്റമുക്ക് ജംഗ്ഷനിൽ ജില്ലയിലെ പ്രഥമ പ്രീമിയം കഫെയ്ക്ക് തുടക്കമായി. ബഹു ധനകാര്യ വകുപ്പ് മന്ത്രി കെ എൻ ബാലഗോപാൽ ഉദ്ഘാടനം നിർവഹിച്ചു. ബഹു ചവറ നിയോജക മണ്ഡലം എം എൽ എ ഡോ സുജിത് വിജയൻപിള്ള അധ്യക്ഷത വഹിച്ചു. കുടുംബശ്രീ ജില്ലാ മിഷൻ കോ ഓർഡിനേറ്റർ വിമൽചന്ദ്രൻ ആർ സ്വാഗതം ആശംസിച്ചു. ബഹു ജില്ലാ പഞ്ചായത്ത് പ്രസിഡൻറ് ഡോ പികെ ഗോപൻ, ബഹു മത്സ്യഫെഡ് ചെയർമാൻ റ്റി മനോഹരൻ എന്നിവർ വിശിഷ്ട സാന്നിധ്യമായി. ചവറ ബ്ലോക്ക് പഞ്ചായത്ത് പ്രസിഡൻറ് സന്തോഷ് തുപ്പാശ്ശേരി, പന്മന ഗ്രാമപഞ്ചായത്ത് പ്രസിഡൻറ് ശ്രീകല പി, കൊല്ലം ജില്ലാ പഞ്ചായത്ത് മെമ്പർമാരായ അഡ്വ സി പി സുധീഷ് കുമാർ, എസ് സോമൻ, ചവറ ബ്ലോക്ക് പഞ്ചായത്ത് മെമ്പർ സീനത്ത്, പന്മന ഗ്രാമപഞ്ചായത്ത് മെമ്പർ രാജീവ് കുഞ്ഞുമണി എന്നിവർ ആശംസ പറഞ്ഞു. കുടുംബശ്രീ പി ആർ ഒ ഡോ അഞ്ചൽ കൃഷ്ണകുമാർ, പന്മന സിഡിഎസ് അധ്യക്ഷ രമ്യ സുനിത്, അസി ജില്ലാ മിഷൻ കോ ഓർഡിനേറ്റർമാരായ അനീസ എ, രതീഷ്കുമാർ ആർ, ജില്ലാ പ്രോഗ്രാം മാനേജർ വിഷ്ണു പ്രസാദ് തുടങ്ങിയവരും സന്നിഹിതരായിരുന്നു. അസി ജില്ലാ മിഷൻ കോ ഓർഡിനേറ്റർ ഉൻമേഷ് ബി നന്ദി രേഖപ്പെടുത്തി.

എല്ലാവിധ സൗകര്യങ്ങളോടുകൂടിയ പരമാവധി 82 പേർക്ക് ഒരേസമയം ഭക്ഷണം കഴിക്കാവുന്ന രീതിയിൽ ക്രമീകരിച്ച പ്രീമിയം കഫെ കൊല്ലം ജില്ലയിൽ പന്മന ഗ്രാമപഞ്ചായത്ത് കുടുംബശ്രീ സി.ഡി.എസ് പരിധിയിൽ വരുന്നു. വെജ് ഊണ്, മീൻ കറിയോടുകൂടിയ ഊണ്, സദ്യ, ബിരിയാണി കൂടാതെ അറേബ്യൻ ചൈനീസ് വിഭവങ്ങളും ഫാസ്റ്റ് ഫുഡ് വിഭവങ്ങളും പ്രീമിയം കഫെയിൽ ലഭ്യമാണ്.കൊല്ലത്തിൻ്റെ പ്രാദേശിക രുചികൾക്ക് പ്രാധാന്യം നൽകുന്ന ഭക്ഷണവിഭവങ്ങളുമുണ്ട്. അഷ്ടമുടി പ്രാച്ചിക്കറി, കണമ്പ് മപ്പാസ്, കല്ലുമ്മക്കായ മപ്പാസ്, അഷ്ടമുടി കരിമീൻ പൊള്ളിച്ചത്, ചിപ്പി റോസ്റ്റ്, കണവ 23, ചെമ്മീൻ മൽഹാർ, നാലു തരം മീനും കൊഞ്ചും ഞണ്ടും ഉൾപെടുന്ന കഫെ സ്‌പെഷ്യലായ ദേശിംഗനാട് മീൻ സദ്യ എന്നിവയാണ് പ്രീമിയം കഫേ പ്രത്യേകമായി തയ്യാറാക്കുന്നത്.

• Changankulangara, Oachira, Kollam

ഓച്ചിറ ചവറ ബ്ലോക്ക് ക്ലസ്റ്റർ അരങ്ങ് കലാമത്സരം സംഘടിപ്പിച്ചു

കുടുംബശ്രീയുടെ ഇരുപത്തിയേഴാം വാർഷികത്തോട് അനുബന്ധിച്ച് അയൽക്കൂട്ടം ഓക്സിലറി അംഗങ്ങളുടെ സർഗോത്സവം അരങ്ങ് 2025 ഓച്ചിറ ചവറ ബ്ലോക്ക് കലോത്സവം മെയ് ആറാം തീയതി ചങ്ങൻകുളങ്ങര വിവേകാനന്ദ ഹയർ സെക്കൻഡറി സ്കൂളിൽ സംഘടിപ്പിച്ചു. 

കലാ മത്സരത്തിൽ 27 പോയിൻ്റോടുകൂടെ തേവലക്കര സിഡിഎസ് ഓറൽ ചാമ്പ്യൻഷിപ്പ് കരസ്ഥമാക്കിയപ്പോൾ തൊട്ടുപിന്നാലെ 26 പോയിൻ്റുമായി പന്മന സിഡിഎസ് റണ്ണർ അപ്പായി...

വൈകുന്നേരം അഞ്ചുമണിക്ക് നടന്ന് സമാപന സമ്മേളനത്തിൻ്റെ ഉദ്ഘാടനം ബഹു കൊല്ലം ജില്ലാ പഞ്ചായത്ത് ക്ഷേമകാര്യ സ്റ്റാൻഡിങ് കമ്മിറ്റി ചെയർമാൻ അനിൽ എസ് കല്ലേലിഭാഗം നിർവഹിച്ചു. ബഹു ഓച്ചിറ ബ്ലോക്ക് പഞ്ചായത്ത് പ്രസിഡൻറ് എസ് ഗീതാ കുമാരി അധ്യക്ഷത വഹിച്ചു. കുടുംബശ്രീ അസി. ജില്ലാ മിഷൻ കോ ഓർഡിനേറ്റർ രതീഷ് കുമാർ ആർ, ബ്ലോക്ക് ഡിവിഷൻ മെമ്പർമാർ, വാർഡ് മെമ്പർമാർ, സിഡിഎസ് അധ്യക്ഷർ തുടങ്ങിയവർ ആശംസകൾ പറഞ്ഞു. ഓച്ചിറ സിഡിഎസ് അധ്യക്ഷ സുകുമാരി നന്ദി രേഖപ്പെടുത്തി.

• Chathanoor, Kollam

ഇത്തിക്കര മുഖത്തല ബ്ലോക്ക് ക്ലസ്റ്റർ തല അരങ്ങ് സംഘടിപ്പിച്ചു.

കുടുംബശ്രീ കൊല്ലം ജില്ലാ മിഷൻ്റെ ആഭിമുഖ്യത്തിൽ ഇത്തിക്കര മുഖത്തല ബ്ലോക്ക് ക്ലസ്റ്റർ അരങ്ങ് കുടുംബശ്രീ അയൽക്കൂട്ട ഓക്സിലറി കലാമേള ചാത്തന്നൂർ ഗവ ഹയർ സെക്കൻഡറി സ്കൂളിൽ സംഘടിപ്പിച്ചു. ബഹു ചാത്തന്നൂർ എംഎൽഎ ശ്രീ ജി.എസ്. ജയലാൽ ഉദ്ഘാടനം നിർവഹിച്ചു. സമാപന സമ്മേളനത്തിൻ്റെ ഉദ്ഘാടനവും സമ്മാനദാനവും കൊല്ലം ജില്ലാ പഞ്ചായത്ത് ബഹു വൈസ് പ്രസിഡൻ്റ് ശ്രീമതി ശ്രീജ ഹരീഷ് നിർവഹിച്ചു. വിവിധ പഞ്ചായത്ത് ബ്ലോക്ക് പഞ്ചായത്ത് പ്രതിനിധികൾ, സിഡിഎസ് പ്രതിനിധികൾ കുടുംബശ്രീ അസിസ്റ്റൻറ് ജില്ലാ മിഷൻ കോ ഓർഡിനേറ്റർ ശ്രീ ഉന്മേഷ് ബി, ജില്ലാ പ്രോഗ്രാം മാനേജർ പ്രിയ ടി എ, ജില്ലാ മിഷൻ അംഗങ്ങൾ എന്നിവരും സന്നിഹിതരായിരുന്നു. കലാ മത്സരത്തിൽ 13 സിഡിഎസുകളുടെ പങ്കാളിത്തം ഉണ്ടായിരുന്നു.

കലാ മത്സരത്തിൽ ചാത്തന്നൂർ സിഡിഎസ് ഓവറോൾ കിരീടം കരസ്ഥമാക്കി. റണ്ണർ അപ്പായി പരവൂർ സിഡിഎസ്

ചിലമ്പ്, നാദം, നടനം, വർണ്ണം എന്നീ 4 വേദികളിലായാണ് കലാമേള നടത്തിയത്. ശിങ്കാരിമേളം, കുച്ചിപ്പുടി, ഭരതനാട്യം, നാടകം, കവിത പാരായണം, കഥാരചന ജലച്ഛായ ചിത്രരചന, അങ്ങനെ ആകെ 36 ഇനങ്ങളിൽ 360 മത്സരാർഥികൾ കഴിവ് പ്രകടിപ്പിച്ചു...

#kudumbashree #arangu #art #music #dance

• Kareepra Grama Panchayath

സർഗ്ഗോത്സവത്തിൻ്റെ ദിനങ്ങളൊരുക്കി കുടുംബശ്രീ

കൊട്ടാരക്കര ചടയമംഗലം ക്ലസ്റ്റർ തല അരങ്ങ് സംഘടിപ്പിച്ചു

അയൽകൂട്ട ഓക്സിലറി അംഗങ്ങളുടെ മാനസിക ഉല്ലാസം മുൻനിർത്തിയും സർഗാത്മകത പരിപോഷിപ്പിക്കുന്നതിനും അത് പ്രകടിപ്പിക്കുന്നതിന് വേദിയൊരുക്കുന്നതിനുമായി കുടുംബശ്രീ കൊല്ലം ജില്ലാ മിഷൻ്റെ നേതൃത്വത്തിൽ നടത്തിവരുന്ന അരങ്ങ് ബ്ലോക്ക് ക്ലസ്റ്റർ തല സർഗ്ഗോത്സവത്തിന് തുടക്കമായി. കരിപ്ര കേന്ദ്രീകരിച്ചു സംഘടിപ്പിച്ച കൊട്ടാരക്കര - ചടയമംഗലം ബ്ലോക്ക് ക്ലസ്റ്റർ അരങ്ങിൻ്റെ ഉദ്ഘാടനം ബഹു. കൊട്ടാരക്കര ബ്ലോക്ക് പഞ്ചായത്ത് പ്രസിഡൻ്റ് ശ്രീ എ അഭിലാഷ് 2025 മെയ് 5 ന് കരീപ്ര സോപാനം ഓഡിറ്റോറിയത്തിൽ നിർവഹിച്ചു. കരീപ്ര ഗ്രാമ പഞ്ചായത്ത് പ്രസിഡൻ്റ് ശ്രീമതി എസ് എസ് സുവിധ അധ്യക്ഷത വഹിച്ചു. ജില്ലാ പഞ്ചായത്ത് അംഗം ശ്രീമതി പ്രിജി ശശിധരൻ, കരീപ്ര വൈസ് പ്രസിഡൻ്റ് ശ്രീ സി ഉദയകുമാർ, വിവിധ ബ്ലോക്ക് പഞ്ചായത്ത് അംഗങ്ങൾ, ഗ്രാമ പഞ്ചായത്ത് അധ്യക്ഷർ, സിഡിഎസ് അധ്യക്ഷർ, അസി ജില്ലാ മിഷൻ കോ ഓർഡിനേറ്റർ ശ്രീമതി അനീസ എ, ജില്ലാ പ്രോഗ്രാം മാനേജർ ശ്രീമതി ബീന ആർ, കുടുംബശ്രീ ജില്ലാ മിഷൻ അംഗങ്ങൾ, സിഡിഎസ് അംഗങ്ങൾ എന്നിവരും സന്നിഹിതരായിരുന്നു. 14 സിഡിഎസുകളിൽ നിന്നും 165 മത്സരാർഥികൾ ബ്ലോക്ക് ക്ലസ്റ്റർ തല അരങ്ങിൽ മാറ്റുരച്ചു.

കുടുംബശ്രീ സ്ത്രീകൾ തങ്ങളുടെ വ്യക്തിപരമായ ഔദ്യോഗികമായ കടമകൾക്ക് താത്കാലിക വിരാമമ്മിട്ട് വേദിയിൽ വാശിയോടെയും ആനന്ദിച്ചും മത്സരിച്ചു. കാണികൾ കൈയടിച്ചും ആരവമിട്ടും പ്രോത്സാഹിപ്പിക്കാനും മടിച്ചില്ല. ഒടുവിൽ 63 പോയിൻ്റ് വ്യക്തമായ ലീഡോടെ കടക്കൽ സിഡിഎസ് ഓവറോൾ കിരീടം കരസ്ഥമാക്കി. 52 പോയിൻ്റോടുകൂടെ കരീപ്ര സിഡിഎസ് റണ്ണർ അപ്പായി. വെളിനല്ലൂർ സിഡിഎസ് 38 പോയിൻ്റോടുകൂടെ മൂന്നാം സ്ഥാനത്തെത്തി. ഓവറോൾ നേടിയ കടക്കൽ സിഡിഎസ് 19 ഇനങ്ങളിൽ പങ്കെടുത്തു.

5 വേദികളിലായാണ് കലാമേള നടത്തിയത്. ഒന്നാം വേദി - ഷാജി എൻ കരുൺ നഗർ , രണ്ടാം വേദി - പി ജയചന്ദ്രൻ നഗർ - സോപാനം ഓഡിറ്റോറിയത്തിലും മൂന്നാം വേദി - എം ടി നഗർ - എം എൻ സ്മാരക സാംസ്കാരിക നിലയത്തിലും നാലും അഞ്ചും വേദികൾ കരീപ്ര സർക്കാർ എൽ.പി സ്കൂളിലുമായാണ് സംഘടിപ്പിച്ചത്.

മോഹിനിയാട്ടം, ഭരതനാട്യം, ഒപ്പന, ശിങ്കാരിമേളം, കഥാരചന, കവിത രചന, പ്രച്ഛന്നവേഷം, നാടകം, സംഘനൃത്തം, ലളിതഗാനം തുടങ്ങി 38 മത്സരയിനങ്ങൾ ഉണ്ടായിരുന്നു. ബ്ലോക്ക് ക്ലസ്റ്റർ വിജയികൾ ജില്ലാ തല അരങ്ങിൽ മാറ്റുരയ്ക്കും

 #Kudumbashree #Kollam #art #dance #music

• Anchukallummoodu, Kollam

പുതിയ കുടക്കീഴിൽ തണലൊരുക്കി കുടുംബശ്രീയുടെ സ്നേഹിത.

കുടുംബശ്രീയുടെ നേതൃത്വത്തിൽ സ്നേഹിത ജെൻഡർ ഹെൽപ്പ് ഡെസ്ക് ഉദ്ഘാടനം സംഘടിപ്പിച്ചു.

കുടുംബശ്രീ കൊല്ലം ജില്ലാ മിഷൻ്റെ നേതൃത്വത്തിൽ പ്രവർത്തിക്കുന്ന സ്നേഹിത ജെൻഡർ ഹെൽപ്പ് ഡെസ്ക് അഞ്ചുകല്ലുംമൂട് ജംഗ്ഷൻ രാമേശ്വരം ക്ഷേത്രത്തിനടുത്ത് മാറ്റി പ്രവർത്തനം ആരംഭിച്ചിരിക്കുന്നു. ബഹു കൊല്ലം ജില്ലാ കളക്ടർ ശ്രീ എൻ ദേവീദാസ് ഐഎഎസ് ഉദ്ഘാടനം നിർവഹിച്ച ചടങ്ങിൽ കൊല്ലം കോർപ്പറേഷൻ ആരോഗ്യ സ്റ്റാൻഡിങ് കമ്മിറ്റി ചെയർപേഴ്സൺ കുമാരി യു പവിത്ര അധ്യക്ഷത വഹിച്ചു. മുഖ്യാതിഥിയായി കെഎസ്എഫ്ഇ ചെയർമാൻ ശ്രീ കെ വരദരാജൻ പങ്കെടുത്തു. രാമൻകുളങ്ങര മരുത്തടി റോഡിൽ പ്രവർത്തിച്ചിരുന്ന സ്നേഹിത നഗരത്തിലേക്ക് കൂടുതൽ ഇറങ്ങി പ്രവർത്തിക്കുന്നതിൻ്റെ ആവശ്യത കണ്ടു കൊണ്ടാണ് അഞ്ചുകല്ലുംമൂടിലേക്ക് സ്ഥലം മാറിയത്.

2017ൽ കൊല്ലം ജില്ലയിൽ പ്രവർത്തനം ആരംഭിച്ച സ്നേഹിതയിൽ നാളിതുവരെ 2803 പരാതികളാണ് റിപ്പോർട്ട് ചെയ്തിട്ടുള്ളത്. 2768 പേർക്ക് മാനസിക പിന്തുണയും 388 പേർക്ക് താൽക്കാലിക അഭയവും നൽകുവാൻ കഴിഞ്ഞിട്ടുണ്ട്. അതിക്രമങ്ങൾക്കും പീഡനങ്ങൾക്കും വിധേയരാകുന്ന സ്ത്രീകൾക്കും 18 വയസ്സിന് താഴെയുള്ള കുട്ടികൾക്കും രാത്രി യാത്രകളിൽ ഒറ്റപെടുന്ന സ്ത്രീകൾക്കും സ്നേഹിതയുടെ സേവനങ്ങൾ ലഭ്യമാക്കുന്നു. സ്നേഹിതയുടെ പ്രവർത്തനങ്ങൾ സമൂഹത്തിന്റെ എല്ലാ തലങ്ങളിലും എത്തിക്കുന്നതിനു വേണ്ടി നിരന്തരം ക്യാമ്പയിനുകളും വിവിധ വകുപ്പുകളുമായി ചേർന്ന് സംയോജന പ്രവർത്തനങ്ങളും നടത്തിവരുന്നു. 

കുടുംബശ്രീ അസിസ്റ്റൻറ് ജില്ലാ മിഷൻ കോ ഓർഡിനേറ്റർ ശ്രീ രതീഷ് കുമാർ ആർ സ്വാഗതം ആശംസിച്ച ചടങ്ങിൽ ജില്ലാ മിഷൻ കോഡിനേറ്റർ ശ്രീ വിമൽ ചന്ദ്രൻ ആർ പദ്ധതി വിശദീകരണം നടത്തി. ജെൻഡർ വിഭാഗം ജില്ലാ പ്രോഗ്രാം മാനേജർ ശ്രീമതി ബീന ആർ യോഗത്തിന് നന്ദി രേഖപ്പെടുത്തി. സ്നേഹിത സ്റ്റാഫ്, കമ്മ്യൂണിറ്റി കൗൺസിലർമാർ, എഫ് എൻ എച് ഡബ്ലു റിസോഴ്സ് പേഴ്സൺമാർ എന്നിവർ സന്നിഹിതരായിരുന്നു.

സ്നേഹിത ഓഫീസ് : 0474-2799760

സ്നേഹിത ടോൾ ഫ്രീ നമ്പർ : 1800-425-3565

• CITU Bhavan, Kollam

സ്പന്ദനം - കാസ് അംഗങ്ങളുടെ പുസ്തകം

' ട്രയംഫ് ' പ്രകാശനം 

മോഡൽ ഗ്രാമീണ സിഡിഎസുകളുടെ ഡോക്യുമെൻ്റേഷൻൻ്റെ ഭാഗമായി പ്രസിദ്ധീകരിച്ചതാണ് പുസ്തകം.

ഇരു പുസ്തകങ്ങളും ജില്ലാ പ്ലാൻ റിവ്യൂ മീറ്റിംഗ് വേദിയിൽ പ്രകാശനം ചെയ്തു.