കുടുംബശ്രീയുടെ നേതൃത്വത്തില്‍ മലപ്പുറം ജില്ലയിലെ വേങ്ങര പഞ്ചായത്തില്‍ ഡിസംബര്‍ 22 മുതല്‍ 31 വരെ സംഘടിപ്പിക്കുന്ന ദേശീയ സരസ് മേള 2026-ന്റെ ഭാഗമായി സംഘാടക സമിതി രൂപീകരണ യോഗം തദ്ദേശസ്വയംഭരണ വകുപ്പ് മന്ത്രി കെ.എം. ഷാജി ഒക്ടോബര്‍ 24ന് ഉദ്ഘാടനം ചെയ്തു. മുഖ്യമന്ത്രി വി.ഡി. സതീശന്‍ മുഖ്യരക്ഷാധികാരിയായി ഇരുപത്തിയഞ്ചംഗ സംഘാടക സമിതി രൂപീകരിച്ചു. കൂടാതെ 15 ഉപസമിതികളും രൂപീകരിച്ചു.

സ്ത്രീ സമൂഹത്തിന്റെ അന്തസോടു കൂടിയുള്ള മുന്നേറ്റമാണ് കുടുംബശ്രീയുടെ ഇനിയുള്ള ലക്ഷ്യമെന്നും ഇതിനായി സാമൂഹ്യ പുരോഗതിക്ക് ഉതകും വിധത്തില്‍ അവരുടെ കഴിവുകളെ ഗുണപരമായി പരിവര്‍ത്തനം ചെയ്യുമെന്നും  മന്ത്രി കെ.എം ഷാജി പറഞ്ഞു. മലപ്പുറം തലപ്പാറ വലിയപറമ്പ് പുല്ലാട്ട് കണ്‍വെന്‍ഷന്‍ സെന്ററില്‍ സംഘടിപ്പിച്ച യോഗത്തില്‍ പി കെ നവാസ് എം.എല്‍.എ അധ്യക്ഷത വഹിച്ചു. കുടുംബശ്രീ എക്‌സിക്യൂട്ടീവ് ഡയറക്ടര്‍ വി. വിഘ്‌നേശ്വരി ഐ.എ.എസ് സ്വാഗതം പറഞ്ഞു. കുടുംബശ്രീ പ്രോഗ്രാം ഓഫീസര്‍ ലിഷ മോഹന്‍ എം പദ്ധതി വിശദീകരിച്ചു. 

ബ്ലോക്ക് പഞ്ചായത്ത് അസോസിയേഷന്‍ സെക്രട്ടറി പി കെ സി അബ്ദുറഹ്‌മാന്‍, ഗ്രാമപ്പഞ്ചായത്ത് അസോസിയേഷന്‍ സംസ്ഥാന സെക്രട്ടറി എന്‍.പി.മുഹമ്മദ്, ഗ്രാമപഞ്ചായത്ത് അസോസിയേഷന്‍ ജില്ലാ പ്രസിഡന്റ് മുജീബ് പുളിക്കല്‍, കോട്ടയ്ക്കല്‍ നഗരസഭാധ്യക്ഷന്‍ കെ കെ നാസര്‍, തിരൂരങ്ങാടി ബ്ലോക്ക് പഞ്ചായത്ത് പ്രസിഡന്റ് പി.കെ. അബു താഹിര്‍, താനൂര്‍ ബ്ലോക്ക് പഞ്ചായത്ത് പ്രസിഡണ്ട് നൗഷാദ് സി, ഗ്രാമപഞ്ചായത്ത് അസോസിയേഷന്‍ ജില്ലാ സെക്രട്ടറി പി ആര്‍ രോഹിത് നാഥ്, അബ്ദുറഹ്‌മാന്‍ നഗര്‍ ഗ്രാമപഞ്ചായത്ത് പ്രസിഡന്റ് ലൈല പുല്ലൂണി, വേങ്ങര ഗ്രാമപഞ്ചായത്ത് പ്രസിഡന്റ് എന്‍.ടി. അബ്ദുല്‍ നാസര്‍, മലപ്പുറം അഡീഷണല്‍ ജില്ലാ മജിസ്ട്രേറ്റ് സാദിഖ് പി.ഒ, തദ്ദേശ സ്വയംഭരണ വകുപ്പ് ജോയിന്റ് ഡയറക്ടര്‍ സിദീഖ്, ജില്ലാ പഞ്ചായത്ത് അംഗങ്ങളായ ഹനീഫ മുന്നിയൂര്‍, കെ വി മുഹമ്മദലി, വേങ്ങര ബ്ലോക്ക് പഞ്ചായത്ത് വൈസ് പ്രസിഡന്റ് ജൂസൈറ മന്‍സൂര്‍, എ ആര്‍ നഗര്‍ ഗ്രാമപഞ്ചായത്ത് വൈസ് പ്രസിഡണ്ട് മുസ്തഫ പുളിശ്ശേരി, ഗ്രാമപഞ്ചായത്ത് അംഗങ്ങളായ സഫുറ ഇ വി, വേലായുധന്‍, മുനവ്വര്‍ കെ പി, പി കെ അലി അക്ബര്‍ (മുസ്ലിം ലീഗ്), പി എ ചെറിത് (ഇന്ത്യന്‍ നാഷണല്‍ കോണ്‍ഗ്രസ്), ജയകൃഷ്ണന്‍ വി എന്‍ (ബി ജെ പി), എ ആര്‍ നഗര്‍ പഞ്ചായത്ത് സിഡിഎസ് അധ്യക്ഷ ഷെറീന. സി എന്നിവര്‍ പങ്കെടുത്തു. കുടുംബശ്രീ മലപ്പുറം ജില്ലാമിഷന്‍ കോര്‍ഡിനേറ്റര്‍ പി. ഉണ്ണികൃഷ്ണന്‍ നന്ദി പറഞ്ഞു.

കേന്ദ്ര-സംസ്ഥാന സര്‍ക്കാരുകളുടെ സംയുക്ത ആഭിമുഖ്യത്തില്‍ ഡിസംബര്‍ 22 മുതല്‍ 31 വരെയാണ് ദേശീയ സരസ് മേള സംഘടിപ്പിക്കുന്നത്. 10 ദിവസങ്ങളിലായി നടക്കുന്ന മേളയില്‍ ഇന്ത്യയിലെ വിവിധ സംസ്ഥാനങ്ങളില്‍ നിന്നുള്ള ആയിരത്തിലധികം ഗ്രാമീണ വനിതാ സംരംഭകര്‍ പങ്കെടുക്കും. ഒരുലക്ഷം ചതുരശ്രയടി വിസ്തീര്‍ണ്ണത്തിലുള്ള പന്തലില്‍ 250 ഉല്‍പ്പന്ന സ്റ്റാളുകളും അന്‍പതോളം വരുന്ന ഭക്ഷ്യ സ്റ്റാളുകളുമാണ് മേളയ്ക്കായി ഒരുക്കുന്നത്. രാജ്യത്തുടനീളമുള്ള ഗ്രാമീണ സംരംഭകരുടെ വൈവിധ്യമാര്‍ന്ന ഉല്‍പ്പന്നങ്ങള്‍, കരകൗശല-ഭക്ഷ്യ വിഭവങ്ങള്‍, ഫുഡ് കോര്‍ട്ട്, വിവിധ കലാപരിപാടികള്‍, മെഗാഷോകള്‍ തുടങ്ങിയവ മേളയുടെ പ്രധാന ആകര്‍ഷണങ്ങളായിരിക്കും. മേളയുടെ വിജയകരമായ നടത്തിപ്പിനായി വിവിധ വകുപ്പുകളുടെയും ജനപ്രതിനിധികളുടെയും ബഹുജനങ്ങളുടെയും പങ്കാളിത്തം ഉറപ്പാക്കുക, മേളയുടെ നടത്തിപ്പുമായി ബന്ധപ്പെട്ട് ഉപസമിതികളുടെ ചുമതലകള്‍ എന്നിവയും യോഗത്തില്‍ ചര്‍ച്ച ചെയ്തു.

അയല്‍ക്കൂട്ട അംഗങ്ങളുടെയും അവരുടെ കുടുംബാംഗങ്ങളുടെയും ആരോഗ്യവും ക്ഷേമവും ലക്ഷ്യമിട്ട് കുടുംബശ്രീയുടെ നേതൃത്വത്തില്‍ തിരഞ്ഞെടുത്ത 28 ബ്ളോക്കുകളില്‍ മെഡിക്കല്‍ ക്യാമ്പുകള്‍ സംഘടിപ്പിക്കുന്നു. നവംബര്‍ രണ്ടാം വാരം മെഡിക്കല്‍ ക്യാമ്പുകള്‍ ആരംഭിക്കും. അയല്‍ക്കൂട്ട കുടുംബങ്ങളില്‍ പോഷകാഹാര അവബോധം, ശുചിത്വം എന്നിവ ലക്ഷ്യമിട്ട് കുടുംബശ്രീ മുഖേന സംസ്ഥാനത്ത് നടപ്പാക്കുന്ന എഫ്.എന്‍.എച്ച്.ഡബ്ല്യൂ പദ്ധതിയുടെ ഭാഗമായാണ് ക്യാമ്പുകള്‍. തിരഞ്ഞെടുത്ത 28 മാതൃകാ ബ്ളോക്കുകളിലെ 186 സി.ഡി.എസുകള്‍ കേന്ദ്രീകരിച്ചാണ് പരിപാടി. ആരോഗ്യ കുടുംബക്ഷേമ വകുപ്പ്, ദേശീയ ആരോഗ്യ ദൗത്യം എന്നിവയുടെ സഹകരണത്തോടെയാണ് ക്യാമ്പുകള്‍ സംഘടിപ്പിക്കുന്നത്. പദ്ധതിയുടെ ഭാഗമായുള്ള തുടര്‍പരിപാടിയായി നടത്താനാണ് ഉദ്ദേശ്യം.    

സ്ത്രീകളുടെ ആരോഗ്യത്തിന് പ്രത്യേക പരിഗണന നല്‍കുന്നതിനൊപ്പം കുടുംബാംഗങ്ങള്‍ക്കും പ്രയോജനപ്പെടുന്ന രീതിയിലാണ് ക്യാമ്പുകള്‍ ക്രമീകരിക്കുന്നത്. അനീമിയ പരിശോധന, പകര്‍ച്ചവ്യാധിയല്ലാത്ത രോഗങ്ങളുടെ സ്ക്രീനിങ്ങ്, നേത്ര പരിശോധന, കാന്‍സര്‍ സ്ക്രീനിങ്ങ്, ജനറല്‍ മെഡിക്കല്‍ ചെക്കപ്പ് എന്നിവ ക്യാമ്പുകളുടെ ഭാഗമായി ലഭ്യമാക്കും. ആരോഗ്യ ബോധവല്‍ക്കരണത്തിനും ആവശ്യമായ തുടര്‍ചികിത്സയ്ക്കുള്ള റഫറല്‍ സേവനങ്ങള്‍ക്കും സൗകര്യമുണ്ടാകും. ആരോഗ്യ കുടുംബക്ഷേമ വകുപ്പ്, ദേശീയ ആരോഗ്യ ദൗത്യം എന്നിവ മുഖേന നിലവില്‍ ലഭ്യമാകുന്ന ആരോഗ്യ സേവനങ്ങള്‍ ക്യാമ്പുകള്‍ വഴി ലഭ്യമാക്കുന്നതിനും ഉദ്ദേശിക്കുന്നു. രോഗങ്ങള്‍ നേരത്തെ കണ്ടെത്തി പ്രതിരോധ പ്രവര്‍ത്തനങ്ങള്‍ ശക്തിപ്പെടുത്തുന്നതിനൊപ്പം പൊതുജനാരോഗ്യ രംഗം മെച്ചപ്പെടുത്തുന്നതിനും ഇത് സഹായകമാകും.  

തിരുവനന്തപുരം ജില്ലയില്‍ (വാമനപുരം, വെളളനാട്), കൊല്ലം(അഞ്ചല്‍, ഓച്ചിറ), പത്തനംതിട്ട(റാന്നി, പറക്കോട്), ആലപ്പുഴ(അമ്പലപ്പുഴ, ആര്യാട്), കോട്ടയം(ഏറ്റുമാനൂര്‍, വൈക്കം), ഇടുക്കി(ദേവികുളം, അഴുത), എറണാകുളം(കോതമംഗലം, വൈപ്പിന്‍), തൃശൂര്‍(മതിലകം, തളിക്കുളം), പാലക്കാട്(അട്ടപ്പാടി, മലമ്പുഴ), മലപ്പുറം(അരീക്കോട്, തിരൂരങ്ങാടി), കോഴിക്കോട്(കൊടുവള്ളി, പന്തലായനി), വയനാട്(മാനന്തവാടി,കല്‍പ്പറ്റ), കണ്ണൂര്‍(പാനൂര്‍,ഇരിട്ടി), കാസര്‍കോട്(മഞ്ചേശ്വരം, കാറഡുക്ക) എന്നീ ബ്ളോക്കുകളിലാണ് ക്യാമ്പ് സംഘടിപ്പിക്കുന്നത്.  
 

കുടുംബശ്രീ മുഖേന സംസ്ഥാനത്ത് നടപ്പാക്കുന്ന ദേശീയ ഗ്രാമീണ ഉപജീവന ദൗത്യം പദ്ധതിയുടെ കീഴിലുള്ള ഉപപദ്ധതിയാണ് എഫ്.എന്‍.എച്ച്.ഡബ്ല്യൂ പദ്ധതിയുടെ ഭാഗമായി നിലവില്‍ ആരോഗ്യവും പോഷകാഹാരവും ജലസുരക്ഷയും ശുചിത്വവും മെച്ചപ്പെടുത്തുന്നതിനായി സംസ്ഥാനത്ത് ഒട്ടേറെ ബോധവല്‍ക്കരണ പ്രവര്‍ത്തനങ്ങള്‍ നടപ്പാക്കി വരികയാണ്.

നാടിന്‍റെ തനിമയും പ്രകൃതിയുടെ നന്‍മയും ചേര്‍ത്ത് ബിന്ദുലേഖയൊരുക്കിയ രുചിക്കൂട്ടുകള്‍ക്ക് ദേശീയ വേദിയില്‍ അംഗീകാരം. കേന്ദ്ര ഗ്രാമവികസന മന്ത്രാലയത്തിന്‍റെ ആഭിമുഖ്യത്തില്‍ ആന്ധ്രാപ്രദേശിലെ വിജയവാഡയില്‍ സംഘടിപ്പിച്ച ആജീവിക ദേശീയ സരസ് മേളയിലാണ് കുടുംബശ്രീ സംരംഭക ബിന്ദുലേഖ ബെസ്റ്റ് നാച്വറല്‍ ഫുഡ് സ്റ്റാള്‍ വിഭാഗത്തില്‍ രണ്ടാം സ്ഥാനം കരസ്ഥമാക്കിയത്. രാജ്യത്തെ എല്ലാ സംസ്ഥാനങ്ങളില്‍ നിന്നും കേന്ദ്രഭരണ പ്രദേശങ്ങളില്‍ നിന്നുമുള്ള സംരംഭകര്‍ പങ്കെടുത്ത ആജീവിക ദേശീയ സരസ് മേളയില്‍ ബിന്ദുലേഖയ്ക്ക് പുരസ്കാരം ലഭിച്ചത് കേരളത്തിന്‍റെയും അഭിമാന നേട്ടമായി.
 

‘കൃഷ്ണ പിക്കിള്‍സ് ആന്‍ഡ് ഫുഡ് പ്രോഡക്ട്സ്’ എന്ന സ്വന്തം സംരംഭത്തിന്‍റെ ഭാഗമായി തയ്യാറാക്കിയ ജിഞ്ചര്‍ പൗഡര്‍, ചായ മസാല, ചട്നി പൗഡര്‍, സാമ്പാര്‍ മസാല, മുളപ്പിച്ച റാഗി, വിവിധയിനം അച്ചാറുകള്‍ തുടങ്ങി ഒട്ടേറെ ഉല്‍പന്നങ്ങളുടെ വൈവിധ്യവും രുചിയും ഗുണനിലവാരവുമാണ് അംഗീകാരം നേടിക്കൊടുത്തത്. എന്‍.ടി.ആര്‍ ജില്ലാ കളക്ടര്‍ ഡോ.ജി.ലക്ഷ്മിഷാ പുരസ്കാരം സമ്മാനിച്ചപ്പോള്‍ അത് ബിന്ദുലേഖയെന്ന സംരംഭകയുടെ അതിജീവന പോരാട്ടത്തിന് ലഭിച്ച മധുരമായി.
 

തിരുവനന്തപുരം ആര്യനാട് ശ്രീലക്ഷ്മി അയല്‍ക്കൂട്ട അംഗമാണ് ബിന്ദുലേഖ. കൊറോണക്കാലത്ത് നിലച്ചു പോയ സ്വന്തം ഗാര്‍മെന്‍റ് യൂണിറ്റിന്‍റെ നഷ്ടങ്ങളില്‍ നിന്നും കരകയറാനുള്ള നിരന്തര പരിശ്രമങ്ങളാണ് ഇപ്പോള്‍ ദേശീയ അംഗീകാരത്തിലേക്കെത്തിച്ചത്. ഇത് മൂന്നാം തവണയാണ് ബിന്ദുലേഖ ദേശീയ സരസ് മേളയില്‍ പങ്കെടുക്കുന്നത്. പുരസ്കാരം ലഭിക്കുന്നത് ആദ്യമാണ്. വ്യക്തിഗത നേട്ടത്തിനപ്പുറം കുടുംബശ്രീയുടെ സംരംഭ മുന്നേറ്റത്തിനുള്ള അംഗീകാരം കൂടിയാണ് ഈ പുരസ്കാരം.
 

പ്രാദേശികമായി ലഭിക്കുന്ന വിഭവങ്ങളെ മൂല്യവര്‍ധിത ഉല്‍പന്നങ്ങളാക്കി മാറ്റി വിപണിയിലെത്തിക്കുന്നതിലൂടെ സ്ത്രീകള്‍ക്ക് മികച്ച വരുമാന മാര്‍ഗം കണ്ടെത്താനാകുമെന്ന് ബിന്ദുലേഖയുടെ നേട്ടം തെളിയിക്കുന്നു. കുടുംബശ്രീക്കൊപ്പം, മിത്ര നികേതന്‍, വനിതാ വികസന കോര്‍പ്പറേഷന്‍ എന്നിവിടങ്ങളില്‍ നിന്നും പിന്തുണ ലഭിക്കുന്നു. നിലവില്‍ തിരുവനന്തപുരം ജില്ലയിലെ വിവിധ സര്‍ക്കാര്‍ ഓഫീസുകള്‍, കുടുംബശ്രീ മേളകള്‍ എന്നിവിടങ്ങളിലെല്ലാം തന്‍റെ ഉല്‍പന്നങ്ങള്‍ വിറ്റഴിച്ചു വരുമാനം നേടുന്നു. പ്രകൃതിദത്ത ഭക്ഷ്യോല്‍പന്നങ്ങള്‍ക്ക് ഉത്തരേന്ത്യയില്‍ നിന്നു പോലും ധാരാളം ഓര്‍ഡറുകള്‍ ലഭിക്കുന്നുണ്ടെന്ന് ബിന്ദുലേഖ പറയുന്നു. സംരംഭ മേഖലയില്‍ ഇനിയും കൂടുതല്‍ ഉയരങ്ങളിലേക്കെത്താനുള്ള പരിശ്രമങ്ങളിലാണ് ഈ കുടുംബശ്രീ വനിത.

കുടുംബശ്രീ സംഘടിപ്പിക്കുന്ന ‘കുടുംബശ്രീ ഒരു നേര്‍ച്ചിത്രം’ ഫോട്ടോഗ്രാഫി മത്സരത്തിന്റെ എട്ടാം സീസണിലേക്ക് ചിത്രങ്ങള്‍ അയക്കാം. 2026 നവംബര്‍ 28 ആണ് അവസാന തീയതി. കുടുംബശ്രീയുടെ വിവിധ പ്രവര്‍ത്തനങ്ങള്‍ പ്രതിപാദിക്കുന്ന ചിത്രങ്ങളാണ് മത്സരത്തിലേക്ക് പരിഗണിക്കുക. പൊതുവിഭാഗത്തിനും അയല്‍ക്കൂട്ട / ഓക്‌സിലറി വിഭാഗത്തിനും പ്രത്യേകം സമ്മാനങ്ങളുണ്ട്.

പൊതുവിഭാഗത്തില്‍ ഏറ്റവും മികച്ച ചിത്രത്തിന് 30,000 രൂപ ക്യാഷ് അവാര്‍ഡ് ലഭിക്കും. മികച്ച രണ്ടാമത്തെ ചിത്രത്തിന് 20,000 രൂപയും മൂന്നാമത്തെ ചിത്രത്തിന് 15,000 രൂപയും ക്യാഷ് അവാര്‍ഡായി ലഭിക്കും. കൂടാതെ അഞ്ച് പേര്‍ക്ക് 2500 രൂപ വീതം പ്രോത്സാഹന സമ്മാനവുമുണ്ട്. അയല്‍ക്കൂട്ട / ഓക്‌സിലറി വിഭാഗത്തിനായുള്ള മത്സരത്തില്‍ ഏറ്റവും മികച്ച ചിത്രത്തിന് 30,000 രൂപയും രണ്ടാമത്തെ ചിത്രത്തിന് 20,000 രൂപയും മൂന്നാമത്തെ ചിത്രത്തിന് 15,000 രൂപയും ക്യാഷ് അവാര്‍ഡായി ലഭിക്കും. അഞ്ച് പേര്‍ക്ക് 2500 രൂപ വീതം പ്രോത്സാഹന സമ്മാനവുമുണ്ട്. കൂടാതെ വിജയികള്‍ക്ക് ട്രോഫിയും സര്‍ട്ടിഫിക്കറ്റും ലഭിക്കും.

വിശദവിവരങ്ങള്‍ അടങ്ങിയ നോട്ടിഫിക്കേഷന്റെ പൂര്‍ണ്ണരൂപം www.kudumbashree.org/photography2026 എന്ന വെബ്‌സൈറ്റ് ലിങ്കില്‍ ലഭിക്കും.

ഫോട്ടോകള്‍ kudumbashreephotocontest@gmail.com എന്ന ഇ-മെയില്‍ വിലാസത്തിലേക്ക് അയച്ചു നല്‍കാം. ഫോട്ടോകള്‍ ഉള്‍പ്പെടുത്തിയ സി.ഡി-യോ പെന്‍ഡ്രൈവോ അല്ലെങ്കില്‍ ഫോട്ടോയുടെ പ്രിന്റുകളോ പബ്ലിക് റിലേഷന്‍സ് ഓഫീസര്‍, കുടുംബശ്രീ സംസ്ഥാന മിഷന്‍ ഓഫീസ്, രണ്ടാം നില, ട്രിഡ റീഹാബിലിറ്റേഷന്‍ ബില്‍ഡിങ്, മെഡിക്കല്‍ കോളേജ് (പി.ഒ), തിരുവനന്തപുരം- 695011 എന്ന വിലാസത്തിലേക്കും അയച്ചു നല്‍കാം. ‘കുടുംബശ്രീ ഒരു നേര്‍ച്ചിത്രം ഫോട്ടോഗ്രാഫി മത്സരം-സീസണ്‍ 8’ എന്ന് കവറിന് മുകളില്‍ വ്യക്തമായി രേഖപ്പെടുത്തിയിരിക്കണം.

കുടുംബശ്രീ അയല്‍ക്കൂട്ട യോഗങ്ങള്‍, അയല്‍ക്കൂട്ടാംഗങ്ങള്‍ നടത്തുന്ന വിവിധ സംരംഭ പ്രവര്‍ത്തനങ്ങളും കാര്‍ഷിക പ്രവര്‍ത്തനങ്ങളും, കുടുംബശ്രീ ബാലസഭകള്‍, ബഡ്‌സ് സ്ഥാപനങ്ങള്‍ എന്നിങ്ങനെ കുടുംബശ്രീയുമായി ബന്ധപ്പെട്ട വിഷയങ്ങള്‍ ആധാരമാക്കി ചിത്രങ്ങള്‍ എടുക്കാനാകും.

തദ്ദേശീയ മേഖലയിലെ വനിതകളില്‍ സംരംഭകത്വ വികസനം പ്രോത്സാഹിപ്പിക്കുന്നതിനും മെച്ചപ്പെട്ട ഉപജീവന മാര്‍ഗങ്ങള്‍ ലഭ്യമാക്കുന്നതിനും കുടുംബശ്രീ നടപ്പാക്കുന്ന കെ-ടിക് പദ്ധതി വഴി സംരംഭ രൂപീകരണം ഊര്‍ജിതമാകുന്നു. നിലവില്‍ 194 സംരംഭങ്ങളാണ് രൂപീകരിച്ചിട്ടുള്ളത്. ഇതില്‍ സേവന മേഖലയില്‍ 97 സംരംഭങ്ങളും ഉല്‍പാദന മേഖലയില്‍ 71 സംരംഭങ്ങളും നിര്‍മാണ മേഖലയില്‍ 26 സംരംഭങ്ങളുമാണുള്ളത്.  

പെറ്റ് ഷോപ്പ്, ചെറുധാന്യങ്ങളില്‍ നിന്നുള്ള മൂല്യവര്‍ധിത ഉല്‍പന്നങ്ങളുടെ നിര്‍മാണം, കൂണ്‍ ഉല്‍പന്നങ്ങള്‍, ബേക്കറി യൂണിറ്റ്, കോഫി ഷോപ്പ്, ബാഗ് നിര്‍മാണം, മത്സ്യക്കൃഷി, തേനീച്ച വളര്‍ത്തല്‍, ആട്, പശു വളര്‍ത്തല്‍, നേന്ത്രന്‍-കുരുമുളക് കൃഷി, കുട നിര്‍മാണം, പെര്‍ഫ്യൂം നിര്‍മാണം, അലങ്കാല മത്സ്യക്കൃഷി, ഫാഷന്‍ ഡിസൈനിങ്ങ്, എബ്രോയ്ഡറി, ആഭരണ നിര്‍മാണം തുടങ്ങിയ മേഖലകളിലാണ് സംരംഭങ്ങള്‍. ഉല്‍പന്ന വിപണനവും ഊര്‍ജിതമാണ്. നിലവില്‍ എല്ലാ സംരംഭകര്‍ക്കും മികച്ച വരുമാന ലഭ്യത ഉറപ്പു വരുത്താന്‍ കഴിയുന്നുണ്ടെന്നാണ് കണ്ടെത്തല്‍.

പദ്ധതിയുടെ ഭാഗമായി എല്ലാ ജില്ലകളില്‍ നിന്നുമായി 500 പേരെ ഗുണഭോക്താക്കളായി തെരഞ്ഞെടുത്തിരുന്നു. ഇവര്‍ക്ക് കുടുംബശ്രീയുടെ നേതൃത്വത്തില്‍ വിവിധ ഉപജീവന സംരംഭങ്ങള്‍ തുടങ്ങുന്നതിനുള്ള പരിശീലനവും നല്‍കി. ഇതില്‍ ആദ്യഘട്ടത്തില്‍ പരിശീലനം പൂര്‍ത്തിയാക്കിയ ഇരുന്നൂറോളം പേര്‍ക്ക് സാമ്പത്തിക പിന്തുണയടക്കം ലഭ്യമാക്കിയിരുന്നു. ഇവരാണ് നിലവില്‍ കാര്‍ഷിക മൃഗസംരക്ഷണ പരമ്പരാഗത തൊഴില്‍ മേഖലകളില്‍ ഉള്‍പ്പെടെ സംരംഭങ്ങള്‍ രൂപീകരിച്ചിട്ടുള്ളത്. ബാക്കിയുള്ളവര്‍ക്കുള്ള തൊഴില്‍ പരിശീലനം ജില്ലകളില്‍ നടന്നു വരികയാണ്. കര്‍ഷക സംഘങ്ങളുടെ രൂപീകരണവും ഊര്‍ജിതമാണ്.

ലോക മാനസികാരോഗ്യ ദിനത്തോട് അനുബന്ധിച്ച് ജില്ലാ, സി.ഡി.എസ്, എ.ഡി.എസ്, അയല്‍ക്കൂട്ടതലത്തില്‍ ശ്രദ്ധേയ പരിപാടികളുമായി കുടുംബശ്രീ. ജെന്‍ഡര്‍, എഫ്.എന്‍.എച്ച്.ഡബ്ല്യു (ഫുഡ്, ന്യുട്രീഷ്യന്‍, ഹെല്‍ത്ത് ആന്‍ഡ് വാഷ് – വാട്ടര്‍ ആന്‍ഡ് സാനിറ്റേഷന്‍) പദ്ധതികളുടെ ഭാഗമായാണ് ലോക മാനസികാരോഗ്യ ദിനമായ ഒക്ടോബര്‍ 10 മുതല്‍ വിവിധ പ്രവര്‍ത്തനങ്ങള്‍ കുടുംബശ്രീ സംഘടിപ്പിച്ചു തുടങ്ങിയത്.

മനസ്സില്‍ ഒരിടം (മൈന്‍ഡ് സ്‌പേസ്, എ സ്‌പേസ് ഫോര്‍ മെന്റല്‍ വെല്‍ബീയിങ്) എന്ന പേരില്‍ മാനസികാരോഗ്യ അവബോധ പ്രവര്‍ത്തനങ്ങളാണ് സി.ഡി.എസ്, അയല്‍ക്കൂട്ടതലങ്ങളില്‍ കുടുംബശ്രീ കൊല്ലം ജില്ലാമിഷന്റെ ആഭിമുഖ്യത്തില്‍ വരുന്ന രണ്ടാഴ്ചക്കാലത്തേക്ക് സംഘടിപ്പിക്കുന്നത്. എഫ്.എന്‍.എച്ച്.ഡബ്ല്യു പദ്ധതിയുടെ ഭാഗമായുള്ള ഈ പ്രവര്‍ത്തനങ്ങള്‍ക്ക് ഒക്ടോബര്‍ 12ന് കൊല്ലം ജില്ലാ പഞ്ചായത്ത് യോഗാ ഹാളില്‍ സംഘടിപ്പിച്ച ബോധവത്ക്കരണ പരിപാടിയോടെ തുടക്കമിട്ടു. ഡോ. സ്വാതി എസ്.എസ് (സൈക്യാട്രിസ്റ്റ്, കൊല്ലം ജില്ലാ ആശുപത്രി) ക്ലാസ്സ് നയിച്ചു. മാനസികാരോഗ്യം വ്യക്തിയുടെ സമഗ്ര ആരോഗ്യത്തിന്റെ പ്രധാന ഘടകമാണെന്നും ശരീരാരോഗ്യത്തോടൊപ്പം മനസ്സിന്റെ ആരോഗ്യവും സംരക്ഷിക്കേണ്ടതിന്റെ ആവശ്യകതയും ക്ലാസില്‍ വിശദീകരിച്ചു. 

ദൈനംദിന ജീവിതത്തിലെ സമ്മര്‍ദ്ദം, ഉത്കണ്ഠ, വിഷാദം, ഏകാന്തത, ഉറക്കക്കുറവ്, ബന്ധങ്ങളിലെ പ്രശ്‌നങ്ങള്‍ തുടങ്ങിയവ മാനസികാരോഗ്യത്തെ ബാധിക്കുന്ന സാഹചര്യങ്ങളും അവ നേരത്തെ തിരിച്ചറിയേണ്ടതിന്റെ പ്രാധാന്യവും ക്ലാസില്‍ ചര്‍ച്ച ചെയ്തു. സ്വന്തം വികാരങ്ങളെ തിരിച്ചറിയുക, തുറന്ന് സംസാരിക്കുക, മറ്റുള്ളവരെ ശ്രദ്ധയോടെ കേള്‍ക്കുക, പിന്തുണ നല്‍കുക, ആവശ്യമായപ്പോള്‍ വിദഗ്ധ സഹായം തേടുക തുടങ്ങിയ കാര്യങ്ങളും വിശദീകരിച്ചു. ഇത് കൂടാതെ സ്‌നേഹിത ജെന്‍ഡര്‍ ഹെല്‍പ്പ് ഡെസ്‌കിന്റെ നേതൃത്വത്തില്‍ പുത്തൂര്‍ പ്രീമെട്രിക് ഹോസ്റ്റലിലെ കുട്ടികള്‍ക്കായും ബോധവത്ക്കരണ ക്ലാസ്സ് സംഘടിപ്പിച്ചു.

എറണാകുളം സ്‌നേഹിത ജെന്‍ഡര്‍ ഹെല്‍പ്പ് ഡെസ്‌കിന്റെ ആഭിമുഖ്യത്തില്‍ ജീവല്‍ സാഹിത്യ കൂട്ടായ്മയില്‍ ‘ജീവിത വിജയത്തിന് മാനസികാരോഗ്യം’ എന്ന വിഷയത്തില്‍ ബോധവത്ക്കരണ ക്ലാസ്സ് സംഘടിപ്പിച്ചു. ഒക്ടോബര്‍ 11ന് സംഘടിപ്പിച്ച പരിപാടിയില്‍ സ്‌നേഹിത ജെന്‍ഡര്‍ ഹെല്‍പ്പ് ഡെസ്‌ക് സര്‍വീസ് പ്രൊവൈഡര്‍ അമ്പിളി ദാസ് ക്ലാസ് നയിച്ചു. മാനസികാരോഗ്യത്തിന്റെ പ്രാധാന്യം, സ്ത്രീകള്‍ നേരിടുന്ന മാനസിക സമ്മര്‍ദങ്ങള്‍, ആത്മവിശ്വാസം വളര്‍ത്തല്‍, സമ്മര്‍ദങ്ങളെ ആരോഗ്യകരമായി നേരിടുന്നതിനുള്ള മാര്‍ഗങ്ങള്‍, സ്വയംപരിചരണം, ആവശ്യമായ സാഹചര്യങ്ങളില്‍ മാനസികാരോഗ്യ വിദഗ്ധരുടെ സഹായം തേടേണ്ടതിന്റെ പ്രാധാന്യം എന്നിവ ക്ലാസില്‍ വിശദീകരിച്ചു.

പത്തനംതിട്ട സ്‌നേഹിത ജെന്‍ഡര്‍ ഹെല്‍പ്പ് ഡെസ്‌കിന്റെ ആഭിമുഖ്യത്തില്‍ പന്തളം പ്രീമെട്രിക് ഹോസ്റ്റലില്‍ ‘മനസ്സിടം’ എന്ന പേരില്‍ മാനസികാരോഗ്യ ബോധവത്ക്കരണ ക്ലാസ്സ് സംഘടിപ്പിച്ചു. മാനസികാരോഗ്യം, വികാരനിയന്ത്രണം, ആത്മവിശ്വാസം, വികാരങ്ങളുടെ ആരോഗ്യകരമായ പ്രകടിപ്പിക്കല്‍ എന്നീ വിഷയങ്ങളില്‍ സ്‌നേഹിത കൗണ്‍സിലര്‍ അശ്വതി കുട്ടികള്‍ക്ക് അവബോധം നല്‍കി.

സ്‌നേഹിത ജെന്‍ഡര്‍ ഹെല്‍പ്പ് ഡെസ്‌ക്കിന്റെ നേതൃത്വത്തില്‍ ബാലുശ്ശേരി സി.ഡി.എസില്‍ വിജിലന്റ് ഗ്രൂപ്പ് അംഗങ്ങള്‍ക്കായി കൂടെ ബോധവത്ക്കരണ ക്യാമ്പയിന്‍ സംഘടിപ്പിച്ചു. എല്ലാ ജില്ലകളിലും ജില്ല, സി.ഡി.എസ്, വാര്‍ഡ്, അയല്‍ക്കൂട്ടതലങ്ങളില്‍ വിവിധ പരിപാടികള്‍ ആസൂത്രണം ചെയ്ത് നടപ്പിലാക്കി വരികയാണ്.

രാഷ്ട്രപതി ദ്രൗപതി മുര്‍മു ഉദ്ഘാടനം ചെയ്ത വിജയവാഡയിലെ ആജീവിക സരസ് മേളയില്‍ കേരളത്തിന്‍റെ തനിമയോതുന്ന ഉല്‍പന്ന വൈവിധ്യവുമായി കുടുംബശ്രീ സംരംഭകര്‍. കേന്ദ്ര ഗ്രാമ വികസന മന്ത്രാലയത്തിന്‍റെ ആഭിമുഖ്യത്തില്‍ ഒക്ടോബർ 31 വരെ വിജയവാഡയിലെ ബാബുരി ഗ്രൗണ്ടില്‍ സംഘടിപ്പിക്കുന്ന മേളയിലാണ് 14 ഉല്‍പന്ന സ്റ്റാളുകളും ഫുഡ്കോര്‍ട്ടില്‍ നാല് ഭക്ഷ്യസംരംഭ യൂണിറ്റുകളുമായി കുടുംബശ്രീ സാന്നിധ്യമുറപ്പിക്കുന്നത്. കേരളത്തിന്‍റെ പരമ്പരാഗത രുചികള്‍ നല്‍കുന്ന ഭക്ഷ്യവിഭവങ്ങളും തനിമയും പരിശുദ്ധിയുമുള്ള ഗ്രാമീണ ഉല്‍പന്നങ്ങളും ദേശീയതലത്തില്‍ ഉപഭോക്താക്കള്‍ക്ക് മുന്നിലെത്തിക്കുന്നതിലൂടെ ഇവയ്ക്ക് കൂടുതല്‍ ദൃശ്യതയും വിപണന സാധ്യതയും ഉറപ്പാക്കുകയാണ് കുടുംബശ്രീയുടെ ലക്ഷ്യം.

ഭക്ഷ്യവിഭവങ്ങളിലെയും ഉല്‍പന്നങ്ങളിലെയും വൈവിധ്യമാണ് കേരളത്തില്‍ നിന്നുള്ള കുടുംബശ്രീ സ്റ്റാളുകളുടെ പ്രധാന ആകര്‍ഷണം. ചിരട്ട, മുള എന്നിവ കൊണ്ടു നിര്‍മിച്ച വിവിധ കരകൗശല വസ്തുക്കള്‍, കൂടാതെ  ആഭരണങ്ങള്‍, കൈത്തറി വസ്ത്രങ്ങള്‍, പ്രകൃതിദത്ത ഭക്ഷ്യോല്‍പന്നങ്ങള്‍, ഫുഡ് കോര്‍ട്ടില്‍ കേരളത്തിന്‍റെ തനതു രുചി പകരുന്ന വിവിധ തരം നാടന്‍ ഭക്ഷ്യവിഭവങ്ങള്‍ എന്നിവയാണ് സന്ദര്‍ശകരുടെ ശ്രദ്ധ നേടുന്നത്. തിരുവനന്തപുരം, പത്തനംതിട്ട, ആലപ്പുഴ, എറണാകുളം, ഇടുക്കി, പാലക്കാട്, തൃശൂര്‍, കോഴിക്കോട്, മലപ്പുറം, കണ്ണൂര്‍, കാസര്‍കോട് ജില്ലകളില്‍ നിന്നുള്ള സംരംഭകരാണ് മേളയില്‍ പങ്കെടുക്കുന്നത്.

കേരളം ഉള്‍പ്പെടെ രാജ്യത്തെ എല്ലാ സംസ്ഥാനങ്ങളില്‍ നിന്നും കേന്ദ്ര ഭരണ പ്രദേശങ്ങളില്‍ നിന്നുമുള്ള സംരംഭകരും ആജീവിക സരസ് മേളയില്‍ പങ്കെടുക്കുന്നുണ്ട്. ഇതു വഴി സംസ്ഥാനത്തിനു പുറത്തുള്ള വിപണികളുമായി നേരിട്ട് ബന്ധപ്പെടാനും ഉല്‍പന്നങ്ങള്‍ കൂടുതല്‍ ഉപഭോക്താക്കളിലേക്ക് എത്തിക്കാനും കുടുംബശ്രീ സംരംഭകര്‍ക്ക് അവസരമൊരുങ്ങും. ഉല്‍പന്ന വിപണനം വിപുലീകരിക്കുന്നതിനൊപ്പം പുതിയ വിപണന സാധ്യതകള്‍ കണ്ടെത്താനും ഇത്തരം മേളകളിലെ പങ്കാളിത്തം വഴിയൊരുക്കും. കുടുംബശ്രീ  സംരംഭകരുടെ ഉല്‍പന്നങ്ങള്‍ക്ക് ദേശീയ വിപണിയില്‍ കൂടുതല്‍ സ്വീകാര്യത നേടിക്കൊടുക്കുന്നതിനുള്ള  പ്രധാന വേദിയായും ആജീവിക സരസ് മേള മാറിയിട്ടുണ്ട്.

കുടുംബശ്രീയില്‍ ഡെപ്യൂട്ടേഷന്‍ വ്യവസ്ഥയില്‍ ജില്ലാമിഷന്‍ കോ-ഓര്‍ഡിനേറ്റര്‍, അസിസ്റ്റന്‍റ് ജില്ലാമിഷന്‍ കോ-ഓര്‍ഡിനേറ്റര്‍ തസ്തികകളിലെ പ്രതീക്ഷിത ഒഴിവുകളിലേക്ക് അപേക്ഷ ക്ഷണിച്ചു. ജില്ലാമിഷന്‍ കോ-ഓര്‍ഡിനേറ്ററുടെ 14 ഉം അസിസ്റ്റന്‍റ് ജില്ലാമിഷന്‍ കോ-ഓര്‍ഡിനേറ്ററുടെ 52 ഉം പ്രതീക്ഷിത ഒഴിവുകളാണുളളത്. നിലവില്‍ സര്‍ക്കാര്‍ സര്‍വീസില്‍ ഉള്ളവര്‍ക്കും ഓരോ തസ്തികയ്ക്കും അനുയോജ്യമായ ശമ്പളസ്കെയിലിൽ ഉളളതുമായ സര്‍ക്കാര്‍ ജീവനക്കാര്‍ക്ക് അപേക്ഷിക്കാം.

മാതൃവകുപ്പില്‍ നിന്നുള്ള നോ ഒബ്ജക്ഷന്‍ സര്‍ട്ടിഫിക്കറ്റ് സഹിതം നിര്‍ദിഷ്ട മാതൃകയിലുള്ള ഫോമിലാണ് അപേക്ഷകള്‍ സമര്‍പ്പിക്കേണ്ടത്.  അപേക്ഷകള്‍ എക്സിക്യൂട്ടീവ് ഡയറക്ടര്‍, കുടുംബശ്രീ സംസ്ഥാന ദാരിദ്ര്യ നിര്‍മാര്‍ജനമിഷന്‍, ട്രിഡ ബില്‍ഡിങ്ങ്, ചാലക്കുഴി റോഡ്, മെഡിക്കല്‍ കോളേജ് പി.ഓ, തിരുവനന്തപുരം – 695011 എന്ന വിലാസത്തിലാണ് അയക്കേണ്ടത്. അപേക്ഷകള്‍ ലഭിക്കേണ്ട അവസാന തീയതി 31.10.2026. വിശദ വിവരങ്ങള്‍ക്ക് കുടുംബശ്രീ വെബ്സൈറ്റ് www.kudumbashree.org സന്ദര്‍ശിക്കുക.

പതിവ് തെറ്റിക്കാതെ ഇത്തവണയും വരവൂരിലെ പാടങ്ങളില്‍ കുടുംബശ്രീയുടെ നേതൃത്വത്തില്‍ കൂര്‍ക്ക കൊയ്ത്ത്. സി.ഡി.എസിലെ 27 കുടുംബശ്രീ കൂട്ടുത്തരവാദിത്ത കൃഷി സംഘങ്ങള്‍ അഥവാ ജെ.എല്‍.ജികള്‍ വഴി 68 ഏക്കറിലാണ് വരവൂരിന്റെ സ്വന്തം ബ്രാന്‍ഡായ ‘വരവൂര്‍ ഗോള്‍ഡ്’ കൂര്‍ക്ക കൃഷി ചെയ്ത് ഇപ്പോള്‍ വിളവെടുത്തിരിക്കുന്നത്.

വരവൂര്‍ പഞ്ചായത്തും കുടുംബശ്രീ സി.ഡി.എസുമായി ചേര്‍ന്ന് നടത്തുന്ന ഈ പ്രവര്‍ത്തനത്തിൽ കഴിഞ്ഞവര്‍ഷത്തേക്കാള്‍ 7 കൃഷി സംഘങ്ങള്‍ കൂടി കൂടുതലായി ഭാഗമായിട്ടുണ്ട്. കൂര്‍ക്കയ്ക്ക് വിപണി കണ്ടെത്തുന്നതിനായി വരവൂര്‍ ഗോള്‍ഡ് കൂര്‍ക്ക ചന്തയ്ക്കും കൂര്‍ക്ക കൊണ്ടുള്ള വിവിധ വിഭവങ്ങള്‍ തയാറാക്കി വിതരണം ചെയ്യുന്ന കൂര്‍ക്ക ഫെസ്റ്റ് സി.ഡി.എസിന്റെ നേതൃത്വത്തില്‍ ഒക്ടോബർ 5 മുതൽ 7 വരെ സംഘടിപ്പിക്കുകയും ചെയ്തു.

കൂര്‍ക്കയും ബീഫും, കൂര്‍ക്കയും ചിക്കനും, കൂര്‍ക്കയും പത്തിരിയും, കൂര്‍ക്കയും വെള്ളയപ്പവും തുടങ്ങിയ ഭക്ഷ്യ കോമ്പോകളും കൂര്‍ക്ക തോരന്‍ ഉള്‍പ്പെടെയുള്ള വിഭവങ്ങളും കൂര്‍ക്ക ഫെസ്റ്റില്‍ ലഭ്യമാക്കിയിരുന്നു. ആകെ 1165 കിലോഗ്രാം കൂര്‍ക്കയാണ് ചന്തയും ഫെസ്റ്റും മുഖേന വിറ്റഴിഞ്ഞത്. ഇതുവഴി 89,475 രൂപയും ലഭിച്ചു. ഫെസ്റ്റ് മുഖേന മാത്രം 9570 രൂപയുടെ വില്‍പ്പനയും നടന്നു. കൂര്‍ക്ക അച്ചാറും വില്‍പ്പനയ്‌ക്കെത്തിച്ചിരുന്നു.

കൂര്‍ക്ക ചന്തയുടെ ഉദ്ഘാടനം പഞ്ചായത്ത് പ്രസിഡന്റ് യു.ബി. കണ്ണന്‍ നിര്‍വഹിച്ചു. വൈസ് പ്രസിഡന്റ് സി. വിജയലക്ഷ്മി അധ്യക്ഷയായ ചടങ്ങില്‍ കുടുംബശ്രീ ജില്ലാമിഷന്‍ കോര്‍ഡിനേറ്റര്‍ അഭിജിത് കെ. ദീപക് വിശിഷ്ടാതിഥിയായി. പഞ്ചായത്ത് ഉദ്യോഗസ്ഥര്‍, സി.ഡി.എസ് പ്രതിനിധികള്‍, കുടുംബശ്രീ ജീവനക്കാര്‍ തുടങ്ങിയവര്‍ ചടങ്ങില്‍ പങ്കെടുത്തു.

കുടുംബശ്രീയുടെ പതിനാറാമത് പ്രീമിയം കഫേ റെസ്റ്റോറന്‍റ് പാലക്കാട് ജില്ലയിലെ കൊഴിഞ്ഞാമ്പാറ നീലംകാച്ചിയില്‍ പ്രവര്‍ത്തനം ആരംഭിച്ചു. അഡ്വ. സുമേഷ് അച്യുതന്‍ എം.എല്‍.എ പ്രീമിയം കഫേയുടെ ഉദ്ഘാടനം നിര്‍വഹിച്ചു.

കഴിഞ്ഞ വര്‍ഷം പാലക്കാട് കണ്ണമ്പ്ര പന്തലാംപാടത്ത് ദേശീയ പാതയ്ക്ക് സമീപം ജില്ലാ പഞ്ചായത്ത് പദ്ധതിയുടെ ഭാഗമായി നിര്‍മിച്ച വഴിയോര വിശ്രമകേന്ദ്രത്തിലാണ് ജില്ലയിലെ ആദ്യത്തെ പ്രീമിയം കഫേ പ്രവര്‍ത്തനം ആരംഭിച്ചത്. ഇത് വിജയം കൈവരിച്ചതോടെയാണ് ജില്ലയില്‍ രണ്ടാമത്തെ പ്രീമിയം കഫേ ആരംഭിക്കാന്‍ കുടുംബശ്രീ തീരുമാനിച്ചത്. മറ്റു ജില്ലകളിലായി ഇതിനകം പതിനാല് പ്രീമിയം കഫേ റെസ്റ്റോറന്‍റുകള്‍ ആരംഭിച്ചിട്ടുണ്ട്.  

ഏതു സമയത്തും പൂര്‍ണ വിശ്വാസത്തോടെ കഴിക്കാന്‍ സാധിക്കുന്നതാണ് കുടുംബശ്രീ സംരംഭകര്‍ തയ്യാറാക്കുന്ന ഭക്ഷണ വിഭവങ്ങളെന്ന് എം.എല്‍.എ പറഞ്ഞു. ഉദ്ഘാടന ശേഷം അദ്ദേഹം കഫേയുടെ പ്രവര്‍ത്തനരീതികള്‍ ചോദിച്ചറിയുകയും സംരംഭകരെ പരിചയപ്പെടുകയും ചെയ്തു.

പൂര്‍ണമായും ശീതീകരിച്ച റെസ്റ്റൊറന്‍റില്‍ ഒരേ സമയം 80 പേര്‍ക്ക് ഭക്ഷണം കഴിക്കാനുള്ള സൗകര്യമുണ്ട്. രാവിലെ ഒമ്പതു മുതല്‍ രാത്രി 11 മണി വരെയാണ് പ്രവര്‍ത്തന സമയം. വെജ്, നോണ്‍വെജ് വിഭവങ്ങള്‍, കുഴിമന്തി, ചൈനീസ് വിഭവങ്ങള്‍, വിവിധ തരം ജ്യൂസ്. ഷേക്ക് എന്നിവയും റെസ്റ്റോറന്‍റില്‍ ലഭിക്കും. പാഴ്സല്‍ വിതരണത്തിനായി ടേക്ക് എവേ കൗണ്ടറുമുണ്ട്. റെസ്റ്റോറന്‍റില്‍ എത്തുന്നവരുടെ വാഹനം പാര്‍ക്ക് ചെയ്യാനുളള സൗകര്യവും ആധുനിക രീതിയിലുള്ള ടോയ്ലറ്റ് സൗകര്യങ്ങളുമുണ്ട്. ഈ മേഖലയില്‍ പരിചയസമ്പന്നരായ എന്‍. പ്രതിഭ, ആര്‍.ആതിര, ജ്യോതിക എന്നീ വനിതാ സംരംഭകരുടെ നേതൃത്വത്തിലാണ് കഫേയുടെ പ്രവര്‍ത്തനങ്ങള്‍. ഭക്ഷണ പാചകവും വിതരണവും മുതല്‍ ബില്ലിങ്ങ് ഉള്‍പ്പെടെയുള്ള കാര്യങ്ങള്‍ ഇവരുടെ മേല്‍നോട്ടത്തിലാകും നടപ്പാക്കുക. പാചക വൈവിധ്യം, അടിസ്ഥാന സൗകര്യങ്ങള്‍, ഭക്ഷണവിതരണം, ശുചിത്വം, മികച്ച മാലിന്യസംസ്ക്കരണ ഉപാധികള്‍ എന്നിവയിലെല്ലാം ഗുണനിലവാരം പുലര്‍ത്തിക്കൊണ്ടാണ് പ്രവര്‍ത്തനങ്ങള്‍.

സംരംഭങ്ങളുടെ ആധുനികവല്‍ക്കരണവും വരുമാനവര്‍ധനവും ലക്ഷ്യമിട്ടുകൊണ്ട് കുടുംബശ്രീ ആരംഭിച്ച പദ്ധതിയാണ് പ്രീമിയം കഫേ റെസ്റ്റോറന്‍റുകള്‍. സംരംഭകര്‍ക്ക് സുസ്ഥിര വരുമാന ലഭ്യത ഉറപ്പാക്കുന്നതിനൊപ്പം പൊതുജനങ്ങള്‍ക്ക് എല്ലാ ആധുനിക സൗകര്യങ്ങളോടും കൂടിയ ഭക്ഷ്യശാലാ ശൃംഖല സംസ്ഥാനമൊട്ടാകെ ആരംഭിക്കുക എന്നതാണ് ലക്ഷ്യം. ആദ്യം എറണാകുളം ജില്ലയിലെ അങ്കമാലിയിലും തുടര്‍ന്ന് തൃശൂരില്‍ ഗുരുവായൂരിലും പ്രീമിയം കഫേ ആരംഭിച്ചു. ഇവയ്‌ക്കെല്ലാം മികച്ച പൊതുജന സ്വീകാര്യത ലഭിച്ചതോടെ രണ്ടാം ഘട്ടത്തില്‍ കോട്ടയം (കുറവിലങ്ങാട്, മെഡിക്കല്‍ കോളേജ്), കോഴിക്കോട്(കൊയിലാണ്ടി), കാസര്‍കോട്(സിവില്‍ സ്റ്റേഷന്‍, കെ.എസ്.ആര്‍.ടി.സി സ്റ്റാന്‍ഡ്), മലപ്പുറം(കോട്ടയ്ക്കല്‍), കണ്ണൂര്‍(ഇരിട്ടി), കൊല്ലം (പന്‍മന), പത്തനംതിട്ട(പന്തളം, പത്തനംതിട്ട ടൗണ്‍), ആലപ്പുഴ(ചെങ്ങന്നൂര്‍), പാലക്കാട്(പന്തലാംപാടം), ഇടുക്കി(വാഗമണ്‍) ജില്ലകളിലും പ്രീമിയം കഫേ റെസ്റ്റോറന്‍റുകള്‍ ആരംഭിച്ചു കഴിഞ്ഞു. പദ്ധതി വഴി നിലവില്‍ ഇരുനൂറിലേറെ വനിതകള്‍ക്ക് ഈ രംഗത്ത് മികച്ച തൊഴിലും വരുമാനവും ലഭ്യമാക്കാന്‍ സാധിക്കുന്നുണ്ട്.

കുടുംബശ്രീ ജില്ലാ മിഷന്‍ കോര്‍ഡിനറ്റര്‍ പി. ഉണ്ണിക്കൃഷ്ണന്‍ സ്വാഗതം പറഞ്ഞു. കൊഴിഞ്ഞാമ്പാറ ഗ്രാമപഞ്ചായത്ത് പ്രസിഡന്‍റ് ടി. രാമകൃഷ്ണന്‍ അധ്യക്ഷത വഹിച്ചു. ചിറ്റൂര്‍ ബ്ളോക്ക് പഞ്ചായത്ത് പ്രസിഡന്‍റ് ഷീബ രാധാകൃഷ്ണന്‍ മുഖ്യാതിഥിയായി. വാര്‍ഡ് മെമ്പര്‍മാരായ വിജിത്രന്‍, തണികാചലം, സതീഷ് എം, കൊഴിഞ്ഞാമ്പാറ സി.ഡി.എസ് അധ്യക്ഷ രജിത, അസിസ്റ്റന്‍റ് ജില്ലാമിഷന്‍ കോര്‍ഡിനേറ്റര്‍മാരായ അനുരാധ എസ്, ഗീത കെ.ആര്‍, ജില്ലാ പ്രോഗ്രാം മാനേജര്‍മാരായ ഷഹാന ഫാത്തിമ, ബി.സി ശ്രീമതി, വിജിന വി എന്നിവര്‍ ആശംസിച്ചു. സംരംഭക പ്രതിഭ എന്‍ നന്ദി പറഞ്ഞു. സി.ഡി.എസ് അധ്യക്ഷമാര്‍, ബ്ളോക്ക് കോര്‍ഡിനേറ്റര്‍മാര്‍, മൈക്രോ എന്‍റര്‍പ്രൈസസ് കണ്‍സള്‍ട്ടന്റുമാർ, രാഷ്ട്രീയ സാമൂഹ്യ നേതാക്കള്‍, കുടുംബശ്രീ പ്രവര്‍ത്തകര്‍ പങ്കെടുത്തു.